قارتتار كۇنىنە وراي نۇر-سۇلتان قالاسىنىڭ ەسىل اۋدانىندا مەرەكەلىك شارا ءوتتى.
ارداگەرلەر مەن زەينەتكەرلەر قاۋىمىنا ارنالعان مەرەكەلىك جيىندى ەسىل اۋدانىنىڭ اكىمى بەرىك جاكەنوۆ اشىپ, ەلوردانىڭ دامۋىنا وزىندىك ۇلەس قوسقان, بۇگىندە قۇرمەتتى دەمالىستا بولسا دا, باس قالامىزدىڭ قوعامدىق ومىرىنە بەلسەندى قاتىسىپ جۇرگەن اعا ۇرپاققا العىسىن جەتكىزىپ, زور دەنساۋلىق, باياندى عۇمىر تىلەدى. بەرەكەلى داستارحان باسىندا باس قوسقان قادىرلى قوناقتار ءۇشىن اسەم اندەر شىرقالىپ, اقىننىڭ ارناۋى ايتىلدى. مەكتەپ وقۋشىلارى دوڭگەلەنىپ بي بيلەدى. قادىرمەندى قوناقتار, اسىرەسە, ەسىل اۋداندىق ارداگەرلەر كەڭەسىنىڭ جانىنان قۇرىلعان «ەسىل تولقىندارى» ارداگەرلەر ءانسامبلىنىڭ ونەرىنە ءتانتى بولىپ, زور قوشەمەت كورسەتتى.
نۇر-سۇلتان قالاسى ارداگەرلەر كەڭەسىنىڭ توراعاسى سانسىزباي ەسىلوۆ ءارى تاعىلىمدى, ءارى كوڭىلدى ءىس-شارانى ۇيىمداستىرعان ەسىل اۋدانىنىڭ اكىمدىگىنە, سوعىس جانە ەڭبەك ارداگەرلەرىنىڭ جۇمىسىن ۇيلەستىرىپ جۇرگەن اۋداندىق ارداگەرلەر ۇيىمىنىڭ جەتەكشىسى رىستى اتىعاەۆاعا كوپشىلىكتىڭ اتىنان ريزاشىلىعىن ءبىلدىردى. كوڭىل كوتەرگەن جيىن بارىسىندا باسقا دا ازاماتتار ءسوز سويلەپ, وزدەرىنىڭ مەرەيىن وسىرگەن ۇيىمداستىرۋشىلارعا العىسىن ايتىپ, باتاسىن بەردى.
ەڭ باستىسى, اۋدانداعى ارداگەرلەر قاۋىمى وزدەرىنىڭ ەسىل ەڭبەكتەرىنىڭ باعالانىپ, قۇرمەتكە بولەنىپ, قوعامعا قاجەتتىلىگىن سەزىنىپ قايتتى.
