10 قازاندا ەلورداداعى تاۋەلسىزدىك سارايىندا «اقىلدى قالالار – اقىلدى دەستيناتسيالار» اتتى VIII جاھاندىق سامميتىنە وراي ءباسپاسوز ءماسليحاتى وتكىزىلدى. ءسامميتتىڭ نەگىزگى ۇيىمداستىرۋشىلارى – نۇر-سۇلتان قالاسىنىڭ اكىمدىگى جانە بۇۇ UNWTO دۇنيەجۇزىلىك تۋريستىك ۇيىمى.
قازاقستان ءۇشىن تۋريزم تەك ەكونوميكانى العا سۇيرەۋشى كۇش قانا ەمەس, سونىمەن بىرگە الەمگە ەلىمىزدى زاماناۋي جانە جوعارى دامىعان مەملەكەت رەتىندە تانىتۋعا مۇمكىندىك بەرەدى. سول سەبەپتى رەسپۋبليكادا بۇعان دەيىن الەمدىك دەڭگەيدەگى ءبىرتالاي كونفەرەنتسيالار مەن سامميتتەر وتكىزىلگەن بولاتىن. اتالعان شارالار قازاق دالاسىنا تۋريستەر نازارىن اۋدارتتى.
سامميتتە «اقىلدى» قالالاردى دامىتۋ ارقىلى شاھاردىڭ كوكەيكەستى ماسەلەلەرىن شەشۋ, قالانى باسقارۋ, تۇراقتى دامۋ, يننوۆاتسيالار مەن وزىق تەحنولوگيالاردى ەنگىزۋ جولدارى اڭگىمە وزەگىنە اينالادى.
– قالالىق ءتۋريزمدى دامىتۋ جونىندەگى 8-جاھاندىق ءسامميتتى نۇر-سۇلتان قالاسىندا وتكىزۋ – ءبىز ءۇشىن مارتەبە. استانامىز «اقىلدى» قالالار جۇيەسىنە ەندى. ءبىز بۇل شاراعا كوپتەن دايىندالدىق, ونىڭ ەل دامۋى ءۇشىن ماڭىزى وراسان. اتالعان شاراعا قاتىسۋعا 80 ەلدەن 1300-دەن استام مەيمان كەلدى. شارا بارىسىندا «اقىلدى» قالالاردىڭ ارتىقشىلىعى مەن پروبلەمالارى ەگجەي-تەگجەيلى تالقىلاناتىن بولادى, – دەپ باستادى ءسوزىن نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمىرزاەۆ ءباسپاسوز ءماسليحاتىندا.
بۇگىندە كوپتەگەن مەملەكەتتەر «اقىلدى» قالاعا اينالۋعا كوپ كۇش سالىپ وتىر. سەبەبى «اقىلدى» قالا ارقىلى ەكولوگيالىق ينفراقۇرىلىمدى جەتىلدىرۋگە, قىلمىس دەڭگەيىن ازايتۋعا, قالا تۇرعىندارى مەن ەلگە كەلەتىن تۋريستەردىڭ ءومىرى مەن قاۋىپسىزدىگىن قامتاماسىز ەتۋگە قول جەتكىزۋ مۇمكىندىگى مول.
– قالانى دامىتۋ – مەملەكەتتى دامىتۋ. ول بۇكىل الەمدى دامىتۋعا جەتەلەيدى. بۇل دەگەن – تۇراقتىلىق. «اقىلدى» قالاعا اينالۋ ارقىلى جەر-جاھانداعى تۇراقتىلىققا قول جەتكىزۋگە بولادى, – دەدى UNWTO دۇنيەجۇزىلىك تۋريستىك ۇيىمنىڭ تۋريزم نارىعىن جانە باسەكەگە قابىلەتتىلىگىن تالداۋ ورگانىنىڭ باسشىسى مs. Sandra Carvao.
سامميت شەڭبەرىندە, سونىمەن بىرگە, UNWTO اكادەمياسى مەن حالىقارالىق كونگرەستەر جانە كونفەرەنتسيالار (ICCA) قاۋىمداستىعىنىڭ مۇرىندىق بولۋىمەن قالا ءتۋريزمى يندۋسترياسى بويىنشا شەبەرلىك ساعاتتارى وتكىزىلەدى.
– مۇنداي سامميت ورتا ازيا اۋماعىندا العاش رەت وتكىزىلىپ وتىر. ونىڭ ۇيىمداستىرۋشىلارىنىڭ قاتارىندا بولۋ – ءبىز ءۇشىن مارتەبە. نۇر-سۇلتان قالاسى ينفراقۇرىلىمدىق جەتىستىگى جاعىنان سامميت وتكىزۋگە ابدەن لايىق دەپ تانىلدى, – دەدى «استانا كونۆەنشن بيۋرو» ديرەكتورىنىڭ ورىنباسارى Helena Mahuas.
تۋريستەردى كوپتەپ تارتۋ ماقساتىندا ەلوردادا جاقىن بولاشاقتا Disneyland ويىن-ساۋىق پاركىن سالۋ مۇمكىندىگى قاراستىرىلىپ جاتقانىن ەرلان بەكمىرزاەۆ ءمالىم ەتتى.
– Disneyland قۇرىلىسى ءۇشىن جەر تەلىمىن قاراستىرىپ جاتىرمىز. ونى ينفراقۇرىلىممەن, سۋمەن جانە ەلەكتر قۋاتىمەن جابدىقتاۋ قاجەت. جاقىن ارادا جەر ۋچاسكەسىن جانە ينۆەستوردى انىقتايمىز. دەگەنمەن Disneyland سالعاننان كەيىن ول ءوز قاراجاتىن اقتايتىن بولۋى كەرەك. استانانىڭ كليماتى قىزىلورداداعىداي ەمەس. ويىن-ساۋىق ورداسى جىل ون ەكى اي جۇمىس ىستەپ تۇرۋى ءتيىس. سوندىقتان ونى جابىق پارك رەتىندە سالۋدى ويلاستىرعان ءجون, – دەدى باسقارما باسشىسى.
رەسمي دەرەك بويىنشا ءار تۋريست ورتاشا ەسەپپەن العاندا ەلوردادا 1,5 تاۋلىك كىدىرەدى ەكەن. ولاردىڭ ءار كۇنى ەلگە 100 دوللار تابىس اكەلەدى. قازىرگى كۇنى «بوزوق» تاريحي-مادەني مۇرا جوباسىن ازىرلەۋ ارقىلى تۋريستەر 3 تاۋلىككە دەيىن كىدىرتۋ جايى ويلاستىرىلعان.
ءسوزىمىزدى تۇيىندەر بولساق, قازاقستاننىڭ استاناسى Global Destination Cities Index رەيتينگى بويىنشا 197-ورىندى يەلەنگەن. كەيىنگى 10 جىلدا نۇر-سۇلتانعا كەلەتىن شەتەلدىك مەيمانداردىڭ سانى 11,7 پايىزعا ارتىپ, 2018 جىلى ول 200 مىڭ ادامدى قۇراعان.
