بەيبىتشىلىك جانە كەلىسىم سارايىندا تالاي تالانتتىڭ ەسىمىن ەلگە تانىتقان «جاس قانات» رەسپۋبليكالىق بايقاۋى ءوتتى. اتى اڭىزعا اينالعان سايىس جىلداعىدان ەرەك بولىپ, 25 جىلدىق مەرەيتويىن جۇلدىزدى باعدارلامامەن تويلادى.
ءيا, 2016 جىل – «جاس قاناتتىڭ» ناعىز مەرەيلى شاعى. شيرەك عاسىر عۇمىرىندا بايقاۋ قازاق ەستراداسىنىڭ قالىپتاسۋىنا ولشەۋسىز ۇلەس قوستى. وسى ۋاقىتتاعى جوبانىڭ جەتكەن جەتىستىگىن – بيىلعى «جاس قاناتتىڭ» قازىلار القاسى دالەلدەدى. ۇمىتكەرلەردىڭ ونەرىن ءار كەزدەگى بايقاۋدىڭ جەڭىمپازدارى نۇرلان ابدۋللين, ەرلان كوكەەۆ, باقىت شاداەۆا, ءمادينا سادۋاقاسوۆا, جانار دۇعالوۆا, مارجان اراپباەۆا 15 بالدىق جۇيەمەن باعالادى. ال, جيۋريگە مەدەۋ ارىنباەۆتىڭ توراعالىق ەتۋىنىڭ دە وزىندىك ماعىناسى بار. ءانشى 1992 جىلداعى العاشقى «التىن قانات» يەگەرى اتانعان ەدى. سونداي-اق, مۋزىكاتانۋشى, بەلگىلى تەلەجۇرگىزۋشى يۋري اراۆين, قازاق ساحناسىنىڭ «قىز جىبەگى» نۇرجامال ۇسەنباەۆا, ديريجەر ابزال مۇحيتدينوۆ, حورمەيستەر ەرجان داۋتوۆ, قر ەڭبەك سىڭىرگەن قايراتكەرى رايسا مۇساقوجاەۆا سەكىلدى ونەر مايتالماندارى 14 قاتىسۋشىنىڭ ءان ورىنداۋ شەبەرلىگىنە قازىلىق ەتتى.
ەلىمىزدىڭ تۇكپىر-تۇكپىرىنەن كەلگەن 14 ونەرپاز سايىس بارىسىندا 3 اننەن ورىندادى. جارتىلاي فينالعا 10 قاتىسۋشى وتسە, فەستيۆالدىڭ باس جۇلدەسىن التى فيناليست ساراپقا سالدى. ناتيجەسىندە, سەمەيلىك پاراسات وتان «جاس قاناتتىڭ» باس جۇلدەسىن جەڭىپ الدى. ول حالىق ءانى «جورعاتايدى» ورىنداعانداعى كەڭ داۋىسىمەن كوپشىلىكتى ءتانتى قىلدى.
«كۇمىس قانات» – قاراعاندىلىق «ءۇش ءجۇز» توبىنا, ال قولا جۇلدە ورالدىڭ نامىسىن قورعاعان ايبەك داۋلەتقاليەۆكە بۇيىردى.
سونداي-اق, استانالىق جالعاس سۇلتانوۆ تا جۇلدەدەن قۇر قالمادى. ول «حابار» اگەنتتىگىنىڭ ارنايى سىيلىعىمەن ماراپاتتالىپ, «جاس قانات-2016» بايقاۋىنىڭ ديپلومانتى بولدى. استانا قالاسى اكىمىنىڭ ورىنباسارى ەرمەك امانشاەۆ قالا اكىمى ادىلبەك جاقسىبەكوۆتىىڭ اتىنان 100 مىڭ تەڭگەلىك 3 «ءۇمىت سىيلىعىن» ەرنار دۇيسەەۆ, اقجول ساپارالى مەن ايبەرگەن بولاتحانعا تابىستادى. سونىمەن قاتار, مادەنيەت, مۇراعاتتار جانە قۇجاتتامالار باسقارماسىنىڭ جۇلدەسىن ماليكا احمەتجانوۆا يەلەندى.
25 جىلدىقتىڭ جاڭالىعى دا از ەمەس. ىرىكتەۋدەن وتۋگە ازعانتاي ۇپايى جەتپەي قالعان 5 ۇزدىك قاتىسۋشىعا بايقاۋدىڭ ەكىنشى تۋرىندا ءبىر اننەن ورىنداۋعا مۇمكىندىك تۋدى. «ارمانعا قادام» اتالاتىن بۇل باستامانىڭ جەڭىمپازى بوپ تانىلعان ەلوردالىق توپ «استانا Acapella» مەن تاميريس جانعازينوۆا «جاس قانات-2017» بايقاۋىنا قاتىسۋعا تىكەلەي جولدامانى ۇتىپ الدى.
