ەلباسى كىتاپحاناسىندا «ءسىز باعالايتىننىڭ ءبارى – يادرولىق قارۋدان ازات الەم ءۇشىن» اتتى حالىقارالىق كوشپەلى كورمەنىڭ تانىستىرىلىمى بولدى.
بۇل ءىس-شارا جاپونياداعى قازاقستاننىڭ ەلشىلىگىنىڭ قولداۋىمەن ەلباسى كىتاپحاناسى مەن «Soka Gakkai International» (SGI), يادرولىق قارۋدى جويۋدى قولدايتىن حالىقارالىق كومپانيا (ICAN) ۇيىمداستىردى.
كورمە سەمەي يادرولىق سىناق پوليگونىنداعى سوڭعى جارىلىستىڭ 30 جىلدىعىنا, «ورتالىق ازياداعى يادرولىق قارۋدان ازات ايماق تۋرالى شارتتى راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ 10 جىلدىعىنا جانە ەلىمىزدىڭ بيىلعى 29 تامىزىندا الەمدەگى 26-نشى ەل بولىپ يادرولىق قارۋعا تىيىم سالۋ تۋرالى شارتتى راتيفيكاتسيالاعان اتاۋلى كۇنگە ارنالدى.
كورمەنىڭ اشىلۋىندا ەلباسى كىتاپحاناسىنىڭ ديرەكتورى ءامىرحان راقىمجانوۆ بۇل تاقىرىپ قازاقستان مەن جاپونيا حالقىن عانا ەمەس, بارشا ادامزاتتى تولعاندىرعان جاھاندىق قاۋىپسىزدىك ماسەلەسى ەكەنىنە توقتالدى.
جاپونيانىڭ قازاقستانداعى توتەنشە جانە وكىلەتتى ەلشىسى تاتسۋكيحو كاساي اتوم بومباسىنان زارداپ شەككەن جاپونيا مەن قازاقستاننىڭ تاريحى ورتاق ەكەندىگىن ايتتى.
«يادرولىق قارۋسىز الەم تاقىرىبى ماعان وتە جاقىن. ويتكەنى مەن اتوم بومباسىنان زارداپ شەككەن ءۇشىنشى بۋىن وكىلىمىن. مەنىڭ اجەم ناگاساكي ەپيتسەنترىندە اتوم بومباسىنان زارداپ شەككەندەرگە كومەكتەسەمىن دەپ كوپ مولشەردە ساۋلەگە شالدىققان ەدى. سوندىقتان مەن يادرولىق قارۋدان ازات الەم قۇرۋ ءىسىن بارىنشا قولدايمىن» دەدى ول.
كورمە ەكسپوزيتسياسى ءۇش تاقىرىپقا بولىنگەن. العاشقى «ءبىز ءۇشىن نە قىمبات؟» بولىمىندە حيروسيما مەن ناگاساكي اتوم بومبالارىنىڭ تاريحي فاكتىلەرىن كەلتىرىپ, قازىردە يادرولىق قارۋ قاۋپىنىڭ بار ەكەنىن باياندايدى. «يادرولىق قارۋ ماسەلەسى تۋرالى كوبىرەك ءبىلىڭىز» اتتى ەكىنشى بولىمدە يادرولىق قارۋ ماسەلەسى گۋمانيتارلىق, ەكولوگيالىق, ەكونوميكالىق, ادام قۇقىقتارى جانە باسقا دا تۇرعىدان قاراستىرىلادى. ءۇشىنشى «ءبىز قالايتىن بولاشاق – الەمگە دەگەن كوزقاراسىمىزدى وزگەرتۋ» دەپ اتالعان بولىمدە قارۋسىزدانۋ سالاسىندا جەتكەن جەتىستىكتەر ايتىلادى.
