«قازاقستان» ورتالىق كونتسەرت زالىندا بەلگىلى كومپوزيتور, مەملەكەتتىك سىيلىقتىڭ لاۋرەاتى تولەگەن مۇحامەدجانوۆتىڭ ەلوردانىڭ 20 جىلدىعىنا ارنالعان «استانا – مەنىڭ تاعدىرىم» اتتى شىعارماشىلىق كەشى ءوتتى.
ايتۋلى شارانى وتكىزۋگە قر مادەنيەت جانە سپورت مينيسترلىگى ۇيىتقى بولعان. كەش شىمىلدىعى كومپوزيتوردىڭ وزگەشە ورىممەن جازىلعان «ومىرگە قايران قالام» اتتى جاڭا شىعارماسىمەن اشىلدى. جۇرەكتىڭ نازىك پەرنەسىن قوزعايتىن دۇنيەدەن تىرشىلىكتىڭ تىلسىم سىرلارىن تۇسىنگەندەي بولاسىز. جالپى, كەش ەكى بولىمنەن قۇرالعان. بىرىنشىسىندە, اۆتوردىڭ سيمفونيالىق وركەستردىڭ حورىمەن كلاسسيكالىق تۋىندىلارى وينالسا, ەكىنشىسىندە – الدەقاشان كورەرمەن كوڭىلىن ادەمى اسەرگە بولەگەن اندەرى ورىندالدى. وندا قازاق ءان ونەرىنىڭ جارىق جۇلدىزدارى الىبەك دىنىشەۆ, روزا رىمباەۆا, نۇرجامال ۇسەنباەۆادان باستاپ, كەيىنگى تالانتتى بۋىن وكىلدەرى – مەيرامبەك بەسپاەۆ, ساكەن مايعازيەۆ, التىناي جوراباەۆا, سۇندەت بايعوجين, ازامات جىلتىركوزوۆ, اسىلبەك ەڭسەپوۆ, باۋىرجان يساەۆ سەكىلدى ونەرپازدار مۇحامەدجانوۆتىڭ سازدى نازعا تولى اسەم اندەرىن تامىلجىتا شىرقادى. سونداي-اق, «كەشيۋ», «زامان», «مۋزارت لايف» توپتارى دا كونتسەرتتىڭ كورىگىن قىزدىردى. ماسكەۋدەن ادەيىلەپ شاراعا ءانشى ستاس پەحا مەن «نا-نا» توبى دا كەلىپ, كەش يەسىنىڭ ابىرويىن اسپانداتتى.
بۇل كەشتىڭ باس قالانىڭ مەرەيتويىنا ارنالعانى بەكەر ەمەس. تولەگەن اعامىز ەلوردانىڭ العاشقى ىرگەتاسى قالانعان ساتتەن باستاپ, وسى شاھاردا ەڭبەك ەتتى. ونىڭ مادەني-رۋحاني ءومىرىنىڭ دامۋىنا ۇلەس قوستى. ىرگەلى ونەر وردالارىنىڭ اشىلۋىنا مۇرىندىق بولدى.
«بيىل ەلورداعا كوشىپ كەلگەنىمە 20 جىل تولدى. سودان بەرى وسى قالامەن ءومىرىم بىرگە ءورىلدى. ەندى ول ەشقاشان ۇزىلمەيدى دەپ ويلايمىن. عاسىرلاردا سيرەك بولاتىن ۇلى ءىستىڭ ورتاسىندا ءجۇردىم. جاۋاپتى قىزمەت ىستەدىم. شىندىعىندا, مەن ءوزىمدى باقىتتى ادام رەتىندە سەزىنەم. سوندىقتان كەشىمدى «استانا – مەنىڭ تاعدىرىم» دەپ اتادىم» دەدى كومپوزيتور.
ازامات ەسەنجول