ءۇش كۇنگە جالعاسقان تارتىستى بايگەنىڭ مەرەكەلىك كەشىندە ەسترادا انشىلەرى ساحنادا ءان ايتىپ قانا قويماي, «جاس قاناتتىڭ» ومىرلەرىندەگى ماڭىزىمەن ءبولىستى. «بۇل بايقاۋعا مەنى قىزىلوردالىقتار وبلىس بولىپ جىبەرگەن ەدى. ول كەزدە نەبارى 18-19 جاستامىن. 1999 جىلعى جەڭىسىمنەن كەيىن مەنى بىردەن اكىمنىڭ قابىلداۋىنا شاقىرتتى. ەكى ايدان كەيىن «جىل ادامى» سىيلىعى بەرىلدى. ودان بولەك, ماعان اكىمنىڭ پرەمياسى تاعايىندالدى. ءبىر جىل بويى اقشا بەرىلىپ تۇردى. استاناداعى پرەزيدەنتتىك وركەستردەن جۇمىسقا ۇسىنىس ءتۇستى. «جاس قانات» جاس تالانتقا قانات بىتىرەدى, شابىت سىيلايدى, جىگەرلەندىرەدى» دەيدى ءمادينا سادۋاقاسوۆا. ال جانار دۇعالوۆا اتالمىش بايقاۋ مەن «Turkvision-2014» سايىسىنداعى جەڭىس اراسىندا تىلسىم بايلانىس بار دەپ ەسەپتەيدى:
«ءبىر قىزىعى, مەن «جاس قاناتتى» 14 جاسىمدا جەڭدىم, تۋرا 13 جىلدان سوڭ «Turkvision» 2014 جىلى ءوتتى. «جاس قاناتتا» مەن ءۇشىنشى جانە ءبىرىنشى بولىپ ساحناعا شىقسام, قازان قالاسىندا جەرەبە تارتقاندا دا ماعان 1-ءشى مەن 3-ءشى ءنومىر ءتۇستى. «جاس قانات» مەنى ءوسىردى, وعان دەيىن مەن تەك بالالار كونكۋرستارىندا ءجۇرۋشى ەدىم. «جاس قاناتتان» كەيىن ءوزىمدى ۇلكەندەر دە مويىنداي باستادى» دەيدى.
ءانشىنىڭ ايتۋىنشا, 25 جىلدىق تاريحى بار, قازاق ەستراداسىندا ەلەۋلى ورىن الاتىن سايىس – تەلەۆيزيالىق جوبا بولعاندىقتان, وعان بۇگىندە ينتەرنەت كەڭىستىگىنە شىعۋعا قولداۋ قاجەت.
«نەگە «جاس قانات» بايقاۋىنىڭ ىرىكتەۋىن ءار قالادا كاستينگ جاساپ وتكىزبەسكە؟» دەگەن سۇراعىمىزعا جوبانىڭ نەگىزىن قالاۋشى, تانىمال پروديۋسەر مۇرات ەرعاليەۆ:
– ونەرپازداردان كەندە ەمەسپىز. «جاس قاناتتىڭ» فورماتى بولەك, دەڭگەيى جوعارى. ءبىزدىڭ كونكۋرسقا تالاي حالىقارالىق فەستيۆال, ءبايگەلەردىڭ جەڭىمپازدارى قاتىسىپ كەلەدى. حالىقتان sms-داۋىس جيناپ, ەلدىڭ نازارىن وزىنە قاراتىپ, كەيىننەن ءىز-ءتۇسسىز جوعالىپ كەتەتىن ارزانقول دۇنيە ەمەس بۇل. كوگىلدىر ەكراننان تۇسپەي جۇرگەن انشىلەردەن دە تالانتتى ون, ءتىپتى جيىرما جاس ورىنداۋشىنىڭ ەسىمىن جاتقا ايتىپ بەرە الامىن.
«چيپ-چيپ», «قىزىل ورىك» دەپ شۋلاپ جۇرگەن زاماندا دياپازونى كەڭ, دارىندارىمىز تاسادا قالىپ جاتادى, وكىنشكە قاراي. ولارعا تەك مادەني ساياساتپەن اينالىساتىن جاناشىرلار تاراپىنان, مەملەكەت تاراپىنان قولداۋ تابىلسا ەكەن دەيمىز, – دەپ وزىندىك پىكىرىن ءبىلدىردى.
ءمادينا جاقىپ
