دارىگەر مەن ءدارى جايى ايتىلدى

استانا قالاسىنىڭ دەنساۋلىق ساقتاۋ جۇيەسىنىڭ دامۋ مۇمكىندىكتەرى مەن حالىققا مەديتسينالىق قىز­مەت كورسەتۋ جاعدايى قوعامدىق تىڭداۋدا تالقىعا سالىندى.

ۇلت دەنساۋلىعىن نىعايتۋ ماقساتىندا كوپتەگەن رەفورما جاسالسا دا, تۇيتكىلى كوپ ماسەلەلەر ءالى دە جەتەرلىك. سولاردىڭ ەڭ وزەكتىسى دەپ كوپشىلىك دارىگەرلەردىڭ جالاقىسىن ايتادى. ەلورداداعى جالپى پراكتيكا دارىگەرىنىڭ ەڭبەكاقىسى ماسكەۋلىك ارىپتەستەرىنىڭ جالاقىسىمەن سالىستىرعاندا 6 ەسە از بولىپ شىقتى. ەڭبەك وتىلىمىنە قاراي 45 مىڭ تەڭگەدەن باستالىپ, 140 مىڭ تەڭگەگە دەيىن باراتىن دارىگەر جالاقىسى حالىققا مەديتسينالىق قىزمەت كورسەتۋگە اسەر ەتەتىنى بەلگىلى.
تاعى ءبىر تولىق شەشىمىن تاپپاعان ماسەلە – ستاتسيونارلىق ەمحانانىڭ تاپشىلىعى. استانا قالاسى دەنساۋلىق ساقتاۋ باسقارماسىنىڭ باسشىسى قامالجان نادىروۆتىڭ ايتۋىنشا, 2022 جىلعا قاراي ەسكى تەمىر جول اۋرۋحاناسىنىڭ ورنىنا 500 جاتىن ورىنعا شاقتالعان زاماناۋي ەمحانانى سالۋ جوسپارلانىپ وتىر. قازىردىڭ وزىندە جوباعا قىزىعۋشىلىق تانىتىپ وتىرعان شەتەلدىك ينۆەستورلار بار. قايتكەن كۇندە دە اكىمدىك بۇل باستامانى اياقسىز قالدىرمايدى.
2018 جىلدان باستاپ ناۋقاستارعا بەرىلەتىن تەگىن دارىلەردى بىردەن ەمحانانىڭ ءدارىحانالارىنان الۋعا بولادى. بۇل شەشىمنىڭ ارقاسىندا اكىمدىك 1 ملرد تەڭگەدەي اقشا ۇنەمدەمەك. ال ۇنەمدەلگەن قارجى مەديتسينا سالاسىنداعى وزگە قاجەتتىلىكتەرگە جۇمسالادى.

گۇلدانا تالعاتقىزى