كەشە استانا قالاسى ادىلەت دەپارتامەنتىنىڭ ماماندارى لۋي پاستەر كوشەسىندەگى زاڭسىز سالىنعان قۇرىلىس نىساندارىن كۇشتەپ بۇزۋعا كىرىستى. بۇعان دەيىن بىرنەشە مارتە جىبەرىلگەن ەسكەرتۋگە قاراماستان جەر يەسى ءوز ەركىمەن بۇزۋعا اسىقپاعان كورىنەدى. قۇقىق قورعاۋ ورگاندارىنىڭ قىزمەتكەرلەرى كەلگەن بويدا تاعى ەكى-ءۇش كۇن رۇقسات بەرۋىن سۇرادى.
بەلگىلى بولعانىنداي بۇل ماسەلەنىڭ كوتەرىلگەنىنە ءبىراز ۋاقىت وتكەن. استانا قالاسى ادىلەت دەپارتامەنتىنىڭ ءبولىم جەتەكشىسى ەرداۋلەت بولىسبەكتىڭ ايتۋىنشا, 2017 جىلدىڭ 25 مامىر كۇنى استانا قالاسى دەپارتامەنتىنە سوتتىڭ شەشىمى كەلىپ تۇسكەن. ول بويىنشا, لۋي پاستەر, 67 مەكەنجايدا ورنالاسقان كافە مەن اكىمشىلىك عيماراتتى بۇزۋ تۋرالى قاۋلى قابىلدانعان. سوتتىڭ شەشىمىنە قاراي سوت ورىنداۋشىلارى زاڭ اياسىندا «ارنات» جشس يەسىنە ءبىر ەمەس بىرنەشە رەت ءوز ەركىمەن بۇزۋ تۋرالى حابارلاما جىبەرگەن. ال سوتتىڭ شەشىمىنە قارسى بولعان «ارنات» جشس باسشىسى اپەللياتسيالىق شاعىم تۇسىرگەن. الايدا سوت شەشىمى وزگەرىسسىز قالعان. بۇعان دەيىن بورىشكەر دەپارتامەنت تاراپىنان سوت ورىنداۋشىسىنىڭ حابارلاماسىن ورىنداماۋىنا بايلانىستى قر اكىمشىلىك قۇقىق بۇزۋشىلىق تۋرالى 607-باپپەن اكىمشىلىك شاراعا تارتىلعان. تيىسىنشە, مەملەكەتكە ايىپپۇل تولەگەن.
«ايىپپۇل تولەنگەننەن كەيىن جىلدىڭ سوڭىنا دەيىن سوت شەشىمىن ورىنداۋى ءتيىس ەدى. سوڭعى رەت «ارنات» جشس باسشىسى ءوزى تۇسىنىكتەمە جازىپ, جەلتوقسان ايىنىڭ سوڭىنا دەيىن قۇرىلىستى بۇزاتىنىن ايتقان. الايدا وزدەرىڭىز كورىپ تۇرعانداي, تاعى 2-3 كۇن سۇراپ وتىر. سوندىقتان ءبىز كۇشتەپ ورىنداۋعا كەلدىك» دەيدى ادىلەت دەپارتامەنتىنىڭ ءبولىم جەتەكشىسى ەرداۋلەت بولىسبەك.
ءبىز زاڭسىز قۇرىلىس نىسانىن سالعان «ارنات» جشس يەسى ءاليا ەرمەكباەۆامەن دە اڭگىمەلەسكەن ەدىك. ايتۋىنشا, اۋماعى 90 سوتىق بولاتىن جەردى وسىدان 11 جىل بۇرىن 130 ميلليونعا ساتىپ العان ەكەن. جەر وزىنىكى بولعان سوڭ, شاعىن كافە مەن سپورتزال تۇرعىزعان. قۇرىلىستىڭ 95 پايىزى اياقتالۋعا جاقىن قالعان تۇستا, سوت ىسىرۋ تۋرالى شەشىم قابىلداعان.
«شىنىمدى ايتسام, مەنىڭ قاتەلىگىم قۇرىلىس باستالار الدىندا قالا قۇرىلىسى باسقارماسىنان رۇقسات الماۋىمدا بولىپ وتىر. الايدا جەر وزىمدىكى بولعاننان كەيىن قۇرىلىستى باستاپ كەتتىك. قۇجاتتارىن كەيىن رەتتەستىرەمىن دەپ ويلادىم. العاش رەت زاڭسىز سالعانىم ءۇشىن 1 ملن 200 مىڭ تەڭگە ايىپپۇل تولەتتى. ەندى تۋرا ءبىر جىل وتكەننەن كەيىن ىسىرۋ تۋرالى سوت شەشىمى شىقتى. مەن جوعارعى سوتقا دەيىن باردىم. «نۇر وتان» پارتياسىنان كومەك سۇرادىم. دەپۋتاتتاردىڭ دا قابىلداۋىندا بولدىم. وكىنىشكە قاراي, ەشكىمنەن كومەك بولمادى. ءوزىم جەتى بالانى تاربيەلەپ وتىرمىن. «التىن القا» يەگەرىمىن. مەملەكەتكە قول جايماي, ءبىر تيىن الماي, بالالارىمدى ءوسىرىپ كەلەمىن. جىل سايىن مەملەكەتكە سالىعىمدى تولەپ, جۇرتقا جۇمىس تاۋىپ بەرىپ وتىرمىن. ەندى كەلىپ, ماڭداي تەرمەن سوققان قوس نىساندى بۇزۋعا تۋرا كەلىپ وتىر. ءۇش بالام سپورتپەن اينالىسادى. قىزىم – سامبودان الەم چەمپيونى. وزدەرىڭىز بىلەسىزدەر, استانادا سپورت زالدارى تاپشى. مەن پايدا تابۋ ءۇشىن رەستوران, ساۋنا نەمەسە جالعا بەرەتىن وفيس سالمادىم. بالالارىمنىڭ بولاشاعى ءۇشىن سپورت زالىن سوقتىم. قۇرىلىسى ءانى-مىنە بىتەدى دەگەندە, ءبىر كۇندە ءبارىن جوق قىلۋ, ارينە, ماعان دا وڭاي ەمەس» دەيدى ءاليا ەرمەكباەۆا.
ارينە, وكىنىشتى. دەگەنمەن, زاڭ بارشاعا ورتاق. وسىلايشا, ءاليا ەرمەكباەۆا جىلداپ تۇرعىزعان قۇرىلىس نىسانىن ءوز قولىمەن قايتا بۇزۋعا كىرىستى.
گۇلميرا ايماعانبەت
