كەشە وڭتۇستىك كورەيا ەلىنىڭ كۆاندجوۋ قالاسىندا وتكەن ءححVIIى دۇنيەجۇزىلىك جازعى ۋنيۆەرسيادا سالتاناتتى تۇردە جابىلدى. الەمنىڭ 146 مەملەكەتىنەن كەلگەن 12 986 ستۋدەنت سپورتتىڭ 21 تۇرىنەن 272 مەدالدار جيىنتىعىن ساراپقا سالدى. ەلىمىزدىڭ ەنشىسىندە – 6 التىن جانە 4 قولا جۇلدە. وسى كورسەتكىشپەن سپورتشىلارىمىز كوماندالىق ەسەپتە 10-ورىندى يەلەندى.
بۇل – دۇنيەجۇزىلىك ۋنيۆەرسيادا تاريحىنداعى قازاقستاننىڭ ەڭ ۇزدىك ناتيجەسى. وسىعان دەيىنگى ۇزدىك كورسەتكىش 2007 جىلى بانگكوك قالاسىندا تىركەلدى. ول ۋاقىتتا جەرلەستەرىمىز 5 التىن مەدال الىپ, كوماندالىق ەسەپتە 11-ورىنعا تۇراقتاعان ەدى.
سونىمەن, جاھاننىڭ ساڭلاق ستۋدەنتتەرى باق سىناعان ۋنيۆەرسيادادا قازاقستان قورجىنىنا العاشقى التىندى 2014 جىلعى ازيا ويىندارىنىڭ ءۇش دۇركىن چەمپيونى, ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى دميتري بالاندين سالدى. ول ءجۇزۋدىڭ 100 م براسس تۇرىنەن التىن, ال 50 م قاشىقتىقتان قولا مەدال الدى. دميتري بۇل جولى ءوزىنىڭ تەك ازيانىڭ عانا ەمەس, الەمنىڭ ۇزدىك جۇزۋشىلەرىنىڭ ءبىرى ەكەنىن دالەلدەدى.
وسى ۋنيۆەرسيتەتتىڭ ستۋدەنتى ۆيكتوريا زيابكينا جەڭىل اتلەتيكادان 100 م جانە 200 م جۇگىرۋدەن قوس التىنعا قول جەتكىزدى. ونىمەن توقتاماي 4ح100 م جۇگىرۋدەن يۋليا راحمانوۆا, سۆەتلانا يۆانچۋكوۆا, اناستاسيا تۋلاپينا سىندى جۇيرىكتەرمەن بىرگە تاعى ءبىر التىن مەدال يەلەندى.
تاەكۆاندو جارىسىندا 58 كگ سالماقتا م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتى نۇرسۇلتان ماماەۆ التىن الدى. سونداي-اق, جەڭىل اتلەتيكادان 5,50 م بيىكتىككە سەكىرۋدەن قازۇۋ ستۋدەنتى نيكيتا فيليپپوۆ التىن جۇلدەمىزدى ەسەلەدى.
ەرەكشە اتاپ وتكەن ءجون, 6 التىن مەدالدىڭ بەسەۋىن ءال-فارابي اتىنداعى قازۇۋ ستۋدەنتتەرى جەڭىپ الدى.
