قازىرگى زاماندا جۇرت جازدا تىنىعۋ دەگەننىڭ نە ەكەنىن جاقسى بىلەدى. كوپ ادام جىل بويى وسى مەزگىلدى تاعاتسىزدانا كۇتەدى. بىرەۋلەر جاز كۇندەرىندەگى دەمالىس كەزەڭىن ساياجايلاردا وتكىزگەندى ۇناتسا, تاعى بىرەۋلەر الەمنىڭ تۇكپىر-تۇكپىرىن ارالاپ, جانعا جايلى جاعاجايلاردا سۋعا ارمانسىز شومىلىپ جۇرگەندى اڭسايدى. ءتىپتى ەشقايدا ۇزاپ شىقپاي-اق, قالت ەتكەن ۋاقىتتارىن ءتيىمدى پايدالانىپ, ءوزى تۇراتىن جەردىڭ وزەندەرى مەن كولدەرى بويلارىنا بارىپ تۇرعاندى قولاي كورەتىندەر دە از ەمەس. الەمنىڭ ءىرى قالالارىندا ادامداردىڭ مۇنداي توپتارى ءۇشىن قانداي جاعدايلار جاسالىپ جاتىر؟ جاھاننىڭ ءىرى ەلدى مەكەندەرىندە جاعاجايلارداعى دەمالىس قالاي ۇيىمداستىرىلىپ ءجۇر؟ ەندى وسى جايىندا اڭگىمەلەپ كورەيىك.
وسى رەتتە ويعا ەڭ الدىمەن باگام ارالىنداعى «Pink Sands», سەيشەل ارالدارىنداعى «Anse Source D`Argent», مالديۆ ارالىنداعى «Cocoa Island», ماۆريكيدەگى «Paradis», فيدجيدەگى «Wakaya», برازيلياداعى «Copacabana» سەكىلدى جاعاجايلار ورالادى. ولاردىڭ ءبارى تابيعاتتىڭ وتە كوركەم مۇيىسىنەن ويىپ ورىن الۋىمەن قاتار, شومىلاتىن ايدىنى كەڭدىگىمەن, قۇمى تازالىعىمەن, اۋا رايى قولايلىعىمەن ەرەكشە ەسەپكە الىنىپ تۇرادى. ماسەلەن, برازيليانىڭ ريو-دە-جانەيرو قالاسىنىڭ ماڭىنداعى وسىنداي كەلىستى جەرگە قانات جايعان اتاقتى «كوپاكابانا» جاعاجايى مۇحيتتىڭ 4 شاقىرىمدىق جاعالاۋىن كولبەي الىپ جاتىر. اسەم قالانىڭ تۇستىك بولىگىندەگى ادەمى وڭىرگە قونىس تەپكەن بۇل دەمالىس اۋماعىن جەرگىلىكتى تۇرعىندار «تەڭىزدىڭ حانشايىمى» دەپ تە اتايدى ەكەن. كوپاكابانا – ريوداعى ەڭ تانىمال اۋدان. مۇندا سونداي-اق عاجايىپ اپارتامەنتتەر مەن وراسان زور پەنتحاۋستار ورنالاسقان. بۇل ءمۇيىس سونداي-اق بارلىق ساياحات ساپارلارىنا شىعۋ ءۇشىن ىڭعايلى نۇكتە دە. مۇندا جىل سايىن تەك 31 جەلتوقساننان 1 قاڭتارعا قاراعان ءتۇنى عانا 2 ميلليوننان استام تۋريست جينالىپ تۇرادى ەكەن. وسىنىڭ ارقاسىندا جاعاجاي قالا بيۋدجەتىنە دە وراسان زور كولەمدە قارجى ءتۇسىرىپ تۇرادى.
