استانا قالاسىنداعى ق.مۇڭايتپاسوۆ اتىنداعى ستاديوندا جاۋىنگەر-ينتەرناتسيوناليست قازبەك ابدراحمانوۆ ەسىمىن ەسكە تۇسىرۋگە ارنالعان ءداستۇرلى تۋرنير ءوتتى. بيىل 15-ءشى رەت ۇيىمداستىرىلعان شاعىن فۋتبول جارىسىنا سەگىز كوماندا قاتىستى.
استانا قالاسىنىڭ دەنە شىنىقتىرۋ جانە سپورت باسقارماسىنىڭ قولداۋىمەن وتكىزىلگەن جارىستىڭ نەگىزگى ماقساتى – ارداگەرلەر ۇيىمدارى اراسىنداعى ىنتىماقتاستىقتى نىعايتۋ, سالاۋاتتى ءومىر سالتىن ناسيحاتتاۋ جانە جاس ۇرپاقتى وتاندىق پاتريوتيزمگە تاربيەلەۋ بولدى. كۇنى بويى وتكەن دوپ دوداسىنىڭ جارتىلاي فينالىنا «استانا قالاسىنىڭ اۋعانستان سوعىسى مۇگەدەكتەرى مەن ارداگەرلەرى وداعى», رەسپۋبليكالىق «جاس ۇلان» مەكتەبى, «قاراعاندى قالاسىنىڭ اۋعانستان سوعىسى ارداگەرلەرى ۇيىمى» جانە ەلوردالىق ارداگەر سپورتشىلاردىڭ «تسەليننيك» كومانداسى شىقتى. ال ءتورت ۇزدىكتىڭ اراسىنان قاراعاندىلىقتار مەن استانالىق ارداگەر سپورتشىلاردىڭ ۇجىمى فينالعا ءوتتى.
اقتىق سىندا قاراعاندى قالاسىنان كەلگەن ارداگەر فۋتبولشىلار جەڭىسكە جەتتى. «تسەليننيك» ەكىنشى ورىنعا يە بولدى. ال استانا قالاسىنىڭ اۋعانستان سوعىسى ارداگەرلەرى ۇيىمى مەن «جاس ۇلان» كومانداسى قولا جۇلدەگە قول سوزدى. ستەپنوگورسك قالاسىنىڭ وكىلدەرى «جەڭىسكە دەگەن جىگەرلىگى ءۇشىن» ارناۋلى سىيلىعىمەن ماراپاتتالدى. جارىستىڭ «ۇزدىك ويىنشىسى» سىيلىعى قايرات توقسانباەۆقا بەرىلدى.
جارىس جەڭىمپازدارى مەن جۇلدەگەرلەرىنە ديپلومدار, مەدالدار جانە اقشالاي سىيلىقتار تابىس ەتىلدى.
