كەشە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە پرەزيدەنتتىڭ قازاقستان حالقىنا جولداۋىن اقپاراتتىق ءتۇسىندىرۋ ماقساتىندا جاستارمەن كەزدەسۋ ءوتتى.
ستۋدەنتتەرمەن كەزدەسۋگە قوعام قايراتكەرى, ءتىل جاناشىرى ورازكۇل اسانعازىقىزى, قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ جانە فيلولوگيا عىلىمدارىنىڭ كانديداتى, دوتسەنت سەرىكزات دۇيسەنعازى قاتىستى. «پرەزيدەنتىمىزدىڭ حالىققا جولداۋى ۇلكەن سەرپىن بەردى. بۇل جولداۋ – ەلدىڭ رۋحاني وسۋىنە, حالىقتىڭ الەۋمەتتىك جاعدايىنا كوڭىل بولىنگەن جوبا. جولداۋدا ءبىلىم بەرۋ, دەنساۋلىق ساقتاۋ, الەۋمەتتىك سالالاردىڭ بارلىعى قامتىلعان. سونىڭ ىشىندە «قازاقستان رەسپۋبليكاسىندا مەملەكەتتىك ءتىل بىرەۋ عانا جانە ول – قازاق ءتىلى» دەپ پرەزيدەنتىمىزدىڭ ايتقانى جۇرت كوڭىلىنەن شىقتى. قازىر قوعامداعى ەڭ قاجەت ماسەلەنىڭ ءبىرى – وسى قازاق ءتىلىنىڭ قولدانىس اياسىن كەڭەيتۋ ماسەلەسى. سوندىقتان دا ءبىز بۇگىن جاستارمەن كەزدەسىپ, جولداۋدا ايتىلعان ەڭ ماڭىزدى ماسەلەلەردى تالقىلاۋدامىز» دەدى قوعام قايراتكەرى ورازكۇل اسانعازىقىزى.
شارا ەركىن, سۇراق-جاۋاپ فورماتىندا ءوتتى. جوعارى وقۋ ورنىنىڭ تابالدىرىعىن ەندى اتتاپ, ۇلكەن ومىرگە قادام باسقان ءارتۇرلى ماماندىقتا وقىپ جۇرگەن جاستار دا جولداۋعا ەرەكشە قىزىعۋشىلىق تانىتتى. «بۇل جيىن بىزگە ەرەكشە اسەر قالدىردى. بۇرىن بىلمەگەن, بايقاماعان كوپ ماسەلەلەرمەن تانىستىق. اسىرەسە قازىرگى پاندەميا جاعدايىنداعى ەلىمىزدىڭ مەديتسينا سالاسىنا كوڭىل ءبولىپ, ءدارى شىعاراتىن زاۋىتتاردى 17 پايىزدان 50 پايىزعا دەيىن ءوسىرىپ جاتقانى – قۇپتارلىق جاعداي. ءبىز دە ءوز كەزەگىمىزدە پرەزيدەنتى جولداۋىنىڭ جۇزەگە اسۋى ءۇشىن قولىمىزدان كەلگەنشە تىرىسامىز» دەدى جۋرناليستيكا جانە ساياساتتانۋ فاكۋلتەتىنىڭ ستۋدەنتى راۋشان نۇرعاليەۆا.
