ەۋروپا ليگاسىنىڭ 2-تۋرىندا «استانا» ءوز الاڭىندا فرانتسيانىڭ «رەنن» كلۋبىن قابىلدادى.
ويىن الدىندا «استانانىڭ» باس باپكەرى گريگوري بابايان «ك» توبىنىڭ ءفاۆوريتى سانالاتىن فرانتسۋزدارمەن تەڭ ويناعاننىڭ ءوزىن ءتاۋىر كورەتىنىن مالىمدەگەن. بىراق ارىق سويلەپ, سەمىز شىققىسى كەلگەن ەلوردالىقتار بارىنشا ساق ويناپ, قوناعى بيلەگەن جامان ۇيدەي بولمادى.
«استانانىڭ» نەگىزگى قۇرامىنداعى وزگەرىس جاس تالانت باقتيەر زاينۋتدينوۆتىڭ العاشقى مينۋتتان ويىنعا ارالاسقانى بولدى. بۇل بالا وزىنە ارتىلعان سەنىمدى تولىق اقتادى. ماتچتىڭ العاشقى تايمى تەڭ دەڭگەيدە ءوتتى دەۋگە بولادى. ال ەكىنشى تايمنىڭ 64-مينۋتىندا زاينۋتدينوۆتىڭ جۇلدىزى جاندى. ول بۇرىشتامادان مارين توماسوۆتىڭ كوتەرگەن دوبىنا «رەنن» كاپيتانى بەنجامەن اندرەدەن بيىك سەكىرىپ, باسپەن قاقپاعا ءدال باعىتتادى. بۇدان كەيىن قوناقتار ويىن تىزگىنىن قولعا الىپ, تايلى-تۇياعىمەن شابۋىلعا لاپ قويدى. الاڭ يەلەرى ءوز مىندەتىن تاماشا اتقارعان باقتيەردىڭ ورنىنا قورعاۋشى يۋري لوگۆينەنكونى قوسىپ, قورعانىسىن مىقتاپ بەكىتتى. الايدا «استانانىڭ» قورعانىسى كەي ساتتە سىر بەرىپ, جانكۇيەرلەرىن اجەپتاۋىر الاڭداتىپ قويدى. بىراق سوڭىنا دەيىن اۋپىرىمدەپ شىداعان كومانداعا 91-مينۋتتا سوعىلعان ەكىنشى گول ۇلكەن كۇش بەردى. قارىمتا شابۋىل كەزىندە ەكى پاسپەن قاقپاشىمەن بەتپە-بەت كەلگەن مارين توماسوۆ ءمۇلت كەتپەدى.
وسىلايشا «استانا» فرانتسۋزداردى 2:0 ەسەبىمەن ۇتىپ, وتانىنا ۇپايسىز قايتاردى. ءسويتىپ ءوز توبىندا 4 ۇپايمەن كوش باستادى. ەكىنشى ورىندا – 3 ۇپايمەن «رەنن» كومانداسى. مۇنىڭ الدىنداعى ويىندا ەلوردالىقتار سىرت الاڭدا كيەۆتىڭ «ديناموسىمەن» 2:2 ەسەبىمەن تەڭ ويناپ, 1 ۇپاي ەنشىلەگەن ەدى. ال بۇل كوماندا وسى تۋردا چەحيانىڭ «يابلونەتس» كلۋبىمەن تاعى دا ءدال وسىنداي ەسەپپەن تەڭ ءتۇستى. ءسويتىپ «دينامو» 2 ۇپايمەن ءۇشىنشى ورىنعا جايعاسسا, سوڭعى ورىنداعى «يابلونەتستە» – 1 ۇپاي.
ەندى «استانانىڭ» ەۋروپا ليگاسىنداعى كەلەسى ويىنى 25 قازاندا چەحيادا وتەدى.
