زەينەتاقى الۋعا ءوتىنىش بەرۋ ءۇشىن قانداي قۇجاتتار جيناۋ كەرەك؟ قايدا بارۋ كەرەك؟ ەڭبەك كىتاپشاسىنداعى قاتەلەردى قالاي تۇزەتۋگە بولادى؟ وسى سياقتى سۇراقتاردى زەينەت جاسىنا جاقىنداعان ادامدار قويادى. وسىنىڭ جايىن ءبىز نۇر-سۇلتان قالاسى بويىنشا ەڭبەك, الەۋمەتتىك قورعاۋ جانە كوشى-قون دەپارتامەنتى زەينەتاقى جانە الەۋمەتتىك قامتاماسىز ەتۋ ءبولىمىنىڭ باسشىسى گۇلنار جامانتاەۆادان سۇرادىق.
قانداي قۇجاتتار ۇسىنىلۋى كەرەك؟
زەينەتاقى تاعايىنداۋ ءۇشىن نەگىزگى قۇجات ەڭبەك كىتاپشاسى بولىپ تابىلادى. ىنتىماقتى زەينەتاقىنى ەسەپتەۋ ءۇشىن 1998 جىلعى قاڭتارعا دەيىنگى ەڭبەك ءوتىلى ەسكەرىلەدى.
ەگەر ادام وقىعان بولسا – ديپلوم, ال ەگەر اسكەردە قىزمەت ەتسە, اسكەري بيلەت ۇسىنىلادى.
ەگەر ايەل جۇمىس ىستەمەگەن جانە وسى كەزەڭدە ءۇش جاسقا تولماعان بالاسى بولسا, وندا بالالاردىڭ تۋ تۋرالى كۋالىكتەرىن جانە بالانىڭ ءۇش جاسقا تولعانىن راستايتىن قوسىمشا قۇجاتتاردى ۇسىنۋ قاجەت.
ەسەپشوت قاي جەردەن اشىلادى؟
ەكىنشى دەڭگەيدەگى كەز كەلگەن بانكتەن زەينەتاقى ەسەپتەۋ ءۇشىن ارنايى شوت اشۋ كەرەك.
ەڭبەك كىتاپشاسىنداعى قاتەلەردى قالاي تۇزەتۋگە بولادى؟
مەملەكەتتىك مۇراعاتقا حابارلاسۋ كەرەك. ەگەر مۇراعاتتا وسى كاسىپورىننىڭ قۇجاتتارى بولماسا, وندا ءسىز ءوز ەڭبەك ءوتىلىڭىزدى سوت ارقىلى كۋاگەرلەرمەن راستاي الاسىز. بۇل ۇيىمدا جۇمىس ىستەگەنىڭىزدى راستايتىن ەڭبەك كىتاپشاسى جانە مەملەكەتتىك مۇراعاتتان ۇيىم قۇجاتتارىنىڭ الىنباعاندىعى تۋرالى انىقتامانى الىپ, ءبىر نەمەسە ەكى كۋاگەردى ەرتىپ الۋ كەرەك.
قايدا بارۋ كەرەك؟
زەينەتكە شىعۋ جاسى اياقتالعانعا دەيىن ون كۇن بۇرىن ادام تۇراقتى تىركەۋدە تۇرعان جەردەگى حقو-عا جۇگىنۋى كەرەك. ۋاقىتشا تىركەۋ قۇجاتتارى زەينەتاقى تاعايىنداۋ ءۇشىن قابىلدانبايدى. ەڭبەك, الەۋمەتتىك قورعاۋ جانە كوشى-قون دەپارتامەنتى زەينەتاقى جانە جاردەماقى تاعايىنداۋ جونىندەگى ۋاكىلەتتى ورگان بولىپ تابىلادى. ءبولىم قۇجاتتاردىڭ بولماۋىنا بايلانىستى زەينەتاقى تاعايىنداۋدان باس تارتۋى مۇمكىن, بىراق بازالىق زەينەتاقىعا مەملەكەت كەپىلدىك بەرەدى, بۇل 16037 تەڭگەنى قۇرايدى.
زەينەتاقى مولشەرى قالاي انىقتالادى؟
زەينەتاقى مولشەرى ءۇشىن ورتاشا ايلىق كىرىس ماڭىزدى ءرول اتقارادى. تابىستى راستاۋ ءۇشىن ءسىز 1995 جىلدان باستاپ زەينەتكە شىققانعا دەيىنگى كەز كەلگەن ءۇش جىل ءۇشىن ۇزىلىستەرگە قاراماستان, جالاقى تۋرالى انىقتامانى ۇسىنۋىڭىز كەرەك. ەگەر ۇيىم بۇرىن جابىلعان بولسا, وندا ءسىز جالاقى تۋرالى اقپارات الۋ ءۇشىن مەملەكەتتىك مۇراعاتقا جۇگىنە الاسىز.
زەينەتاقى تاعايىنداۋ مەرزىمى
زەينەتاقى تاعايىنداۋ ون كۇن ىشىندە جاسالادى. زەينەتاقىنى تاعايىنداۋ تۋرالى SMS-حابارلاما العان كەزدە زەينەتاقى كىتاپشاسىن الۋ ءۇشىن حقو-عا حابارلاسىپ, زەينەتاقى تاعايىندالعانىن جازىپ, ەڭبەك كىتاپشاسىن الۋ كەرەك.
ادامنىڭ ىنتىماقتى زەينەتاقى (1998 جىلعا دەيىنگى ەڭبەك ءوتىلى), مەملەكەتتىك بازالىق زەينەتاقى تولەمى جانە بجزق-دان تولەم الۋعا قۇقىعى بار.
بيىل ايەلدەر 59 جاسىندا, ەر ادامدار 63 جاستا زەينەتكە شىعادى
