جامبىلدىقتار جارمەڭكەسى

13-14 شىلدە كۇندەرى ەلوردادا جامبىل وبلىسىنىڭ اۋىل شارۋاشىلىعى ونىمدەرىنىڭ جارمەڭكەسى ءوتتى. وعان وبلىستىڭ 10 اۋدانى مەن تاراز قالاسىنىڭ 90-نان استام اۋىل شارۋاشىلىعى تاۋار وندىرۋشىلەرى قاتىستى. ازىق-تۇلىك كەرۋەنى 7 اۆتوكولىككە تيەلىپ جەتكىزىلدى.

جارمەڭكە قالا تۇرعىندارىنىڭ جۇمىستان قولى بوس دەمالىس كۇندەرى ارنايى ۇيىمداستىرىلىپ وتىر. بۇل قالا تۇرعىندارى مەن قوناقتارىنا بىرنەشە اپتاعا بۇرىن قولجەتىمدى باعامەن ونىمدەردى ساتىپ الۋعا مۇمكىندىك بەرەدى.
«قازاقستان» سپورت كەشەنى الاڭىندا وتكەن جارمەڭكەدە جامبىلدىق شارۋالار جالپى قۇنى 110,6 ملن تەڭگەنى قۇرايتىن 230,6 توننادان استام ءوز ونىمدەرىن ۇسىندى. ونىڭ ىشىندە 30 توننا ەت (جىلقى, سيىر, قوي جانە تاۋىق ەتى), 5 توننا شۇجىق, 19 توننا ءسۇت ونىمدەرى, 5 مىڭ دانا جۇمىرت­قا, 1,5 ­توننا كونديتەرلىك ونىمدەر مەن 2 توننا ماكارون ونىمدەرى, 15 توننا قانت, 0,5 توننا تۇز, 5 توننا بالىق, 6 توننا وسىمدىك مايى, 2,5 توننا بال, ­2 توننا كەپتىرىلگەن جەمىس جانە 142,1 توننا جەمىس-جيدەك پەن كوكونىس ونىمدەرى بار. ونىڭ ىشىندە قىرىققابات, قيار, ءسابىز, قىزاناق, جەمىستەر, بالىق, سارى ماي, ءسۇت, ءسۇت جانە قىشقىل ءسۇت ونىمدەرى, كوكونىس­تەر مەن پەچەنە, كامپيت, كۇرىش, ماكارون ونىمدەرى, نان جانە نان-توقاش ونىمدەرى جانە ت.ب.
– بۇل شارا باس قالانىڭ اينالاسىندا ازىق-تۇلىك بەلدەۋىن قۇرۋ, وڭىرارالىق ىنتىماقتاستىقتى دامىتۋ ماقساتىندا جۇزەگە اسىرىلىپ وتىر. جارمەڭكەدەگى تاۋاردىڭ باعالارى نارىق باعاسىنان 20%-عا تومەن. بۇل ەلوردا تۇرعىندارى مەن قوناقتارىنا ءونىمدى ­قولايلى باعامەن ساتىپ الۋعا مۇمكىندىك بەرەدى. جالپى, استانالىقتاردىڭ جامبىلدىق اۋىل شارۋاشىلىق ونىمدەرىنە دەگەن سۇرانىس جاقسى. سوندىقتان اكەلگەن تاۋارلارىمىز تۇگەل ءوتىپ كەتەدى ­دەگەن ۇمىتتەمىز, – دەدى جامبىل وبلىستىق اۋىل شارۋاشىلىق باسقارماسى باستىعىنىڭ ورىنباسارى قايرات امانوۆ.
بايزاق اۋدانىنان كەلگەن, 30 جىلداي بال اراسى شارۋا­شىلىعىمەن اينالىساتىن تىلەۋ­قۇل بالپانقۇلوۆتىڭ ايتۋىنشا, اتالعان ­جارمەڭكە جامبىلدىق ونىمدەردى, ونىڭ ىشىندە بال ونىمدەرىن ناسيحاتتاۋ ءۇشىن وتە قاجەتتى شارا بولماق. ول بازارعا 500 كەلى بال اكەلىپتى.
اۋىل شارۋاشىلىعى ونىمدەرىنەن بولەك, جارمەڭكە اۋماعىندا جامبىل ءوڭىرىنىڭ مادەنيەتى مەن ءداستۇرىن كورسەتەتىن كوركەمونەرپازداردىڭ قاتىسۋىمەن كونتسەرتتىك باعدارلاما كورسەتىلدى.
ءسويتىپ, وتكەن دەمالىس كۇندەرى قالا تۇرعىندارىن جادىراتتى. ولار جارمەڭكەدەن ارزانعا تاۋار الىپ, جامبىلدىقتاردىڭ ءان-كۇيىن تىڭداپ, كوتەرىڭكى كوڭىلمەن ۇيلەرىنە ورالدى.
ايتا كەتەيىك, جامبىل وبلىسى اگروونەركاسىپتىك كەشەنى دامىعان قۇنارلى ولكە بولىپ تابىلادى. جالپى وبلىس ەكونوميكاسىندا وندىرىلەتىن ونىمدەر كورسەتكىشىندە اۋىل شارۋا­شىلىعىنىڭ ۇلەسى 20,2 پايىزىن قۇرايدى.