«استانا قالاسىنىڭ اكىمى ادىلبەك جاقسىبەكوۆ «Smart Astana» تۇجىرىمداماسى اياسىندا جاڭا جوبالاردى ىسكە قوستى» دەپ حابارلايدى قالا اكىمىنىڭ ءباسپاسوز قىزمەتى. ەلوردا باسشىسى «Smart ەمحانا», «Smart مەكتەپ», «Smart كوشەلەردى جارىقتاندىرۋ», «Smart payments» جوبالارىمەن, سونداي-اق, قالالىق اكىمدىكتىڭ ينتەللەكتۋالدى بايلانىس ورتالىعىنىڭ جۇمىسىمەن تانىستى.
سمارت-سەرۆيس اياسىندا دارىگەرگە ونلاين جازىلۋ جۇيەسى, تەرمينال ارقىلى ەمحاناعا قابىلداۋعا جازىلۋ, سونداي-اق, دارىگەرلەر مەن تىركەۋ قىزمەتىنىڭ اۆتوماتتاندىرىلعان جۇمىس ورىندارىن ىسكە قوسۋ قاراستىرىلعان. وسىعان وراي, №4 قالالىق ەمحانادا «Smart ەمحانا» جوباسى ىسكە اسىرىلا باستادى.
«Smart مەكتەپ» جوباسى №3 جانە №15 مەكتەپتەردە قولعا الىندى. سول ارقىلى «ە-اسحانا», «e-كىتاپحانا», بەينەباقىلاۋ جۇيەسى ەنگىزىلەدى.
اكىم «smart.astana.kz» پورتالىندا كوممۋنالدىق تولەمدەر جاساۋدىڭ جاڭا مەحانيزمىن قامتاماسىز ەتەتىن «Smart payments» جوباسىمەن دە تانىستى. بۇل جوبادا سۋ, گاز, كوممۋنالدىق قالدىقتاردى شىعارۋ, ەلەكتر قۋاتى, تەلەكوممۋنيكاتسيالار ءۇشىن ءبىر مەزگىلدە اقى تولەۋگە بولادى.
تاعى ءبىر «Smart كوشەلەردى جارىقتاندىرۋ» «اقىلدى» جوباسى استانا قالاسى ەسىل اۋدانىنىڭ ەڭبەكشىلەر كوشەسىندە جۇزەگە اسىرىلدى. جوبا اياسىندا ەسكى LED شامدارىن جاڭالارىنا اۋىستىرۋ, سول ارقىلى كوشەلەردى جارىقتاندىرۋدى, كوشە شامدارىن باقىلاۋدى جەتىلدىرۋ كوزدەلىپ وتىر. سونداي-اق, بۇل كوشەنى جارىقتاندىرۋدى اۆتوماتتاندىرۋدىڭ دا جۇيەسى بولىپ تابىلادى.
قالا باسشىسى اكىمدىك قىزمەتىنىڭ ساپاسىن ارتتىرۋعا باعىتتالعان قالا اكىمدىگىنىڭ ينتەللەكتۋالدى بايلانىس ورتالىعىنىڭ جۇمىسىمەن دە تانىستى.
كورسەتىلگەن بارلىق جوبالاردى ىسكە قوسا تۇرىپ, ادىلبەك جاقسىبەكوۆ مۇنىڭ ەلوردالىقتار ءۇشىن قانشالىقتى ماڭىزدىلىعىنا توقتالدى. ولاردى كۇندەلىكتى ومىردە جان-جاقتى پايدالانۋ قاجەتتىلىگىن ايتتى.
