جاستار لاگەردە ءجۇر
استانا قالاسى قازاقستان حالقى اسسامبلەياسىنىڭ ۇيىمداستىرۋىمەن باس قالا جاستارى «جاستار جولى» جاستار لاگەرىنە بارىپ, دەمالىپ قايتتى. بۋراباي اۋدانى قاتاركول اۋىلىنىڭ ماڭىندا ورنالاسقان «Greenwood» دەمالىس بازاسىندا وتكەن ەكى كۇندىك شارا بارىسىندا ويىن-ساۋىق جانە تانىمدىق باعدارلاما ۇسىنىلدى.
كوشباسشىلىق داعدىلاردى, كاسىبي قۇزىرەتتىلىكتەردى جانە باسقا دا ماڭىزدى داعدىلاردى دامىتۋعا باعىتتالعان ترەنينگتەر مەن دارىستەر بارىسىندا ارنايى شاقىرىلعان ساراپشىلار ماقسات جاقاۋوۆ, جاندوس كارىنباەۆ جانە باۋىرجان ايتكارىموۆ قۇندى ءارى پايدالى اقپاراتپەن ءبولىستى. قاتىسۋشىلار ءوزارا ءان بايقاۋىندا ءوز باقتارىن سىناپ, ۆوكالدىق ونەرلەرىن كورسەتتى. جەڭىمپازدار اقشالاي سىيلىقتارمەن ماراپاتتالدى.
بوس ۋاقىتتارىندا جاستار ءبىر-بىرىمەن اڭگىمە-دۇكەن قۇرىپ, باسسەيندە ءجۇزىپ, ورماندا سەرۋەندەدى. كۇن باتقاسىن قاتىسۋشىلار الاۋدىڭ جانىندا جينالىپ, گيتارامەن سۇيىكتى اندەرىن شىرقادى. بۋرابايداعى تاريح پەن سىرعا تولى ابىلاي حان الاڭىندا سەرۋەندەدى. قاتىسۋشىلار ۇيىمداستىرۋشىلارعا تاعىلىمى مول شارا ءۇشىن العىسىن جەتكىزىپ, ەرەكشە اسەر مەن جاعىمدى ەموتسيالار العانىن اتاپ ءوتتى.