بيىلعى وقۋ جىلىندا ەلوردالىق مەكتەپتەردەگى تاماقتاندىرۋ جۇيەسىنە اتا-انالاردىڭ باقىلاۋ جاساۋىنا مۇمكىندىك تۋدى.
ءبىلىم باسقارماسىنىڭ ءمالىمەتىنشە, قازىرگى تاڭدا باس شاھاردا ورتا ءبىلىم بەرەتىن 85 مەملەكەتتىك مەكەمە بار. ونداعى تاماقتاندىرۋ جۇيەسىنە 33 كاسىپكەرلىك سۋبەكت جاۋاپتى. بيىلدان باستاپ ولاردى تاڭداۋ كونكۋرسى جاڭا ەرەجەلەر بويىنشا ىسكە اسادى. ەندى بايقاۋلاردى ءار مەكتەپ وزدەرىنشە ەمەس, قالالىق اكتيۆتەر جانە مەملەكەتتىك ساتىپ الۋ باسقارماسى ۇيىمداستىرادى. بۇل وزگەرىس كونكۋرستاردىڭ ءادىل وتۋىنە وڭ اسەر ەتىپ قانا قويماي, وعان قاتىسۋشىلار سانىنىڭ ارتۋىنا دا سەپتىگىن تيگىزبەك.
تاعى ءبىر اتاپ وتەتىن جايت, استانالىق مەكتەپتەردىڭ اسحانالارى بەينەباقىلاۋ كامەراسىمەن جابدىقتالۋدا. بۇگىنگە دەيىن 30 مەكتەپتەگى اسحانا مەن تاماق دايىنداۋ بولمەسىنە وسىنداي كامەرالار ورناتىلعان.
سونىڭ ارقاسىندا اتا-انالار ونداعى اس-اۋقاتتىڭ دايىندالۋ پروتسەسىن ونلاين تۇردە قاداعالاي الادى.
مۇنىمەن قوسا, اسحاناداعى مازىرلەر دە قايتا قارالىپ, رەتتەلدى. مەكتەپتە جەۋگە تىيىم سالىنعان ازىق-تۇلىك مازىردەن الىنىپ تاستالدى. جاڭا ءتىزىمدى قۇراستىرۋدا اتا-انالار مەن قازاق تاعامتانۋ اكادەمياسى عالىمدارىنىڭ ەسكەرتپەلەرى ەسەپكە الىندى.
جوعارىدا ايتىلعان جاڭالىقتاردان بولەك, كەلەسى وقۋ جىلىندا نۇر-سۇلتان قالاسىنىڭ ءبىلىم باسقارماسى بارلىق مەكتەپ اسحانالارىنا ەلەكتروندى تولەم جۇيەسىن ەنگىزۋدى جوسپارلاپ وتىر. تاجىريبەلىك الاڭ رەتىندە ازىرگە ەكى مەكتەپ سىنالۋدا. ونىڭ ءبىرى – ەسىل اۋدانىنداعى №59 مەكتەپ-ليتسەي. ونداعى تولەم LRT كارتاسىنىڭ كومەگىمەن جۇزەگە اسادى. ياعني بۇل كارتانى قوعامدىق كولىكتە ءجۇرۋ جانە مەكتەپتەگى تۋرنيكەتتەن وتۋمەن قوسا, وسىلاي اسحانالاردا ەسەپ ايىرىسۋ ءۇشىن دە قولدانۋعا بولادى. ال №54 مەكتەپ-ليتسەيدە ءموبيلدى قوسىمشا ارقىلى ەسەپ ايىرىسۋ جۇيەسى پايدالانىلادى. بۇل دەگەنىمىز – اتا-انا تەلەفونعا قاراپ بالانىڭ نە جەگەنىن جانە وعان قانشا اقشا تولەگەنىن باقىلاي الادى دەگەن ءسوز. ساتۋشىلار ءۇشىن اتالعان ءادىس وتە ءتيىمدى: ءىرى اقشاعا قايتارىم ىزدەپ ۋاقىت جوعالتپايدى ءارى بۋفەتتەگى كەزەك تە قىسقارادى.
ال اقىلى تاماقتانۋ ماسەلەسىنە كەلسەك, كاسىپكەرلىك كودەكسىنە سايكەس, مەملەكەتتىك ورگاندار تاپسىرىستاردى جەتكىزۋشى تاراپقا ءوز باعاسىن قويا المايدى. الايدا ءبىلىم باسقارماسىنىڭ باسشىسى ءانۋار جانعوزين وسى تۇرعىدا بەلگىلى ءبىر شەكتىك باعانىڭ بار ەكەنىن ايتادى. بۇل تالاپتى تاپسىرىس جەتكىزۋشى كومپانيالار دا ەسكەرەدى. ناتيجەسىندە كوپ مەكتەپتەردە بالالار 300-350 تەڭگەگە ءدامدى ءارى تويىمدى تۇسكى اس ىشە الادى.
