بەيبىتشىلىك جانە كەلىسىم سارايىندا «مەنىڭ ءتىلىم – ۇلى دالا رۋحى» اتتى ءححى قالالىق ءتىل فەستيۆالىن قورىتىندىلاعان سالتاناتتى كەش ءوتتى.
ايتۋلى شارانىڭ شىمىلدىعىن قالا اكىمىنىڭ ورىنباسارى باقتيار ماكەن اشىپ, جىل سايىن ءتىل فەستيۆالى اياسىندا باس شاھاردا 300-گە تارتا ءتۇرلى ءىس-شارا وتەتىنىن, ونىڭ ءبارى مەملەكەتتىك ءتىلدى ارداقتاۋعا ارنالعانىن جەتكىزدى.
– ەلىمىزدە اباي اتامىزدىڭ 175 جىلدىعىنا ارنالعان ءىس-شارالار باستالدى. جاقىندا ەلوردادا العاش رەت حاكىم اتامىز اتىنداعى مەكتەپ اشىلدى. ءال-فارابي بابامىزدىڭ 1150 جىلدىعىنا وراي ونىڭ ەسىمىن وقۋشىلار سارايىنا بەرۋ جوسپارلانىپ وتىر. ال داستۇرگە اينالعان ءتىل فەستيۆالى اياسىندا بىرقاتار يگىلىكتى شارالار ۇيىمداستىرىلدى. قازىر قالا اكىمىنىڭ تاپسىرماسىمەن مەملەكەتتىك مەكەمەلەردىڭ ماڭدايشالارىنداعى جازۋدى لاتىن قارپىنە اۋىستىرۋ جۇمىسى ءجۇرىپ جاتىر, – دەدى ول.
سونداي-اق اكىم ورىنباسارى قازاقتىڭ ءۇش بايتەرەگى – ساكەن سەيفۋللين, ءىلياس جانسۇگىروۆ جانە بەيىمبەت ءمايليننىڭ 125 جىلدىعىنا وراي استاناداعى جازۋشىلار اللەياسىنان ولارعا ەسكەرتكىش ورناتۋ جوبالانىپ وتىرعانىن ايتتى.
بيىل «ءتىل تۋرالى» زاڭنىڭ قابىلدانعانىنا 30 جىل تولدى. سوعان وراي وسى كەشتە مەملەكەتتىك ءتىلدىڭ مارتەبەسىن ءوسىرىپ جۇرگەن ءتىل جاناشىرلارى كوپبولسىن بەكماعانبەتوۆ, بەكجان ءابدۋاليۇلى, قاينار ولجاي, كەنجەگۇل تەرگەمباەۆا العىس حاتپەن ماراپاتتالدى.
سونىمەن قاتار انا ءتىلىمىزدىڭ ابىرويىن اسىرىپ, ەلدىك مۇراتتاردى ناسيحاتتاۋعا قوسقان ۇلەسى ءۇشىن الدان سمايىل, ەردەن قاجىبەك, وسپان سۇلەيمەنۇلى, انۋاربەك قايكەنۇلى, ءناسىپجان ابدراحمانقىزى, نۇرلان اۋەزحانۇلى, ارنۇر قايناربەكۇلى, الماس سىرعاباي, ۆلاديسلاۆ تەن جانە الەكسەي شيرياەۆ سەكىلدى ازاماتتار نۇر-سۇلتان قالاسى اكىمىنىڭ «ءتىل تۇعىرى» ماراپاتىنا يە بولدى.
مەرەكەلىك كەش دۋماندى ءان-كۇيگە ۇلاسىپ, جۇرتشىلىققا قاللەكي تەاترىنىڭ ارتىستەرى مەن №2 «ونەر» مەكتەبىنىڭ شاكىرتتەرى ازىرلەگەن تەاترلاندىرىلعان قويىلىم كورسەتىلدى. ايتىسكەر اقىن مەيىربەك سۇلتانحاننىڭ ارناۋى مەن كۇيشى ايبەك بەكبوسىننىڭ «الاش» كۇيى تىڭداۋشىلاردىڭ كوڭىلىنەن شىقتى. ەسترادا انشىلەرى شاحاريزات سەيداحمەت, ءمولدىر اۋەلبەكوۆا, اسەم ومار تامىلجىتىپ ءان سالدى. يبراگيم ەسكەندىر پاتريوتتىق ءان شىرقاپ, حالىقتى ءبىر سەرپىلتىپ تاستادى. «تۇران» ەتنو-فولكلورلىق ءانسامبلىنىڭ «قازاق ەلى» كومپوزيتسياسى مەن «ناز» تەاترى بيشىلەرىنىڭ ونەرى دە ەشكىمدى بەيجاي قالدىرمادى. كەشتىڭ شىمىلدىعىن جاپقان قايرات نۇرتاس تا تانىمال اندەرىمەن كوپشىلىكتىڭ قوشەمەتىنە بولەندى.
