استانا قالاسىنىڭ جاستار تەاترىندا جازۋشى-دراماتۋرگ, قىرعىزستاننىڭ ەڭبەك سىڭىرگەن قايراتكەرى جانىش قۇلمامبەتوۆتىڭ «جاساۋىل» ءافساناسىنىڭ پرەمەراسى ءوتتى. كورەرمەندەر جاڭا قويىلىمدى اتالمىش تەاتر ساحناسىنان بۇگىن دە تاماشالاي الادى. سپەكتاكلدىڭ قويۋشى رەجيسسەرى – قازاقستان رەسپۋبليكاسىنىڭ ەڭبەك سىڭىرگەن قايراتكەرى بەكبولات قۇرمانعوجاەۆ.
«شىعارما شەكسپيردىڭ تىلىمەن جازىلدى. مۇندا ۇشى-قيىرى جوق شەڭبەردەگى ءومىر سيپاتتالادى. اۆتور «سول شەڭبەردەن قالاي شىعامىز؟» دەگەن سۇراقتى الدىمىزعا تارتادى. قويىلىمدا, نەگىزىنەن, قازىر الىس-جاقىن شەتەلدەردە بولىپ جاتقان جاعدايلار تۋرالى ايتىلادى» دەيدى رەجيسسەر.
بولامىز با, جوق الدە بورداي توزامىز با؟ قويىلىمنىڭ استارىندا وسى ساۋال جاسىرىنعان سياقتى. «ءار سىپىرتقى وزىنشە سىپىرادى» دەمەكشى, ءار بيلەۋشى تاققا وتىرعاندا جاڭا زاڭداردى ورناتادى. ول زاڭداردىڭ تەرىس ىقپالى ەڭ الدىمەن حالىققا تيەتىنى بەلگىلى. جاساۋىل بيلەۋشى مەن حالىق اراسىندا دانەكەر بولىپ جۇرەدى. سوندا جوعارى جاقتان تاستالعان تاياق, تومەننەن سىلتەنگەن سوققى وعان تيەدى دە جۇرەدى.
سپەكتاكلدە كەيىپكەرلەردى, نەگىزىنەن, جاس ارتىستەر سومدادى. جاساۋىل بەينەسى دانيار ورازاەۆتىڭ ەنشىسىنە ءتيدى. «ادامنىڭ تۇندە ۇيقىعا جاتاردىڭ الدىندا وزىنە ەسەپ بەرەتىن ادەتى بولسا, مەنىڭ كەيىپكەرىمنىڭ دە بويىندا سونداي داعدى بار. ول ءوزىنىڭ جولىن ءوز ەركىمەن تاڭداعان جوق. جاساۋىل جاساعان قاتەلىكتەرىنە وكىنەدى. بىراق دارمەنسىز. سەبەبى جوعارىدا قامشىسىن ۇستاپ تۇرعان بيلەۋشى بار» دەيدى ءارتىس.
دەسەك تە, سپەكتاكل ەلدىكتىڭ كىلتى – بىرلىكتە ەكەنىن, ار-يماننان بەزىپ, ادامدىق قالپىنان ايىرىلعان حالىقتىڭ عۇمىرى كەلتە بولاتىنىن ۇعىندىرادى. ءتۇيىندەپ ايتقاندا, قويىلىم كورەرمەندى ءتۇرلى فيلوسوفيالىق ويلارعا جەتەلەيدى.
امانعالي قالجانوۆ
