كەشە وتكەن قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيانىڭ وتىرىسىندا استانانى سانيتارلىق تازالاۋعا جانە اباتتاندىرۋعا باعىتتالعان بيۋدجەت قاراجاتىن ءتيىمدى جۇمسالۋىن باقىلاۋ جانە اۋديتورلىق ءىس-شارالاردى جۇزەگە اسىرۋ ماسەلەسى تالقىلاندى. بۇل تاراپتا قالىپتاسىپ وتىرعان جاعدايمەن استانا قالاسى بويىنشا تەكسەرۋ كوميسسياسىنىڭ توراعاسى عالىمجان مولداش تانىستىردى.
ونىڭ ايتۋىنشا, قالانى اباتتاندىرۋ ەرەجەلەرىندە جەتىلدىرەتىن تۇستار بار. سونىڭ ىشىندە اتالعان ەرەجەلەردى جۇزەگە اسىراتىن قۇجاتتار جوق جانە ءتيىستى باقىلاۋدى جۇرگىزۋ ءۇشىن مەملەكەتتىك ورگانداردىڭ اتقاراتىن قىزمەتى بەلگىلەنبەگەن. قالادا ءبىراز كوشە مەن نىسان دا بالانسقا الىنباي قالعان. ماسەلەن, الماتى اۋدانىندا – 369, سارىارقادا – 72, ەسىلدە 35 كوشە مەن نىسان ەش جەرگە تىركەۋگە الىنباعان. اۋدان اكىمدىكتەرى جاسىل جەلەكتى ەسەپكە الۋدى دا جۇرگىزبەيدى.
وسى تۇرعىدا وتىرىسقا قاتىسقان قالالىق ءماسليحات حاتشىسى جانات نۇرپەيىسوۆ بايانداماشىعا ساۋال تاستادى. «قالادا ءۇش اۋداننىڭ اكىمدىكتەرى, تابيعي رەسۋرستەر جانە تابيعاتتى پايدالانۋدى رەتتەۋ باسقارماسى بار. مەنىڭ بىلگىم كەلەتىنى, جاسىل جەلەكتى تۇگەندەۋمەن قاي مەملەكەتتىك ورگان اينالىسادى؟ ەكى-ءۇش جىلدا ءبىر وسى ماسەلە الدىمىزدان شىعادى دا تۇرادى. سوندا بيۋدجەتتەن وسى جۇمىسقا قارجى سۇرالادى. مىنادان كەيىن تۇگەندەۋ مۇلدە جۇرگىزىلمەگەن نەمەسە باستالىپ بارىپ اياعىنا دەيىن جەتكىزىلمەگەن دەگەن وي تۋادى. ەگەر تۇگەندەۋ جۇرگىزىلسە, ونىڭ قورىتىندىلارى نەگە اۋدانداردىڭ اكىمدىكتەرىنە جەتكىزىلمەگەن؟» دەدى ول.
بۇل سۇراققا تابيعي رەسۋرستەر جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى ساكەن يساەۆ جاۋاپ بەردى. ونىڭ سوزىنشە, بىلتىر وتىندىق بۇتالاردى تۇگەندەۋ الماتى جانە ەسىل اۋداندارىندا اتقارىلعان. ال سارىارقا اۋدانىندا تۇگەندەۋ 2014 جىلى جاسالدى. الايدا ءتيىستى بازانى ازىرلەۋ سوزىلىپ كەتكەن. الداعى ءبىر-ەكى اپتادا بۇل مالىمەتتەر بازاعا ەنگىزىلەدى.
كۇن تارتىبىندەگى ماسەلە بويىنشا الماتى, سارىارقا, ەسىل اۋداندارىنىڭ اكىمدەرى, سايكەسىنشە, ادىلبەك سارسەمباەۆ, ارمان تۇرلىبەك, تولەگەن زاكاريانوۆ ەسەپ بەردى.
امانعالي قالجانوۆ
