استانالىق ءبىر توپ ۇستاز كاسىبي مەرەكەلەرىنىڭ قارساڭىندا ءبىلىم جانە عىلىم مينيسترلىگىنىڭ «ءبىلىم بەرۋ ءىسىنىڭ قۇرمەتتى قىزمەتكەرى» جانە «ى.التىنسارين» توسبەلگىلەرىمەن ماراپاتتالدى. استانا اكىمدىگى 10 ۇستازعا پاتەر سىيلادى.
«قازاقستان» ورتالىق كونتسەرت زالىنا كىرەبەرىستەن مۇعالىمدەر مەرەكەلىك كوڭىل كۇي قۇشاعىنا ەندى. مەكتەپ وقۋشىلارى ءار ۇستازعا ءبىر تال راۋشان گۇلىن سىيلاپ, مەرەيلەرىن تاسىتتى. «قالدىرعان ءىزىڭ ماڭگىلىك» اتتى سالتاناتتى كەشتە ءبىلىم جانە عىلىم مينيسترلىگى اتىنان ۆيتسە-مينيستر ەلميرا سۋحانبەرديەۆا قۇتتىقتادى.
– مۇعالىم – مارتەبەلى ماماندىق. ءار ۇستاز – ەرەكشە دارىن يەسى. استانا قالاسىنىڭ ءبىلىم جۇيەسىندە جەتىستىكتەر وتە كوپ. وليمپيادالىق ۇلكەن جارىستاردا 12 جىلدان بەرى ەلوردا ءبىرىنشى ورىندى ەشكىمگە بەرمەي كەلەدى. بۇگىندەرى استانانىڭ ءبىلىم وشاقتارىندا 16 مىڭنان استام مۇعالىم جۇمىس ىستەيدى. 300-گە جۋىق استانالىق وقۋشى بيىل «التىن بەلگى» يەگەرى اتاندى. تۇلەكتەردىڭ 100 پايىزى جوعارى وقۋ ورنىنا تۇسكەن مەكتەپتەر بار. بۇل ۇستازدار بەرگەن ءبىلىم ساپاسىنىڭ وتە جوعارى ەكەنىن بىلدىرەدى. ەلىمىزدەگى ءبىلىم سالاسىنداعى ايتۋلى جاڭالىقتار, جاڭا باستامالار ەلوردا مەكتەپتەرىنەن باستالىپ جاتادى. ەلوردامىزعا دەگەن ەلباسىنىڭ ۇلكەن ىقىلاسى, قامقورلىعى ارقاسىندا تولاعاي تابىستارعا جەتىپ وتىرمىز, – دەدى استانا اكىمى باقىت سۇلتانوۆتىڭ اتىنان ۇستازداردى قۇتتىقتاپ, پاتەر كىلتتەرىن تاپسىرعان قالا باسشىسىنىڭ ورىنباسارى ەرمەك امانشاەۆ.
وسى كەشتە اۋەلەگەن ءان, وقىلعان جىر, مىڭ بۇرالعان بي ۇلاعاتتى ۇستازدارعا ارنالدى. بالاباقشا تاربيەلەنۋشىلەرى, مەكتەپ وقۋشىلارى بار ونەرلەرىن سالدى. ايگۇل يمانباەۆا, قايرات باەكەنوۆ, مارجان اراپباەۆا, كۇلايىم قايىرباەۆا, ت.ب. انشىلەر جينالعانداردىڭ كوڭىلىن كوتەردى. كومپوزيتور كەنتاۋ نازاربەكتىڭ جاس اقىن ارمان شەريزاتتىڭ ولەڭىنە جازىلعان «ۇستازدىڭ عانا قولىندا» اتتى ءاننىڭ تۇساۋى كەسىلدى. ءابىلاحات ەسپاەۆتىڭ «ۇستازىم» شىعارماسىنسىز مۇعالىمدەر مەرەكەسىن ەلەستەتۋ مۇمكىن ەمەس. سالتاناتتى كەش وسى انمەن تۇيىندەلدى.
