بيىل ەلوردانىڭ تۇرعىن ءۇي-كوممۋنالدىق شارۋاشىلىق سالاسىن دامىتۋعا 62,8 ملرد تەڭگە ءبولىندى. قازىرگە دەيىن بۇل قارجىنىڭ 49 ملردى نەمەسە 80 پايىزى يگەرىلدى. قالعان قاراجات جىل اياقتالعانشا يگەرىلەدى. نۇر-سۇلتان قالاسى ءماسليحاتىنىڭ كەزەكتى سەسسياسى كەزىندە وسىلاي دەپ مالىمدەگەن قالا اكىمىنىڭ ورىنباسارى ەرمەك قيزاتوۆ تۇرعىندارعا جايلى قالالىق ورتانى قالىپتاستىرۋ ءۇشىن اتقارىلىپ جاتقان جۇمىستار جونىندە باياندادى.
«بولىنگەن قارجى 66 جوبانى جۇزەگە اسىرۋعا باعىتتالدى. ونىڭ 12-ءسى وسى جىلى تولىعىمەن اياقتالادى. بۇعان قوسىمشا, الداعى ءۇش جىلدىق بيۋدجەتتە ءتيىستى جۇمىستارعا 92 ملرد تەڭگە قاراستىرىلعان. سونىڭ ىشىندە رەسپۋبليكالىق بيۋدجەتتەن – 66 ملرد, جەرگىلىكتى بيۋدجەتتەن – 26 ملرد 2020 جىلى – 44,9 ملرد تەڭگە, 2021 جىلى – 28,4 ملرد تەڭگە, 2022 جىلى 18,9 ملرد تەڭگە ءبولۋ جوسپارلانىپ وتىر» دەدى ە.قيزاتوۆ.
اتقارىلعان جۇمىستارعا توقتالعان ول «يلينكا» تۇرعىن الابىندا جولدار مەن ينجەنەرلىك ينفراقۇرىلىم سالىنعانىن جەتكىزدى. بۇل جۇمىس ءۇشىنشى كەزەك بويىنشا جۇرگىزىلدى. اتاپ ايتقاندا, 10 شاقىرىم جولعا اسفالت توسەلىپ, 4 شاقىرىمنان استام كوللەكتورلىق كارىز جۇيەسى سالىندى. «وڭتۇستىك-شىعىس» اۋدانىنىڭ وڭ جاعىندا اباتتاندىرۋ جاسالدى.
«بۇل نىسان 10 جىلدان استام ۋاقىت قاراۋسىز قالعان ەدى. قاجەت جۇمىستار وسى جىلدىڭ ورتاسىندا قايتا جانداندىرىلىپ, جىل اياعىندا اياقتالدى. اباي داڭعىلىنان باستاپ, س.سەيفۋللين كوشەسىنە دەيىنگى ك.كۇمىسبەكوۆ كوشەسىن قايتا قۇرۋ جۇمىستارى ورىندالدى. بيىل «لينەينىي» ساياباعى, بوتانيكالىق باق, «جەرۇيىق» ساياباعىنداعى تەننيس ورتالىعى پايدالانۋعا بەرىلدى. بارشىن كوشەسى بويىمەن ينجەنەرلىك جەلىلەردى سالۋ اياقتالىپ كەلە جاتىر. بۇل جۇمىس ەلەكترەنەرگياسىمەن, سۋمەن, سۋ بۇرۋ جۇيەسىمەن 70 پاتەر مەن 200 كوتتەدجدى قامتاماسىز ەتۋگە مۇمكىندىك بەرەدى. نەگىزگى قۇرىلىس جۇمىستارى اياقتالدى. قازىر كولونكالاردى مونتاجداۋ ءجۇرىپ جاتىر» دەدى قالا اكىمىنىڭ ورىنباسارى.
بۇعان قوسا, الماتى جانە سارىارقا اۋداندارىندا سۋ قۇبىرى مەن كارىز جۇيەسىن جاڭعىرتۋ جالعاسىپ جاتىر.