نەگىزى, افينا گرەكيانىڭ ۇزدىك جاعاجايلى كۋرورتتى قونىستارىنىڭ قاتارىندا جوق. الايدا, كونە كەنتتىڭ ەجەلدەن كورىكتى ورىندارىن كورمەككە كەلەتىن جىل سايىنعى ميلليونداعان تۋريستەردىڭ ەسەبىنەن مۇندا دا تەڭىز جاعالاۋىن دامىتۋعا ايرىقشا كوڭىل بولىنە باستاپتى. قالا باسشىلىعى وسىعان وراي بۇگىندە ەكسكۋرسيالىق دەمالىس جەلىسىن تەڭىزبەن ۇشتاستىرا جۇرگىزۋدىڭ شارالارىن جان-جاقتى قاراستىرىپ جاتىر.
گرەك استاناسىنىڭ ماڭايىندا جىلدىڭ جىلى مەزگىلىندە سۋعا شومىلىپ, دەمالىس وتكىزۋگە ىڭعايلى مەكەندەر از ەمەس. بۇل ءۇشىن قالانىڭ ورتالىعىنان شامالى عانا جۇرسە جەتكىلىكتى, سۋى دا تىنىش, جاعدايى دا جاقسى ورىندار كوپتەپ كەزدەسە بەرەدى. شاھاردىڭ تۇستىك بەتكەيىندە تىنىعۋعا جاقسى مۇمكىندىك بەرەتىن ەلدى مەكەندەر از ەمەس. مۇندا بارلىق جاعاجايلارعا ورتاق ءبىر نارسە: ولاردىڭ بارىندە قۇتقارۋشىنىڭ جوق جانە سۋعا شومىلۋدىڭ قاۋىپتى ەكەنىن بىلدىرەتىن قىزىل جالاۋ ءىلۋلى تۇرادى.
بۇلاردىڭ اراسىندا مەملەكەت ءوزىنىڭ باقىلاۋىنا الىپ جاتقاندارى دا بار. ماسەلەن, «فاليرون» اتتى تەگىن قوعامدىق جاعاجاي سولاردىڭ قاتارىنا جاتادى. ول قالانىڭ ورتالىق بولىگىنە ەڭ جاقىن تۇر. پورتتىڭ سول جاعىن الىپ جاتقان بۇل جاعالاۋعا جۇرت ترامۆايمەن دە, جاياۋ دا كەلە الادى. جاعادا كەلگەن كىسىلەردىڭ كيىنىپ-شەشىنەتىن كابينالارى, قوعامدىق اجەتحانالار, سونداي-اق ۆولەيبول الاڭى, كافە جانە بار ورنالاسقان. بۇدان بولەك, 5 ەۋروعا شەزلونگ پەن شاتىردى جالعا الۋعا دا بولادى, ال كەشكە قاراي ديسكوتەكا اشىلادى.
راس, جاعالاۋدىڭ ساپاسى مەن سۋدىڭ تازالىعى ءالى سىن كوتەرمەيدى. بۇعان قوسا, بۇل جەردە ادام قاراسى قاشاندا كوپ. ال بۇدان ارىراق جۇرگەن سايىن ىڭعايلىراق مۇيىستەر كوبەيەدى. سونىڭ ءبىرى «ۆۋلا» دەپ اتالادى. بۇل افينا ماڭىنداعى ەڭ جاقسى شومىلاتىن مەكەندەردىڭ ءبىرى. مۇنداعى سۋسىعان تازا قۇمدى جاعالاۋ, سۋعا تۇسەر جەردىڭ جايۋاتتىعى مەن سۋدىڭ جىلىلىعى جۇرتتى وزىنە كوبىرەك تارتادى. سوندىقتان بۇل ماڭعا بالالارىن ەرتىپ كەلەتىندەر دە جەتىپ-ارتىلادى. جاعالاۋدا ولاردىڭ الاڭسىز ويناۋلارى ءۇشىن ميني-فۋتبول, جاعاجاي ۆولەيبولى الاڭدارى, سۋ شاڭعىسى, كانوە قولتىقتارى جاساپ قويىلعان. ولاردىڭ قاپتالىندا سونداي-اق كافە, رەستوراندار, كيىنىپ-شەشىنەتىن كابينالار, دۋش, اجەتحانالار تۇر. Wi-Fi جەلىسى جۇمىس ىستەيدى. بۇلاردىڭ ءبارى جاستاردى كوپتەپ تارتۋعا قىزمەت ەتەدى. ال جاعاجايعا كىرۋ قۇنى 5 ەۋرو تۇرادى. مۇنان باسقا, جاتىن توسەكتەر, ەكى شەزلونگ پەن شاتىردان تۇراتىن كەشەن 4 ەۋروعا جالعا بەرىلەدى.