ايجان رايىسوۆا, ەنەرگەتيكا جانە بايلانىس كوللەدجىنىڭ وقىتۋشىسى:
– بالا كۇنىمىزدە ۇلكەندەر «مۇعالىم بول!» دەپ باتا بەرىپ جاتاتىن. سول باتانىڭ اسەرى دە بار شىعار, مۇعالىم ماماندىعىن تاڭدادىم. كوللەدج وقۋشىلارىنا قازىر قازاق ءتىلى مەن ادەبيەتىنەن ساباق بەرىپ ءجۇرمىن. استاناعا 2003 جىلى كەلگەن ەدىم. 15 جىل بويى پاتەر جالداپ تۇردىق. ەندى باسپاناعا يە بولىپ, كوپتەن كۇتكەن قۋانىشقا بولەندىم. استانا اكىمدىگىنە, ءبىلىم باسقارماسىنا كوپ راقمەت ايتامىن. ءۇيسىز جۇرگەن ارىپتەستەرىمە جۇعىستى بولسىن! مەرەكەمىزبەن قۇتتىقتاي وتىرىپ, تابىس تىلەيمىن! شاڭىراقتارىندا شاتتىق شالقىسىن!
نابيرا ءابدىراحمانوۆا, №1 «بايتەرەك» بالاباقشاسىنىڭ تاربيەشىسى:
– ءار ماماندىقتىڭ ءوز قيىندىقتارى بار. بىراق ماماندىعىڭدى جاقسى كورگەن سوڭ, ونىڭ ءبارىن جەڭۋگە بولادى. بۇگىن ەڭبەگىم ەلەنىپ, پاتەر العانىما قۋانىپ تۇرمىن. قازىر مۇعالىمنىڭ مارتەبەسىن كوتەرۋ تۋرالى كوپ ايتىلىپ جاتىر. بۇل – وتە دۇرىس. جاس اتا-انالاردىڭ ۇستازعا دەگەن قۇرمەتى كەمشىن بولىپ, تاربيەسى ولقى سوعىپ تۇراتىنىن كورىپ ءجۇرمىز. ارينە, سوعان وكپەلەيتىن كەزدەرىمىز بولادى. بىراق ارتىنان: «وسى ماماندىقتى قالاپ كەلدىك قوي» دەپ وكپە-رەنىشتىڭ ءبارىن ۇمىتۋعا تىرىسىپ, ءوزىمىزدى-ءوزىمىز سابامىزعا تۇسىرەمىز. بالاباقشالاردا تاربيەشىلەردىڭ بالالاردى ساباعانىن تەلەديداردان كورگەندە جۇرەگىمىز اۋىرادى. قازاقتا «ءبىر قۇمالاق ءبىر قارىن مايدى شىرىتەدى» دەگەن ءسوز بار عوي, تاربيەشىلەردىڭ ءبارى وسىنداي دەپ ويلاۋعا استە بولمايدى. بارشا ارىپتەستەردى كاسىبي مەرەكەمىزبەن قۇتتىقتايمىن! ابىرويىمىز اسقاقتايتىن كۇندەر كوپ بولسىن!
قىمبات مۇقانقىزى, وقۋشىلار سارايىنىڭ ادىستەمە ءبولىمىنىڭ جەتەكشىسى:
– مۇعالىمدىك ەڭبەك ءوتىلىم 40 جىلدان استى. مەكتەپتە وقىپ جۇرگەنىمدە سۇيىكتى ۇستازدارىما قاراپ, مۇعالىم بولۋدى ارماندادىم. كەيدە جۇمساق, كەيدە قاتال مىنەزدەرىن كورىپ, سولارعا ەلىكتەۋگە تىرىستىم. مۇعالىمدەرىمنىڭ وزدەرىن ۇستاۋى ماعان ۇنايتىن. ولاردى ەشقاشان ۇمىتپايمىن, ساعىنىپ تۇرام. جاقىندا ورىس تىلىنەن ساباق بەرگەن ۇستازىممەن كەزدەسىپ, ساعىنىشىمدى باسقانداي بولدىم. ۇستازدارىمىزدان العانىمىز كوپ دەپ ەسەپتەيمىن. ەرتەرەكتە ءبىلىم بەرۋ ءىسىنىڭ قۇرمەتتى قىزمەتكەرى اتانىپ, بۇگىن «ى.التىنسارين» توسبەلگىسىمەن ماراپاتتالعانىما ولاردىڭ قوسقان ۇلەسى مول دەپ ەسەپتەيمىن.
استانادا قوسىمشا بىلىمگە كوپ كوڭىل ءبولىنىپ جاتىر. 2012 جىلى جاڭا وقۋشىلار سارايىنىڭ اشىلۋى – سونىڭ ايقىن ايعاعى. كوپتەگەن اتا-انالار بالالارىن قازىر بىزگە اكەلىپ جاتىر. سۇرانىسىمىز وتە جوعارى. قالادا ءبىرىنشى ورىندا ارينە ءبىلىم تۇر, بالالاردىڭ بوس ۋاقىتىن ۇيىرمەلەر مەن سپورتتىق سەكتسيالارمەن تولتىرۋ دا جاقسى جولعا قويىلعان.
