استانا قالاسىنىڭ ەسىل اۋداندىق سوتىندا «سوت جۇيەسىنە ءىت تەحنولوگيالاردى ەنگىزۋ» تاقىرىبىندا دوڭگەلەك ۇستەل جيىنى ءوتتى.
مەملەكەت باسشىسى سۋديالار قاۋىمداستىعىنىڭ كەزەكتى سەزىندە سوتتاردىڭ حالىققا اشىق ءارى قولجەتىمدى بولۋى ءۇشىن ەلەكتروندى يننوۆاتسيالىق جۇيەنى ەنگىزۋدى تاپسىرعان بولاتىن. وسىعان بايلانىستى بۇگىندە ەلوردانىڭ سوتتارى تۇگەل زاماناۋي تەحنولوگيالارمەن قامتاماسىز ەتىلگەن.
جيىندا ءسوز العان ەسىل اۋداندىق سوتىنىڭ توراعاسى دامير ابدۋعاليەۆ سوت تورەلىگىن جۇزەگە اسىرۋ جۇمىسىن وڭتايلاندىرۋدىڭ باسىم باعىتى – اقپاراتتىق تەحنولوگيالاردى قولدانۋ ارقىلى سوت ءىسىن جۇرگىزۋدىڭ تيىمدىلىگىن ارتتىرۋ ەكەندىگىن ايتتى. ماسەلەن, 2016 جىلدىڭ العاشقى ءتورت ايىندا 87 پايىز ارىز ەلەكتروندى تۇردە تۇسكەن. ازاماتتار مەن زاڭدى تۇلعالار كەز كەلگەن وڭىردەن وزىنە ىڭعايلى ۋاقىتتا, ۇيدەن نەمەسە كەڭسەدەن شىقپاي-اق, ونلاين رەجيمىندە «سوت كابينەتى» ينتەرنەت-سەرۆيسىنە ەلەكتروندى تۇردە تالاپ-ارىزدارىن جولداپ, ءىستىڭ قارالۋ بارىسىنا باقىلاۋ جاساي الادى. وسىدان-اق, ەلەكتروندى تەحنولوگيالاردى قولدانۋ ەڭ الدىمەن سوت پروتسەسىنە قاتىسۋشى ازاماتتارعا قولايلى ەكەنىن كورۋگە بولادى.
بۇعان قوسا, ەلەكتروندى سوت ءىسىن جۇرگىزۋ سوت اكتىلەرىنىڭ ساپاسىن ارتتىرىپ, ىستەردى قاراۋ مەرزىمىن جىلدامداتقانىن دا اتاپ وتكەن ءجون.
قىمبات توقتامۇرات
