جاڭا جىلعا قاراي ەلوردادا قالا تۇرعىندارى بىرىگىپ, التى مەترلىك ەكو-شىرشا توقيدى. فلەشموبتى «پۋت ماستەرستۆا» قوعامدىق قورى مەن «بەرگەن» الەۋمەتتىك شەبەرحاناسى نۇر-سۇلتان قالاسى اكىمدىگىنىڭ قولداۋىمەن وتكىزۋدە.
«كارانتين شەكتەۋلەرى قول قۋسىرىپ بوس وتىرۋعا سەبەپ ەمەس. ۇيدە وتىرىپ-اق شىعارماشىلىقپەن اينالىسا الاسىز. ءبىز توقيتىن جىلى شىرشا ادامداردى بىرىكتىرەدى. جاڭا جىلدىق اتموسفەرا سىيلاپ قانا قويماي, 2021 جىلدى جۇمىلا قارسى الۋعا مۇمكىندىك بەرەدى» دەدى اكتسيا ۇيىمداستىرۋشىسى, الەۋمەتتىك كاسىپكەر راحيما مۇقىشەۆا.
توقىما جىپتەن جاسالاتىن جاڭا ونەر تۋىندىسىنىڭ بيىكتىگى – 6 مەتر. اشەكەيلەردى جاساۋعا مەكتەپ وقۋشىلارى مەن اتا-انالار, قارتتار ءۇيىنىڭ زەينەتكەرلەرى, بالالار ۇيلەرى, قوعامدىق قورلار قاتىسۋدا. جوبا اياسىندا ەڭ كوپ جاپسىرمالاردى توقىعان رەكورد يەسى انىقتالادى.
جاڭا جىلعا ارنالعان ەرەكشە شىرشانىڭ بولشەكتەرىن جاساۋعا ءسىز دە قاتىسا الاسىز. «بايتەرەك» مونۋمەنتىنىڭ ىشىندە 19-25 جەلتوقسان كۇندەرى ساعات 10:00-دەن 15:00-گە دەيىن بارلىق سانيتارلىق نورمالاردى ساقتاي وتىرىپ, شىرشا توقۋدان شەبەرلىك سىنىپتارى وتكىزىلۋدە.
