استانانىڭ «بارىس» حوككەي كلۋبى ماۋسىم باستالاردان الدىن كوپشىلىككە جاڭارعان قۇرامىن رەسمي تۇردە تانىستىردى.
جينالعان قاۋىم كلۋب پرەزيدەنتى بوريس يۆانيششەۆتى, جاڭا تاعايىندالعان باس باپكەر اندرەي سكابەلكانى جانە اراعا جىل سالىپ قايتا ورالعان كوماندا كوشباسشىسى برەندون بوچەنسكيدى زور قوشەمەت كورسەتىپ قارسى الدى.
سونىمەن قاتار, قاقپاشى دومينكا گراحوۆين, شابۋىلشىلار كەرتيس ۆولك, اندرە پەتەرسسون جانە پاتريس كورمە سەكىلدى كوماندا ساپىنا ەندى قوسىلعان ويىنشىلاردى تانىستىردى.
– الداعى ماۋسىمدا جانكۇيەرلەردىڭ قالىڭ قولداۋىن كۇتەمىز. جاقسى ويىن كورسەتۋگە تىرىسامىز. كوماندا قايتا جاساقتالىپ جاتىر, جاڭا قۇرام دەۋگە دە بولادى. بىلتىر جىبەرگەن شايبالار بويىنشا 25-ورىندا بولدى. سوندىقتان قورعانىسقا قاتتى كوڭىل ءبولۋ كەرەكتىگى تۇسىنىكتى, – دەيدى اندرەي سكابەلكا.
«بارىس» ماۋسىماشار ماتچىن 9 تامىز كۇنى قر پرەزيدەنتى كۋبوگى اياسىندا حاباروۆسكتىڭ «امۋر» كومانداسىنا قارسى وتكىزەدى.
