كەشە ەلوردانىڭ تۇكپىر-تۇكپىرىندە قازاقستان حالقىنىڭ بىرلىگى كۇنى قىزۋ تويلاندى. ەڭ ۇلكەن مەرەكەلىك شارا باس قالانىڭ قاق تورىنە قونىس تەپكەن «قازاق ەلى» مونۋمەنتى ماڭىنداعى الاڭدا ءوتتى. وعان ەلباسى نۇرسۇلتان نازارباەۆ قاتىستى.
سونداي-اق قالا اكىمدىگىنىڭ الدىنداعى الاڭدا, قالا ىرگەسىندەگى تۇرعىن ءۇي الاپتارىندا حالىقتىق سەرۋەندەر ۇيىمداستىرىلدى. كۇننىڭ شۋاعىمەن جىلىنعان جۇرتشىلىق مەرەكەلىك ءىس-شارالاردا وتكەن كونتسەرتتەرگە, سپورتتىق سايىستارعا جانە ءتۇرلى شىعارماشىلىق بايقاۋلارعا قاتىسىپ, كوڭىل كۇيلەرىن كوتەردى.
تۇڭعىش پرەزيدەنت شاھار تۇرعىندارى مەن قوناقتارى الدىندا سويلەگەن قۇتتىقتاۋ سوزىندە:
– بابالارىمىز بىرلىكتىڭ ارقاسىندا بارلىق قيىندىقتى ەڭسەرىپ, ءبىز ءۇشىن وسىنداي ۇلى دالانى ساقتاپ قالدى. ءبىز ولاردىڭ ارمانىن ورىنداپ, تاۋەلسىز قازاقستاندى قۇردىق. ەندى سول بىرلىگىمىزدى ساقتاپ, تاۋەلسىزدىگىمىزدى قۇرمەتتەۋىمىز كەرەك. دامۋ باعدارلامالارىمىزدى جۇزەگە اسىرۋ ەلىمىزدىڭ بولاشاعىن ودان ءارى جارقىن ەتە تۇسەدى, – دەدى.
جينالعان جۇرتشىلىق كورىگى قىزعان دۋماندى تاماشالاپ ءماز-مەيرام. استاناداعى ەتنومادەني ورتالىقتار جەكە بۇرىشتارىن جاساپ, سالت-داستۇرلەرىنە قاتىستى زاتتارىن كورمەگە شىعارىپتى. ارالاپ ءجۇرىپ, تاتار-باشقۇرت مادەني ورتالىعى ۇسىنعان جادىگەرلەردىڭ جانىنا جاقىندادىق. اتالعان ۇيىمنىڭ وكىلى عاليا راحماتۋللينا كوپشىلىك تاراپىنان ۇلتتىق كيىمدەرگە دەگەن قىزىعۋشىلىق وتە جوعارى ەكەنىن ايتادى.
– مىسالى, تاتارلاردىڭ توبەتەي, كەلەپۋش, كرياشەن, بورەك دەپ اتالاتىن باس كيىمدەرىن سۇراۋشىلار كوپ. بۇلار ءبىر-بىرىنەن پىشىندەرى ارقىلى اجىراتىلادى, – دەيدى ول.
ال ارميان مادەني ورتالىعى جاساعان بۇرىشتا تاعامنىڭ نەبىر ءتۇرى تولىپ تۇر.
– بۇل – اگانتس اتتى ءتاتتىمىز. ونى بيداي, مەيىز جانە جاڭعاقتى ارالاستىرىپ جاسايمىز. ال مىنا اس باستۋرما دەپ اتالادى. مۇنى قازاقتىڭ ءسۇر ەتىمەن سالىستىرۋعا بولادى. اۋەلى ەتتى تۇزعا سالىپ, كەيىن كەپتىرەمىز. ءدامى كەرەمەت, – دەيدى ارميان جەكسەنبىلىك مەكتەبىنىڭ ديرەكتورى اياستان منەيان.
الاڭدا ەلورداعا ايگىلى كومپوزيتور, «راديما» بەلارۋس مادەني ورتالىعىنىڭ وكىلى دميتري وستانكوۆيچتى دە جولىقتىردىق. ونىڭ ايتۋىنشا, قازىرگى تاڭدا استانادا 4 مىڭداي بەلارۋس تۇرادى. ولاردىڭ ءبارى ءار مەيرامدى قازاقستاندىقتارمەن بىرگە تويلاۋدى داستۇرگە اينالدىرىپتى.
