ءبىر جىلدان بەرى قىزۋ تالقىلانىپ, ءار بابى, ءار بولىگى زەردەلەنگەن «ادۆوكاتتىق قىزمەت جانە قۇقىقتىق كومەك كورسەتۋ» تۋرالى زاڭ جوباسىنا جۋىردا عانا قول قويىلدى. ارينە, اتالمىش زاڭ اياسىندا ادۆوكاتتار قوعامداستىعى تاراپىنان كەيبىر تۇستارىنا كەلىسپەۋشىلىكتەر كوپ بولدى.
كەيبىر ارىپتەستەر زاڭ جوباسىن تالقىلاۋ بارىسىندا «كەي ىستەرگە ادۆوكاتتىق قۇپيا دەگەن ۇعىم «جۇرمەيدى», سوندىقتان ەگەر جوبا وسىلاي قابىلدانسا, ادۆوكات كليەنتىنە قارسى كۋالىك ەتۋگە مىندەتتى بولادى» دەگەن پىكىرلەر ءبىلدىردى. ياعني, جوبانىڭ 38-بابىندا «قازاقستان رەسپۋبليكاسىنىڭ «قىلمىستىق جولمەن الىنعان كىرىستەردى زاڭداستىرۋ (جىلىستاتۋ) جانە تەرروريزمدى قارجىلاندىرۋعا قارسى ءىس-قيمىل تۋرالى» زاڭعا سايكەس, قارجى مونيتورينگى جونىندەگى قۇزىرلى ورگانعا مالىمەتتەر مەن اقپاراتتار بەرۋ ادۆوكاتتىق قۇپيانى جاريا ەتۋ بولىپ سانالمايدى» دەپ جازىلعان.
بىرقاتار ادۆوكاتتاردى ءتارتىپتىك كوميسسيالاردىڭ جاڭا قۇرامىن ەنگىزۋ جوسپارى دا الاڭداتتى. جوبادا ادۆوكاتتاردىڭ ارەكەتىنە الگى كوميسسيالاردا ازشىلىق بولاتىن ارىپتەستەرى عانا ەمەس, ەندى سۋديالار دا, ادىلەت مينيسترلىگىنىڭ وكىلدەرى دە باعا بەرەدى دەپ جازىلعان.
سونىمەن قاتار, جەرگىلىكتى ادۆوكاتتار القالارىنىڭ توراعالارىن الاڭداتقان جايتتىڭ ءبىرى- ادۆوكاتتاردىڭ القاعا مۇشە بولۋ ءۇشىن تولەيتىن كىرىس جارناسىن الىپ تاستاۋ بولدى. بۇرىنعى زاڭنىڭ تالاپتارى بويىنشا كەز-كەلگەن ادۆوكاتتىق قىزمەتپەن اينالىسقىسى كەلەتىن زاڭگەر الدىمەن بىلىكتىلىك ەمتيxانىنان ءوتىپ, القادا 6 اي تاعلىمدامادان ءوتۋى ءتيىس. تاعلىمدامادان ءوتۋ – اقىلى. تاعلىمداما اياقتالعان سوڭ, كوميسسيانىڭ وڭ باعاسىن السا, سول قورىتىندىمەن ادىلەت مينيسترلىگىنە بارىپ, ادۆوكاتتىق قىزمەتپەن اينالىسۋعا قۇقىق بەرەتىن ليتسەنزيانى الىپ, القاعا مۇشەلىككە ءوتۋ ءۇشىن
840 000 تەڭگە مۇشەلىك جارنا تولەۋ كەرەك. اي سايىنعى جارنا تاعى بار. ال قازىرگى قابىلدانىپ وتىرعان جاڭا زاڭدا ول جاعدايلار تۇگەل الىنىپ تاستالعان. ياعني, بىلىكتىلىك ەمتيxانىن تاپسىرىپ, ادۆوكات بولعىسى كەلەتىن زاڭگەر ازاماتتار القاعا كىرۋ ءۇشىن مۇشەلىك جارنا تولەمەيدى. تەگىن كىرەدى.
