ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ جاڭا ءححىح ماۋسىمى قالىپتاسقان داستۇرگە ساي قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ ساحنالاعان مۇحتار اۋەزوۆتىڭ «اباي» تراگەدياسىمەن اشىلدى. سپەكتاكلدى تاماشالاۋعا ارنايى كەلگەن نۇر-سۇلتان قالاسى اكىمىنىڭ ورىنباسارى باقتيار ماكەن تەاتر ۇجىمىنا قالا باسشىسى التاي كولگىنوۆتىڭ قۇتتىقتاۋ حاتىن وقىپ بەردى.
«ونەر – ۇلتتىڭ جانى» دەيدى حالىق دانالىعى. كەز كەلگەن ۇلت ونەرىمەن, مادەنيەتىمەن تانىلىپ, باعالاناتىنى انىق. دەمەك, سىزدەر, ءوز ونەرلەرىڭىزبەن ەلدىڭ رۋحىن كوتەرىپ, ادامزات بالاسىنا شەكسىز قۋانىش, زور ماقتانىش سىيلايسىزدار. جىل سايىن تەاتر ماۋسىمىنىڭ اشىلۋى ساحنا ونەرىندە ەرەكشە كەزەڭ بولىپ سانالادى. ايتۋلى مەرەكە كۇنى تەاتر سالاسىنىڭ بارشا وكىلدەرىنە ەل مادەنيەتىنىڭ ودان ءارى قوسقان زور ۇلەستەرىڭىز ءۇشىن شىنايى ريزاشىلىعىمدى بىلدىرەمىن. بارىڭىزگە دەنساۋلىق, وتباسىلارىڭىزعا اماندىق, باق-بەرەكە تىلەيمىن! مەملەكەت يگىلىگى ءۇشىن ەڭبەك ەتىپ, جاڭا شىعارماشىلىق جەتىستىكتەرگە جەتە بەرىڭىزدەر!» دەلىنگەن اكىمنىڭ قۇتتىقتاۋىندا.
ءوز تاراپىنان كەلەسى جىلى ۇلى ابايدىڭ 175 جىلدىعى, ءال-ءفارابيدىڭ 1150 جىلدىق مەرەيتويى اتاپ وتىلەتىنىن ەسكە سالعان قالا باسشىسىنىڭ ورىنباسارى بۇل ەل ءۇشىن ەرەكشە وقيعالار ەكەنىن ايتىپ, بۇعان تەاتر ۇجىمى دا بەلسەندى اتسالىساتىنىنا سەنىم ءبىلدىرىپ, ۇجىمعا تابىس تىلەدى.
الداعى جىل قاللەكيلىكتەر ءۇشىن دە ايرىقشا بولماق. بۇيىرسا, ولار مەرەيتويلىق ححح ماۋسىمدى جاڭا كەڭ, اسەم عيماراتتا قارسى الماق. تەاتردىڭ قۇرىلىسى قازىر قارقىندى ءجۇرىپ جاتىر. قاللەكي تەاترىنىڭ كوركەمدىك جەتەكشىسى, قازاقستاننىڭ حالىق ءارتىسى تالعات تەمەنوۆتىڭ ايتۋىنشا, 2020 جىلدىڭ شىلدە ايىندا ەلوردا كۇنىنە وراي ءدال وسى «اباي» تراگەدياسى جاڭا عيماراتتا قويىلماق. بۇعان قوسا, «ۇلتتىق تەاتر» مارتەبەسىن الۋدى, جاڭا تەاتر اۋلاسىنا 20 ساحنا ساڭلاعىنىڭ ەڭسەلى ەسكەرتكىشتەرىن قويۋدى جوسپارلاپ وتىر. سونىڭ ىشىندە مۇحتار اۋەزوۆ, عابيت مۇسىرەپوۆ, ەلۋباي ومىرزاقوۆ, ءسابيرا مايقانوۆا, قاديشا بوكەەۆا, ت.ب. مايتالماندار تاستۇعىرعا قوندىرىلماق.
ال تەاتردىڭ جاڭادان تاعايىندالعان ديرەكتورى, قازاقستاننىڭ ەڭبەك سىڭىرگەن قايراتكەرى, ونەرتانۋ PhD دوكتورى, پروفەسسور اسحات ماەميروۆ قازىرگى تاڭدا ونەر ۇجىمى رەپەرتۋارىندا 38 سپەكتاكل بارىن, الدا رەپەرتۋارلىق ساياسات قارالاتىنىن ايتادى. ول جاڭا عيماراتتا وزىق تۋىندىلار عانا قويىلۋ كەرەك دەپ ەسەپتەيدى.
