ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ جاس ءارتىسى, كينو جانە دۋبلياج اكتەرى, كومپوزيتور, «سەرپەر» جاستار وداعى سىيلىعىنىڭ لاۋرەاتى ولجاس جاقىپبەكتىڭ «جاستىعىم باردا…» دەپ اتالعان كونتسەرت-سپەكتاكلى ءوتتى.
بۇل ايتۋلى كەش بيىلعى جاستار جىلى اياسىندا ۇيىمداستىرىلىپ وتىر. كورەرمەندەر ولجاستى «تۋعان ەلدىڭ ءتۇتىنى» اتتى فيلمدەگى ۇنامدى ءرولى ارقىلى جاقسى بىلەدى.
ول تەمىربەك جۇرگەنوۆ اتىنداعى ونەر اكادەمياسىن تامامداعاننان كەيىن, 2012 جىلى باس قالاداعى قاللەكي تەاترىنا اكتەر بولىپ قابىلداندى. سودان بەرى وسى ونەر ورداسىنىڭ ساحناسىندا قويىلعان سپەكتاكلدەردە ۇلكەندى-كىشىلى رولدەردى ويناپ, جۇرتشىلىقتىڭ ىقىلاسىنا بولەندى. اسىرەسە, ونىڭ زاڭعار جازۋشى مۇحتار اۋەزوۆتىڭ «قورعانسىزدىڭ كۇنى» دراماسىنداعى باس كەيىپكەر – تۇنەكتى كەلىستى سومداعانى كورەرمەننىڭ ەسىنەن كەتە قويعان جوق. بۇل ءرولى ءۇشىن ول وتكەن جىلى ورتالىق ازيا ەلدەرىنىڭ VI حالىقارالىق فەستيۆالىندە «دەبيۋت» اتالىمىمەن ماراپاتتالدى. ولجاس – تەاترعا عانا ەمەس, كينوعا دا ەلەۋلى ۇلەس قوسىپ جۇرگەن اكتەر.
كەشتە دارىندى اكتەر جۇرتشىلىققا بويىنداعى بار ونەرىن ۇسىندى. تەاتردىڭ كامەرالىق وركەسترىنىڭ سۇيەمەلدەۋىمەن جاندى داۋىستا ءان سالىپ, ءتۇرلى مۋزىكالىق اسپاپتاردا وينادى. سومداعان رولدەرىنەن ءۇزىندى كورسەتتى. سونداي-اق ونىڭ ونەردەگى ارىپتەستەرى ايگۇل يمانباەۆا, اينۇر بەرمۇحامبەتوۆا, داستان ورازبەكوۆ, مارحابا ءسابي, ەردەن جاقسىبەك, اينۇر باباەۆا ولجاستىڭ جازعان اندەرىن ورىنداپ, كەلگەن قاۋىمعا كوركەم كوڭىل كۇي سىيلادى.