بۇرىنعى ادۆوكاتتىق قىزمەت تۋرالى زاڭ ەرەجەسى بويىنشا تارتىپتىك كوميسسيا قۇرامى ادۆوكاتتاردىڭ وزدەرىنەن عانا تۇزىلەدى. سۋديا نەمەسە پوليتسيا ۇستىمىزدەن شاعىم جازسا, ادۆوكاتتار ارىپتەسىنىڭ ارەكەتىنەن ەشقانداي زاڭ بۇزۋشىلىق تاپپاي, جازا قولدانۋدان باس تارتاتىن جاعدايلار بىزدە ءجيى بولادى. جاڭا زاڭ تارتىبىمەن تارتىپتىك كوميسسيا التى ادامنان – ەكى سۋديا, ەكى ادىلەت مينيسترلىگى وكىلى جانە ەكى ادۆوكاتتان قۇرىلادى. «ءتورت ادامنىڭ داۋىسىنا ەكى ادامنىڭ داۋىسى قارسى بولادى, ال سۋديالار مەن ادىلەت مينيسترلىگىنىڭ وكىلدەرى ۇنەمى بىرگە بولادى. سوندىقتان تەرگەۋشى نەمەسە سوتتىڭ ارەكەتىنە قارسى شىققان قولايسىز ادۆوكاتتار تەز ارادا ليتسەنزياسىنان ايىرىلادى» دەپ جاڭا زاڭنىڭ وسى پۋنكتتەرىنە قارسى بولعان ارىپتەستەر دە بولدى. مەن بۇرىنعى سوت سالاسىنىڭ وكىلى, بۇرىنعى سۋديا رەتىندە بۇل پىكىردى قولدامايمىن. سۋديالار وزىنە قارسى شىققان ادۆوكاتتاردى ليتسەنزياسىنان ايىرۋدى ماقسات تۇتىپ العان دەپ ايتا الماس ەدىم. ءيا, ىستەردى قاراۋ بارىسىندا, پروتسەسس بارىسىندا سۋديا مەن قورعاۋشىنىڭ پىكىرلەرى بىردەي بولا بەرمەيدى. سوتتى دا اقتامايمىن. بەس ساۋساق بىردەي ەمەس. سۋديالار دا ەت پەن سۇيەكتەن جاراتىلعان پەندە بولعاسىن, ولاردىڭ ىشىندە الاسى دا, قۇلاسى دا بار. سول سياقتى بارلىق ادۆوكاتتار دا بىردەي ەمەس. حالىقتىڭ مۇڭ-مۇقتاجىن ءوز مۇددەسىنەن جوعارى قويىپ, قۇقىعى تاپتالىپ جاتقان قاراپايىم قورعانسىز ادامداردى جانىن سالا قورعايتىن, ءوز ىسىنە بەرىلگەن ادۆوكاتتار دا بار. كەرىسىنشە, قايتسەم پايدا كورەم, قايتسەم كوبىرەك اقشا الىپ قالام دەپ, ونسىز دا باسىنا سىناق ءتۇسىپ, سارساڭ بولعان ازاماتتاردى الداپ, ارباپ, سوڭعى تيىنىنا دەيىن ساناپ الىپ, تۇك بىتىرمەيتىن ارىپتەستەر دە جوق ەمەس, وكىنىشكە وراي. ارينە, سوندىقتان ادۆوكاتتارعا جاڭا زاڭنىڭ سونداي ارەكەتتەرگە توسقاۋىل قويعان تۇستارى ۇناماۋى-زاڭدىلىق.
دەسە دە, ءبىر جىلعا جۋىق قىزۋ تالقىلانعان زاڭ قابىلداندى. جارنا تولەنبەيتىن بولدى. بۇل ادۆوكاتتار ءۇشىن جاعىمدى جاڭالىق. ادۆوكاتتىق القاعا مۇشە بولعىسى كەلەتىن, بىراق كىرىس جارناسىن تولەۋگە قاراجات جوق, ىنتالى, ءبىلىمدى جاستار وتە كوپ. سونداي جاندارعا جول اشىلۋ كەرەك, كاسىبي شىڭدالۋىنا مۇمكىندىك بەرىلگەن ءجون. وسى تۇرعىدان العاندا, قابىلدانعان جاڭا زاڭنىڭ ۇتىمدى تۇستارى كوپ.
ەرتەرەكتە ادۆوكاتتاردىڭ ءبارى – كليەنت پەن سۋديا, پروكۋروردىڭ ورتاسىندا جۇرەتىن دەلدالدار دەگەن پىكىر بولعان. بىراق ءوز ىسىنە ادال ادۆوكاتتار بار ەكەنىن, ادۆوكاتتاردىڭ كوپ نارسەگە قول جەتىكىزە الاتىنىن دالەلدەپ جۇرگەن بىلىكتى ارىپتەستەرىمىز جەتكىلىكتى. قازىر حالىقتىڭ سەنىمى ويانىپ, ادۆوكاتۋرانىڭ بەدەلى ءوستى. ادۆوكاتتار سوت قاتەلىكتەرى, تەرگەۋ قاتەلىكتەرى تۋرالى اشىق ايتا الادى. بۇرىنعىداي ەمەس قازىر ادۆوكاتتاردىڭ بەدەلى كۇننەن-كۇنگە ارتىپ كەلەدى. ادۆوكاتۋرا سالاسى بۇرىنعى سۋديالارمەن, پروكۋراتۋرا, تەرگەۋ قىزمەتكەرلەرىمەن تولىعىپ كەلەدى. اتالعان سالالار ءبىر-بىرىمەن تىعىز بايلانىستى. ول سالانى جەتىك بىلەتىن مامانداردىڭ ادۆوكاتۋرا سالاسىنا كەلۋى – جان-جاقتى كاسىبي دامۋعا ۇلكەن ىقپالىن تيگىزەرى ءسوزسىز.
ءلاززات احاتوۆا,
استانا قالالىق
ادۆوكاتتار القاسىنىڭ مۇشەسى
