استانادا ناشاقورلىقتىڭ تارالۋىنا قارسى «تاۋەلدىلىكتى سپورتقا ايىرباستا» اكتسياسى كەزەكتى رەت ءوتتى. ءىس-شارا ەلوردانىڭ الماتى اۋدانى اكىمدىگىنىڭ, قالالىق دەنە شىنىقتىرۋ جانە سپورت باسقارماسى, پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسى جانە جاستار ساياساتى ماسەلەلەرى باسقارماسىنىڭ قولداۋىمەن ۇيىمداستىرىلدى.
اكتسيا اياسىندا استانالىق سپورتشىلار قالا تۇرعىندارىنا ەلەكتروندى تەمەكىنى سپورتتىق قۇرال-جابدىقتارعا ايىرباستاۋدى ۇسىندى. سولاردىڭ قاتارىندا ەلوردانىڭ جاستار ءماسليحاتىنىڭ دەپۋتاتى, قازاقستاندىق سپورتشىلار وداعىنىڭ مۇشەسى ناريمان سەكەن بولدى.
«استانا قالاسى اكىمدىگىنىڭ قولداۋىمەن قوعامدىق ماڭىزى زور اكتسيا وتكىزىلدى. ونىڭ اياسىندا ءبىز تەمەكى جانە ۆەيپ شەگەتىن جاستارعا قولدارىنداعى زياندى زاتتاردى بوكس قولعابىنا, تەننيس جيىنتىقتارىنا, باسقا دا جابدىقتارعا ايىرباستاۋدى ۇسىندىق. وسىلايشا, ءبىز ەلوردالىقتاردى سالاۋاتتى ءومىر سالتىنا شاقىرا وتىرىپ, دەنى ساۋ ۇرپاق قالىپتاستىرۋعا اتسالىسامىز» دەدى سپورتشى.
ءىس-شارانىڭ ۇيىمداستىرۋشىلار تاراپى رەتىندە «استانا جاستارى» جاستار رەسۋرستىق ورتالىعىنىڭ NEET ساناتىنداعى جاستارمەن جۇمىس ءبولىمىنىڭ مامانى سۇلتان ومىرعاليەۆ مۇنداي باستامالاردىڭ ماڭىزدىلىعىن اتاپ ءوتىپ, جاستاردى سپورتپەن اينالىسۋعا شاقىردى.
«مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا ەسىرتكى مەن قازاقستاندىقتاردىڭ دەنساۋلىعىنا زياندى باسقا دا زاتتاردىڭ قاۋىپ-قاتەرى تۋرالى ايتتى. سونىڭ نەگىزىندە بىرقاتار كەشەندى جۇمىستار جۇرگىزىلۋدە. وسى اكتسيا ارىلى ءبىز جاستاردى سپورتپەن شۇعىلدانۋ, دەنساۋلىقتارىنا كوڭىل ءبولۋ كەرەگىن كورسەتىپ, دۇرىس جولعا سالعىمىز كەلەدى» دەدى مامان.
