ەلوردادا «تاڭ» تاتار-باشقۇرت ەتنومادەني ورتالىعىنىڭ ۇيىمداستىرۋىمەن سابانتوي مەرەكەسى تويلاندى.
بۇل مەرەكە ەلوردا اكىمدىگى, قازاقستان حالقى اسسامبلەياسى, قازاقستانداعى رەسەي فەدەراتسياسى ەلشىلىگى جانە ەلىمىزدەگى تاتارستان رەسپۋبليكاسىنىڭ وكىلەتتى وكىلدىگىنىڭ قولداۋىمەن وتكىزىلدى.
سابانتوي – كونەدەن كەلە جاتقان ەڭبەك پەن دوستىق مەيرامى. ءداستۇر بويىنشا تاتار حالقى بۇل مەرەكەنى جيىن-تەرىم كوپ بولسىن دەگەن ىرىممەن تويلاعان. قازىر ول ۋاقىت اعىمىنا قاراي وزگەرىسكە ۇشىراپ, زاماناۋي رەڭككە يە بولىپ, يۋنەسكو-نىڭ مادەني مۇرا جاۋھارلارى تىزىمىنە ەنگەن.
«بۇگىن – ءبىز ءۇشىن ايتۋلى كۇن. وسى كۇنى ەلدىڭ ىرىسى تاسىپ, ادامداردىڭ تۋىستىعى مەن باۋىرلاستىعى ارتادى. اقساقالدار ساباقتى وي ايتىپ, جاستار سودان ءتالىم الادى. الدا جۇزەگە اسىراتىن جوسپارلارىمەن بولىسەدى» دەيدى «تاڭ» تاتار-باشقۇرت ەتنومادەني ورتالىعىنىڭ توراعاسى رافيك ۆاليەۆ.
مەرەكەلىك شارانىڭ كورىگىن تاتارستاننان كەلگەن ارتىستەر قىزدىردى. ولار وزدەرىنىڭ سىرلى ءان مەن كۇيگە تولى كونتسەرتتىك باعدارلاماسىن ۇسىندى. «كوراش» باتىرلار سايىسىن ۇيىمداستىردى. سونداي-اق, كەلگەن قوناقتارعا ۇلتتىق داستارقان جايىلدى.
ازامات ەسەنجول