گرەكيا بايتاعىنىڭ تاعى ءبىر ەرەكشەلىگى, مۇندا ارنايى جاعاجاي كلۋبتارى دا جۇمىس جاسايدى. سولاردىڭ ءبىرى «اليموس» دەپ اتالادى. ونىڭ ورتالىققا جاقىن جەرگە قانات جايعان مەكەنى قالالىق جاعاجاي بولىپ سانالادى. مۇندا دا ەرتەلى-كەش ىستىقتان باس ساۋعالاعان كوپشىلىك ۇزدىكسىز كەلىپ جاتادى. جاعالاۋدا سۋعا شومىلىپ, كۇنگە قىزدىرىنۋ ءۇشىن كەلەتىن جۇرتتىڭ اراسىندا قالا تۇرعىندارى دا, تۋريستەر دە از بولمايدى. جاعادا مايدا جىلتىر تاستار كوپ, ال سۋى جىلى دا جۇعىمدى, قۇمى جۇمساق. تەڭىزگە تۇسەتىن تابانى جايپاق, بىردەن تەرەڭدەپ كەتپەيدى. سول سەبەپتى دەمالۋشىلار كوبىنە بالالارىن دا الا كەلەدى. تەرريتوريا كوركەيتىلگەن, جوعارىدا ايتىلعان جاعدايلار مۇندا دا بار. شامامەن جاعالاۋدان 100 مەتردەي جەردە سۋپەرماركەت جۇمىس جاسايدى. جاعاجايعا كىرۋ تەگىن بولعانىمەن, وندا پايدالانىلاتىن نارسەلەر ساتىلادى.
ءدال وسىنداي جاعدايلار «استير» جاعاجاي كلۋبىنىڭ اۋماعىندا دا جاسالعان. بىراق ول قاشىقتاۋ جەردە. افينادان شامامەن 20 شاقىرىمدا ورنالاسقان. لايموس تۇبەگىنەن جاي تاپقان بۇل الاپتىڭ ۇزىندىعى 300 مەتردەن اسپايدى. اينالاسىن جارتاستار مەن توبەشىكتەر قورشاپ تۇر. سارعىش ءتۇستى قۇمى وتە جۇمساق. وتە ءبىر تىنىش تا ادەمى جەر. مۇندا قوناقتاردى ءسال جوعارىدا كافە مەن رەستوراندار قارسى الادى. قىمبات بۋتيكتەر مەن كەرەمەت سەرفيس تە وسىندا, تەڭىز جاعاسىندا ماسساج سالونى مەن يوگا ۇيرەتۋشىلەر كلۋبى بار. بۇلاردان بولەك, اجەتحانادان باستاپ, ءتۇرلى سپورت الاڭدارى مەن زالدارىنا دەيىن ينفراقۇرىلىمى بۇل ماڭدى ودان بەتەر تارتىمدى ەتە تۇسەدى. مۇنداي جاقسى جاسالعان جاعاجايلار ماسكەۋدىڭ ماڭىندا دا بارشىلىق. كرەملدى قالادا بيىلعى 25 ماۋسىمدا سۋعا ءتۇسۋ ماۋسىمى اشىلدى. وسىعان بايلانىستى مۇنداعى اشىق سۋ باسسەيندەرىندە شومىلۋ كەزەڭى قىزىپ سالا بەردى. بۇلاردىڭ دەنى ماسكەۋ وزەنى بويىندا, شاھار ءىشى مەن سىرتىنداعى توعانداردا ورنالاسقان. ماسەلەن, زەلەنوگرادتاعى ۇلكەن بوگەت سونداي قولايلى ورىننىڭ ءبىرى. بۇل سۋ قويماسىنىڭ اۋماعى 10 گەكتار جەردى الىپ جاتىر. وسى زەلەنوگرادتاعى شكولنوە كولى دە دەمالىس اڭساۋشىلار ءۇشىن تاپتىرماس ورىن. ولاردىڭ بارلىعىندا كەلۋشىلەر ءۇشىن جاقسى جاعدايلار جاساپ قويىلعان.
