توزىعى جەتكەن كولىكتەردى ۋتيليزاتسيالاۋ باعدارلاماسى بويىنشا ەلىمىزدەگى قابىلداۋ بەكەتتەرى ءار سەنبى سايىن اشىق ەسىك كۇنىن وتكىزەدى. بۇل تۋرالى «وكم وپەراتورى» جشس ءباسپاسوز قىزمەتى مالىمدەدى.
نەگىزىندە, كولىك وتكىزۋ ءۇشىن auto.recycle.kz سايتىنا كىرىپ, كەزەككە تۇرۋ قاجەت. بىراق سەنبى سايىن وتەتىن اشىق ەسىك كۇندەرىندە كولىك تاپسىرۋشى ازاماتتار كەزەككە تۇرماي-اق ءوز ايماعىنداعى قابىلداۋ بەكەتتەرىنە بارىپ, كولىگىن وتكىزە الادى. ەڭ باستىسى, كولىك قۇرالىن ەسەپتەن شىعارىپ, ءتيىستى قۇجاتتارىن اپارسا بولعانى. ال ەلەكتروندى جۇيەدە كەزەك الىپ قويعاندار كولىگىن بەلگىلەگەن ۋاقىتتا دا تاپسىرا بەرەدى.
اشىق ەسىك كۇنى ماۋسىم ايىنىڭ سوڭىنا دەيىن جالعاسادى. سونىمەن قاتار مامىر ايىنداعى مەرەكە كۇندەرىندە دە قابىلداۋ بەكەتتەرى دەمالىسسىز جۇمىس ىستەيدى.
باعدارلاما بويىنشا جەڭىل جانە قوعامدىق كولىك پەن جۇك كولىكتەرى قابىلدانادى. جەڭىل كولىكتەردى اقشالاي 150 مىڭ تەڭگەگە نەمەسە جاڭا كولىك ساتىپ الۋعا جەڭىلدىك بەرەتىن 315 مىڭ تەڭگەنىڭ سەرتيفيكاتىنا ايىرباستاۋعا بولادى. ال جۇك كولىكتەرى جەڭىلدىك سەرتيفيكاتى بويىنشا 550 مىڭنان 750 مىڭ تەڭگەگە دەيىن قابىلدانادى.
ەسكى كولىكتەر قاراعاندى وبلىسىنداعى زاۋىتقا جەتكىزىلەدى. ىستەن شىققان كولىك قۇرالدارى سول جەردە قايتا وڭدەلەدى. زاۋىت ىسكە قوسىلعاننان بەرى 70 مىڭعا جۋىق كولىك قايتا وڭدەلگەن.
توزىعى جەتكەن كولىك قۇرالدارىن قابىلداۋ باعدارلاماسىنىڭ باستى ماقساتى – وتاندىق پاركتى جاڭارتۋ, اۆتوكولىكتەردەن ەكولوگيانى بۇزاتىن ۋلى گاز كولەمىن ازايتۋ. سونداي-اق قازاقستاندىق ءاۆتووندىرىستى ىنتالاندىرىپ, قايتا وڭدەۋ سالاسىنىڭ ينفراقۇرىلىمىن قالىپتاستىرۋ.
ەسكى كولىكتەردى ۋتيليزاتسيالاۋ باعدارلاماسى ىسكە قوسىلعان 2016 جىلدان بۇگىنگە دەيىن ەل ازاماتتارى 94 مىڭنان اسا اۆتوكولىك تاپسىرىپتى. سونىڭ 4 مىڭعا جۋىعى – ەلوردالىق. ولارعا 11 ملرد تەڭگەگە جۋىق قاراجات تولەنگەن.
جالپى, ۋتيليزاتسيا باعدارلاماسىمەن كولىك تاپسىرۋدان ەلىمىز بويىنشا شىمكەنت قالاسى كوش باستاپ تۇرسا, ودان كەيىنگى ورىندا الماتى مەن قوستاناي قالالارى تۇر. ال نۇر-سۇلتان قالاسى 11 ورىنعا جايعاسىپتى. جىل باسىنان بەرى ەلوردالىقتار 150-گە جۋىق كولىك وتكىزىپتى.
