بەيبىتشىلىك جانە كەلىسىم سارايىندا مادەنيەت جانە سپورت مينيسترلىگىنىڭ قولداۋىمەن تاۋەلسىزدىكتىڭ 30 جىلدىعى اياسىندا جىر الىبى جامبىل جاباەۆتىڭ 175 جىلدىعىنا ارنالعان حالىقارالىق اقىندار فەستيۆالى ءوتتى. ايتىس اقىندارى, قازاق جىرشىلارى مەن انشىلەرى, قىرعىزستان جانە وزبەكستان ونەرپازدارى كەشتى ونەر مەرەكەسىنە اينالدىردى.
جامبىل جاباەۆ 1943 جىلى الماتىدا وتكەن رەسپۋبليكالىق اقىندار ايتىسىنا قاتىسۋشىلارعا «اقىندارعا ارناۋ» جىرىن ارناعان ەدى. فەستيۆالدى قازاقستاننىڭ مادەنيەت قايراتكەرى ەربولات شالدىبەكوۆ وسى ولەڭمەن اشتى. جىر الىبى «مەنىڭ ءپىرىم – ءسۇيىنباي, ءسوز باستامان سىيىنباي» دەسە, وسى كەشتە ونىڭ ۇستازى ءسۇيىنباي ارونۇلىنىڭ, ۇلى ابايدىڭ, جامبىل ءسوز قاعىستىرعان قىرعىز اقىنى توقتاعۇل ساتىلعانوۆتىڭ, ءبىرتۇتاس تۇركى دۇنيەسىنە ورتاق مۇرالار دا دارىپتەلدى. جالپى بۇل كەشتە جەر ءجانناتى – جەتىسۋدىڭ عانا ەمەس, التايدان اتىراۋعا دەيىنگى كەڭ-بايتاق دالامىزدىڭ ۇلى ونەرى ناسيحاتتالدى.
ەلوردا مەكتەپتەرىنىڭ وقۋشىلارى تەاترلاندىرىلعان كورىنىس كورسەتتى. جىرشىلار, قازاقستاننىڭ ەڭبەك سىڭىرگەن قايراتكەرلەرى الماس الماتوۆ پەن ۇلجان بايبوسىنوۆا سىر سۇلەيلەرىنىڭ جىرلارىن توكسە, مادەنيەت قايراتكەرى اماندىق كومەكوۆ سۇگىر بەگەندىكۇلىنىڭ سازىمەن كورەرمەندەردىڭ دەلەبەسىن قوزدىردى. اقىن, جىرشى, قازاقستاننىڭ ەڭبەك سىڭىرگەن قايراتكەرى بايانعالي ءالىمجانوۆ ارقالانىپ, «ماناس» جىرىنان ءۇزىندى ورىندادى.
قازاقستاننىڭ ەڭبەك سىڭىرگەن قايراتكەرلەرى رامازان ستامعازيەۆ پەن ەرلان رىسقالي, رەسپۋبليكالىق بايقاۋلاردىڭ لاۋرەاتتارى ايگەرىم نارتۇيە, بيبىگۇل ساۋىتوۆا, ەلبول قۋانبەك, ماقپال توقتاعان اسەم اندەردى اۋەلەتتى. دىنيسلامبەك جايلاۋباي مەن ايزات قارابەكوۆا جامبىل مەن ايكۇمىستىڭ ايتىسىنان كورىنىس كورسەتتى. وزبەكستاننان كەلگەن ءابدىنازار پويانوۆ «الپامىس» جىرىنان ءۇزىندىنى, قىرعىز اقىنى اقمادبەك سۇلتانۇلى ارناۋ ايتتى.
ايتىسقا كەزەك كەلگەندە بەكارىس شويبەكوۆ بوحتيار ارتيكوۆپەن (وزبەكستان), مۇحتار نيازوۆ اسىلبەك ماراتۇلىمەن (قىرعىزستان) ءسوز قاعىستىردى.
– تاۋەلسىز ەل ەكەنىمىزدى ءوزىمىزدىڭ ءتول ونەرىمىزبەن, ءداستۇرلى ونەرىمىزبەن كورسەتەمىز. جامبىل اتامىز: «ەلىڭنىڭ وسى مىنە جەتىلگەنى, ءۇي تىگىپ, ىرگە قالاپ بەكىنگەنى. ىنتىماق, دوستىعى مەن تاتۋلىعى سەكىلدى التىن تىرەۋ كوپىردەگى» دەگەن ولەڭ جولدارىمەن بۇگىنگى كۇنىمىزدى جىرلاپ كەتكەن سياقتى. «وزبەك – ءوز اعام» دەسەك, «قىرعىز – ءبىر تۋعان» دەيمىز. وسى كەشتە ءداستۇرلى ونەر قالىقتادى, شارىقتادى, – دەپ تۇيىندەدى فەستيۆالدى مادەنيەت جانە سپورت مينيسترلىگى مادەنيەت كوميتەتىنىڭ توراعاسى اقان ءابدۋالي.
بايان اسىلبەكوۆا
