جاستىق. ماحاببات. باقوردا
ەلورداعا ءان ارناماعان كومپوزيتور كەمدە-كەم. ۇلتتىق «استانا-بايتەرەك», رەسپۋبليكالىق «ەلىم مەنىڭ», «تاۋەلسىزدىك تولعاۋى» بايقاۋلارىنىڭ بىرنەشە دۇركىن جەڭىمپازى, وسى سەكىلدى وزگە دە حالىقارالىق جانە رەسپۋبليكالىق كونكۋرستاردىڭ لاۋرەاتى سەرىكجان ءابدىنۇروۆ تا – باس قالا اتىن انگە قوسىپ كەلە جاتقان كومپوزيتورلاردىڭ ءبىرى. ونىڭ بۇل تاقىرىپتاعى اندەرىمەن قاتار «اياۋلى ماحاببات» وپەراسى دا بار. كورەرمەندەرگە جول تارتقان «باقوردا» اتتى تەاترلاندىرىلعان مۋزىكالىق قويىلىم دا تۇگەلىمەن وسى كومپوزيتوردىڭ شىعارمالارىمەن كومكەرىلدى.
جاستار جىلىنىڭ اياسىندا «استانا» كونتسەرت زالىندا وتكەن تۋىندىنىڭ ليبرەتتوسىن جاس اقىن قۋات ەجەمبەك جازدى. رەجيسسەرى – اسحات قوشاەۆ. بۇل شىعارما جاستىقتى, ماحابباتتى جىرلاپ, ەڭسەلى ەلوردامىزدىڭ اسەمدىگىن, سۇلۋلىعىن اسپەتتەيدى. مۇنداعى وقيعا اڭسار (ەرنازار قاتۋوۆ) مەن دارحان ء(داستۇر اسىلحان) ەسىمدى جىگىتتەر مەن توميريس (ديانا ماي) اتتى ارۋ اراسىندا ءوربيدى. وسى جاستار ەلوردانىڭ تاڭعاجايىپ عيماراتتارىن, كورىكتى جەرلەرىن تامسانا اڭگىمەلەيدى. اڭسار توميريسكە شىن عاشىق. الايدا مىنەزى ۇياڭ, ۇيالشاق بولعاندىقتان, قىزعا ءسوز سالا المايدى. دوسىنا دارحان كومەككە كەلىپ, وسى مىنەزىنەن ارىلتادى. عاشىقتاردىڭ قوسىلۋىنا سەبەپشى بولادى.
«جان انا», «اۋىلىم – التىن بەسىگىم», «اق جۇلدىز», «اي نۇرلى استانا», «باقوردا» ت.ب. اندەر شىرقالعان قويىلىمعا ەلوردا فيلارمونياسىنىڭ «الەم» ەسترادالىق بي ءانسامبلى (كوركەمدىك جەتەكشىسى – لاۋرا مۇقاەۆا), ەسترادالىق جانە كلاسسيكالىق ۆوكال ءبولىمىنىڭ انشىلەرى (كوركەمدىك جەتەكشىسى – ارايلىم راحىم) قاتىستى.