قالا بيلىگى استاناداعى جول قۇرىلىسىنا قاتىستى ءوز مىندەتىن قاجەتىنشە اتقارماعان كومپانيالارمەن كەلىسىمشارتتى بۇزىپ, جاۋاپسىز مەردىگەرلەردىڭ ماسەلەسىن بىرجاقتى ەتتى.
مامانداردىڭ مالىمەتىنشە, بيىل 20,8 شاقىرىمدى قۇرايتىن 22 جاڭا كوشە سالىنىپ, 91 كوشەنىڭ 61,15 شاقىرىمدىق جولى جوندەلەدى دەپ جوسپارلانۋدا.
ەستەرىڭىزگە سالساق, مامىر ايىندا استانا اكىمى اسەت يسەكەشەۆ اۆتوكولىك جولدارىنىڭ قۇرىلىسىن تەكسەرۋ بارىسىندا وكىلەتتى ورگاندارعا مىندەتتەرىن اتقارماعان جاعدايدا, مەردىگەرلەرمەن كەلىسىمشارتتى بۇزۋدى تاپسىرعان-دى. ناتيجەسىندە مامانداندىرىلعان اۋدانارالىق ەكونوميكالىق سوتىندا كوشە قۇرىلىسى جونىندە مەملەكەتتىك ساتىپ الۋعا قاتىسقان بىرقاتار مەردىگەرلەردى جاۋاپسىز دەپ تانۋ تۇرعىسىندا بەس تالاپ-ارىز بەرىلىپ, ونىڭ ۇشەۋىمەن, ياعني «DM Infrastructure», «SCC Company», «تەحسترويسەرۆيس» كومپانيالارىمەن كەلىسىمشارت بۇزىلعان. كەلىسىمشارت بويىنشا مەردىگەرلەر ماگيسترالدىق كوشەلەردى سالىپ, قالاداعى كولىك كەپتەلىسىن ازايتۋعا ۇلكەن ۇلەس قوسۋلارى كەرەك ەدى. جالپى, اتالمىش كومپانيالارعا جانگەلدين كوشەسىنەن كۇمىسبەكوۆ, بەيسەكوۆا كوشەلەرىنە دەيىن جانە ە10, ە30, ە15, ە25 كوشەلەرى مەن تۇركىستان كوشەسىنەن №23 پەن №30 كوشەلەرىنە دەيىنگى ارالىققا جول قۇرىلىسىن جۇرگىزۋ جۇمىستارى جۇكتەلگەن بولاتىن. الايدا ولار وزدەرىنە ارتىلعان مىندەتتى ورىنداماعاندىقتان, كەلىسىمشارت نەگىزسىز دەپ تانىلدى.
وكىلەتتى ورگانداردىڭ اۆتوجول نىساندارىنىڭ قۇرىلىسى جونىندەگى تەكسەرۋ جۇمىستارى ءالى دە جالعاسۋدا. تەكسەرىس بارىسىندا كومپانيالاردىڭ كەلىسىمشارتتا كورسەتىلگەن مىندەتتەردى ورىنداماعانى تۋرالى دەرەك راستالسا, ولار بىردەن جاۋاپسىز مەردىگەرلەر تىزىمىنە ەنگىزىلەدى.
