«پرەزيدەنتتىڭ بەس الەۋمەتتىك باستاماسى» ەل ومىرىنە قاجەتتى ماسەلەلەردىڭ شەشىم جولدارىن كورسەتكەن. ەلباسى ستۋدەنتتەردىڭ جاعدايىن نازاردان تىس قالدىرماي, جاتاقحانا سالۋدى تاپسىرعان ەدى. سونىمەن قاتار, جۋىردا استاناداعى مۇعالىمدەرگە دە جاتاقحانا بەرىلەتىنى حابارلاندى.
ستۋدەنتتەر مۇددەسىنە – 118 ميلليارد
ستۋدەنتتەر جاتاقحاناسى ءالى كۇنگە دەيىن وزەكتى بولىپ كەلگەنى جاسىرىن ەمەس. جوعارى وقۋ ورىندارىنىڭ, اسىرەسە 4-كۋرس ستۋدەنتتەرى جينالىپ, پاتەر جالداپ تۇرۋعا ءماجبۇر بولادى. مەملەكەت باسشىسى وسى ماسەلەنى باستى نازارعا الىپ, ءوز ءۇندەۋىندەگى ءۇشىنشى باستاماسىندا 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى ەرەكشە تاپسىردى. نۇرسۇلتان نازارباەۆتىڭ تاپسىرماسىنان كەيىن ءتيىستى مەكەمەلەر تەز ارادا جۇمىسقا كىرىسىپ كەتكەنى دە حابارلاندى. ءبىلىم جانە عىلىم ءمينيسترى ەرلان ساعاديەۆ ستۋدەنتتەرگە جاتاقحانا سالۋ جۇمىستارى بيىل باستالاتىنىن, ونى جەرگىلىكتى اكىمدىكتەر, جوعارى وقۋ ورىندارى, جەكە كومپانيالار بىرلەسىپ شەشەتىنىن ءمالىم ەتتى.
ءبىز وسى تۇستا ستۋدەنتى كوپ ەۋرازيا ۇلتتىق ۋنيۆەرسيتەتىنىڭ جاتاقحانالارىنداعى جاعدايدى انىقتاپ كوردىك. مۇندا جاتاقحانانىڭ قۇنى جىلىنا 70-80 مىڭ تەڭگە ارالىعىن قۇرايدى. بيىل وقۋ ورنىنا 7 مىڭنان استام ستۋدەنت ءتۇسىپتى. بۇعان قوسا, جاتاقحانا بويىنشا شەشىمىن تاپپاي تۇرعان ءبىرشاما پروبلەما دا بارشىلىق. ماسەلەن, بىلتىر №6 ستۋدەنتتەر ءۇيىنىڭ ءبىر بولمەسىنە سەگىز ادامنان ورنالاستىرىلعان كەز بولىپتى. ال 4-كۋرس ستۋدەنتتەرى اراسىندا كوپ بالالى وتباسىلاردان شىققان, مۇگەدەك سەكىلدى ارنايى جەڭىلدىگى بارىنان وزگەسى بيىل تاعى دا پاتەر جاعالاپ ءجۇر. بىلتىرعى جارتاس ءالى سول قالپىندا. دەگەنمەن ۋنيۆەرسيتەت باسشىسى الداعى جىلدارى بۇل ماسەلە بىرتىندەپ شەشىلەتىنىن جەتكىزدى. «2019-2021 جىلدارى 3 بلوكتان تۇراتىن 2467 ورىندىق جاتاقحانا قۇرىلىسى باستالماق. بۇل – ەلباسى تاپسىرماسىن ورىنداۋ جولىنداعى جاۋاپتى ءىس-شارا» دەدى ەرلان سىدىقوۆ ەسەپ بەرۋ جيىنىندا.
ال ستۋدەنتتەر ءۇيىنىڭ قۇرىلىسى ءۇشىن جۇمسالاتىن قارجى رەسپۋبليكالىق بيۋدجەتتەن بولىنبەك. مەملەكەت باسشىسىنىڭ تاپسىرماسىن ورىنداۋ ماقساتىندا 118 ميلليارد تەڭگە قاراستىرىلعان. بىراق بۇل سوما الداعى بەس جىل ىشىندە كەزەڭ-كەزەڭىمەن ءبولىنىپ وتىرادى. ايتا كەتەر ءبىر ماسەلە, جاتاقحانالاردىڭ سالىنۋى وقۋ باعاسىنا ەش اسەر ەتپەيدى.
شاعىن پاتەرلەر دە سالىنادى
قازىرگى ۋاقىتتا استانا اكىمدىگى مەكتەپ مۇعالىمدەرىن جاتاقحانامەن قامتاماسىز ەتۋ ماسەلەسىمەن اينالىسىپ جاتىر. قالالىق ءبىلىم باسقارماسىنىڭ باسشىسى ءانۋار جانعوزيننىڭ ايتۋىنشا, قازىر 188-كوشەنىڭ بويىندا ورنالاسقان ءبىر جاتاقحانانىڭ قۇرىلىسى اياقتالىپ قالدى. مۇندا اكىمدىك 250 ماماندى قونىستاندىرماق. ولاردىڭ اراسىندا ەڭبەك ءوتىلى جوعارى, وقۋ ورنىن قىزىل ديپلوممەن بىتىرگەن ۇستازدارعا باسىمدىق بەرىلەدى. ال جاتاقحاناعا ءوتىنىش بەرگەن مۇعالىمدەر ارنايى قۇرىلعان كوميسسيا ارقىلى ىرىكتەلەدى. ءبىر وكىنىشتىسى, بولمەلەردىڭ تار بولۋىنا بايلانىستى بۇل جاتاقحانا ازىرگە تەك وتباسىن قۇرماعان ۇستازدارعا عانا بەرىلەدى.
وسى ورايدا تاجىريبەلى مۇعالىمدەردىڭ كوبى وتباسىلى جاندار ەكەنى, ولارعا قانداي كومەك كورسەتىلەتىنى تۋرالى وي كەلەرى انىق. استاناعا جىل سايىن وڭىرلەردەن 400-500 مۇعالىم كەلەدى. ولاردىڭ ءبارىن ءبىر مەزەتتە جاتاقحانامەن قامتاماسىز ەتۋ مۇمكىن ەمەس. باسقارما باسشىسىنىڭ ايتۋىنشا, حوستەلدەر ۇسىنىلماق. ال ونىڭ قۇنى ايىنا 35-45 مىڭ تەڭگەنى قۇرايدى.
– ايماقتاردان كەلەتىن ۇستازدار سانى از ەمەس ءارى ولاردىڭ كوبى – وتباسىلى جاندار. وسىعان بايلانىستى ازىرگە ءوز سالاسىندا ۇزدىك اتانعان ۇستازداردى جاتاقحاناعا ورنالاستىرۋدى جوسپارلاپ وتىرمىز. مىسالعا, ۋنيۆەرسيتەت تۇلەگى بولسا, ونىڭ جەتىستىكتەرى مەن تاعىلىمداماسى باستى نازارعا الىنادى. ارينە, ەڭبەك ءوتىلى بار ماماندار دا ەسكەرىلەدى, – دەيدى ءانۋار جانعوزين.
الداعى ۋاقىتتا مەكتەپ ۇستازدارىنا ارنالعان شاعىن ءپاتەرلەردىڭ قۇرىلىسىن باستاۋ دا جوسپاردا بار.
