كەشە استانا قالاسى ىشكى ساياسات باسقارماسى مەن ءبىلىم باسقارماسىنىڭ جانە ءىىد جەرگىلىكتى پوليتسيا قىزمەتى مەن سالاۋاتتى ءومىر سالتىن قالىپتاستىرۋ ورتالىعىنىڭ ۇيىمداستىرۋىمەن «حان شاتىر» ساۋدا-ويىن-ساۋىق ورتالىعىندا «ءومىر تاماشا» شاراسى ءوتتى.
ءارتۇرلى پسيحولوگيالىق جاعدايعا ۇشىراعان, كامەلەتكە تولماعان بالالارعا قۇقىقتىق كومەك كورسەتىپ, ورەندەردى بەلسەندىلىككە شاقىرىپ, جاسوسپىرىمدەر اراسىنداعى ءسۋيتسيدتى بولدىرماۋ ماقساتىندا وتكەن شاراعا ەلورداداعى بىرقاتار مەكتەپتەر مەن كوللەدجدەردەن 300-گە تارتا جانارلارى جايناعان جاستار قاتىستى. شارا بارىسىندا ونەرلى ورەندەر ءان شىرقاپ, مىڭ بۇرالا بي بيلەدى, توپ بولىپ فلەشموب وتكىزدى. ءان سالعانداردىڭ ءبىرى №30 مەكتەپتىڭ 9-سىنىپ وقۋشىسى ميراس باگاەۆ وسىنداي شارالار جاستاردىڭ ءورىسىنىڭ كەڭەيۋىنە, ولاردىڭ ءتۇزۋ جولدان تايماۋىنا سەپتىگى مول ەكەنىن ايتادى. ال شارانى ۇيىمداستىرۋشىلاردىڭ ءبىرى, استانا قالاسى
ءىىد جەرگىلىكتى پوليتسيا قىزمەتى يۋۆەنالدىق ءبولىمىنىڭ باستىعى سامال احمەت:
– وسىنداي شارالار ادەيى ادام كوپ جينالاتىن ورىنداردا ءداستۇرلى تۇردە وتكىزىلىپ تۇرادى. جىلدىڭ باسىندا دا «حان شاتىر»
ساۋدا-ويىن-ساۋىق ورتالىعىندا ءدال وسىنداي شارا وتكەن بولاتىن. الايدا باعدارلامالار ۇنەمى جاڭارتىلىپ تۇرادى, – دەيدى.
ساۋدا-ويىن-ساۋىق ورتالىعىنا كەلۋشىلەردىڭ كوپشىلىگى اتالمىش شارانى تاماشالاپ, قاتىسۋشىلاردىڭ ونەرىنە قيقۋلاپ, اتوي سالىپ تۇردى. ۇراندى جازۋلار مەن كۇلكىلى سمايليكتەرمەن كومكەرىلگەن پلاكاتتاردى ۇستاعان جاسوسپىرىمدەر زامانداستارىن لايىم كوڭىلدى جۇرۋگە شاقىردى.
نۇرداۋلەت كاكىشەۆ
