كەشە نۇر-سۇلتان قالاسىنداعى ەپيدەميولوگيالىق جاعدايعا بايلانىستى اكىمدىكتىڭ ءباسپاسوز ماسليحاتىندا باس سانيتارلىق دارىگەر جاننا پىراليەۆا بايانداما جاسادى.
قازىرگى ۋاقىتقا دەيىن قالادا ۆيرۋس جۇقتىرعان 17972 جاعداي تىركەلدى. ونىڭ ىشىندە 16465 ناۋقاس نەمەسە 92 پايىزى ەمدەلىپ شىقتى. 1151 ادام ستاتسيونارلىق جانە امبۋلاتوريالىق ەمدەۋ قابىلداپ جاتىر. بۇگىنگە دەيىن 359 ادام (1,9 پايىز) وسى ينفەكتسيادان قايتىس بولدى. تاۋلىگىنە بارلىعى 3712 زەرتتەۋ جۇرگىزىلگەن. «كارانتيندىك شەكتەۋ شارالارىنىڭ ناتيجەسىندە اۋرۋشاڭدىقتىڭ تومەندەۋى بايقالدى. وسىنىڭ ارقاسىندا قالا «جاسىل» ايماققا اۋىستى. دەگەنمەن 22 جەلتوقساننان باستاپ «سارى» ايماققا قايتا كوشتى. قازىرگى ۋاقىتتا ەلوردا «سارى» ايماقتا تۇر» دەدى جاننا پىراليەۆا.
سونداي-اق باس سانيتارلىق دارىگەردىڭ قاۋلىسىنا سايكەس, جاڭا جىلدىق ەرتەڭگىلىكتەرگە, كورپوراتيۆتەرگە جانە تويلاۋعا ارنالعان باسقا دا مەرەكەلىك ءىس-شارالارعا تىيىم سالىنادى. ءموبيلدى توپتار كۇشەيتىلگەن رەجيمدە سانيتارلىق نورمالاردىڭ ساقتالۋىن باقىلايتىن رەيدتەر جۇرگىزۋدى جالعاستىراتىن بولادى. ءتارتىپ بۇزۋشىلار جاۋاپقا تارتىلادى. بريفينگتە جاننا پىراليەۆا قالا تۇرعىندارىن جاڭا جىلدى ۇيدە قارسى الۋعا جانە سانيتارلىق قاۋىپسىزدىك شارالارىن ۇمىتپاۋعا شاقىردى.
سونىمەن قاتار باس سانيتارلىق دارىگەر بيزنەستىڭ جاڭا جۇمىس رەجيمى تۋرالى ايتتى. اتاپ ايتقاندا, ساۋدا الاڭى 2 مىڭ شارشى مەتردەن اساتىن تاماق ونىمدەرىن ساتاتىن گيپەرماركەتتەر مەن سۋپەرماركەتتەر تاۋلىك بويعى جۇمىس رەجيمىنە كوشتى. سونداي-اق 26 جەلتوقساننان باستاپ كينوتەاترلار كۇشەيتىلگەن سانيتارلىق-ەپيدەميولوگيالىق نورمالاردى ساقتاي وتىرىپ, ورىن سانىن 30 پايىزدان اسىرماي اشىلادى.
ءسوز اراسىندا ۆەدومستۆو باسشىسى قوعامدىق كولىك قۇرالدارىنىڭ دا جۇمىسىنا توقتالدى. «مەرەكە كۇندەرى قوعامدىق كولىكتەر سانى ارتادى. كولىكتەردە سوڭعى ايالدامادا دەزينفەكتسيالىق قۇرالدارمەن سالونداردى وڭدەۋ, بارلىق ەسىكتەردى اشۋ, جولاۋشىلارعا قولجەتىمدى ورىنداردا انتيسەپتيگى بار سانيتايزەرلەردى ورناتۋ جاعدايلارى قاتاڭ ساقتالادى. جۇرگىزۋشىلەر مەن تۇرعىندار بەتپەردە رەجيمىن ساقتاي وتىرىپ, تاڭعى ساعات 6-دان 23:00-گە دەيىن جۇمىس ىستەيدى» دەدى جاننا پىراليەۆا.