گرۋزيانىڭ باس قالاسى – تبيليسيدە جۇرتتىڭ جازدا سۋعا تۇسەتىن ورىندارىن ۇيىمداستىرۋدى جاقسى جولعا قويىپ العان. كوپشىلىك وندا تبيليسي سۋ قويماسى, تاسباقا كولى جانە تۇلكى كولى ءتارىزدى اشىق باسسەيندەرگە بارادى. ولاردىڭ جاعالاۋلارى كەلۋشىلەرگە قىزمەت ەتۋگە جان-جاقتى دايىن. ال سۋ قويمالارىنىڭ باكتەريولوگيالىق جاعدايلارى ءجيى تەكسەرىلىپ تۇرادى.
ۆەنگريانىڭ ورتالىعى – بۋداپەشتتە بۇل پروبلەما ءتىپتى وزگەشە شەشىلگەن. بۇل قالادا جاعاجايلاردىڭ ءبارى دۋناي وزەنىنىڭ اتىپتارىن الىپ جاتىر. سولاردىڭ العاشقىسى – «پالاتينۋس» 1919 جىلى وزەن ارناسىنداعى مارگيت ارالىندا اشىلعان. كەيىن قالا وسە كەلە, ونىڭ قاتارىنا «سەچەني», «گەللەرت», «رۋداش», «لۋكاش» سەكىلدى كوپتەگەن جاعاجايلار قوسىلعان. بۇلاردىڭ بارلىعىنىڭ ءبىر ەرەكشەلىگى, ولار تىكەلەي وزەن جاعاسىنداعى اۋداننان سالىنعان اشىق سۋ قويماسى تۇرىندە جاسالعان.
بۇگىندە كۇللى الەمدەگى ءىرى قالالاردىڭ بارىندە دەرلىك وسىنداي تىنىعۋ ورىندارى بار. جاھان شاھارلارى جۇرتتىڭ جازعى جاعاجايلاردا تىنىعىپ, سۋعا شومىلۋلارىنا ايرىقشا قاتتى ءمان بەرەدى. سونداي دەمالىسقا قولايلى ورىندار ءبىزدىڭ استانا ماڭايىندا دا جەتكىلىكتى. ءتىپتى قالا ورتاسىن قاق جارىپ اعاتىن ەسىلدىڭ بويىنان دا سونداي ورىندار اشسا ارتىقتىق ەتپەس ەدى. ەلورداعا جاقىن جەردەن نۇرا, سىلەتى سەكىلدى وزەندەر اعىپ وتەدى. بۇل, بىرىنشىدەن, قالا تۇرعىندارى مەن قوناقتارىنىڭ بوس ۋاقىتتارىندا جاقسى دەمالۋلارىن ۇيىمداستىرۋ ءۇشىن وتە قولايلى بولسا, ەكىنشىدەن, بيزنەستى دامىتۋعا دا وزىنشە سەرپىن بەرەر ەدى.
سەرىك ءپىرنازار
ەسىلدىڭ بويىنان تىنىعۋ ورىندارىن اشۋ تۋرالى ورىندى جازدىڭىز.