بۇگىن باس رەداكتورلار كلۋبى ەۋرازيالىق توپتىڭ (ERG) قولداۋىمەن قازاقتىلدى جۋرناليستەر اراسىندا وتكىزىلگەن ءداستۇرلى VI «التىن قالام» بايقاۋىنىڭ جەڭىمپازدارىن ماراپاتتادى.
بۇل جارىستىڭ ماقساتى ەۋرازيالىق توپ كاسىپورىندارىندا جۇمىس ىستەيتىن قاراپايىم ەڭبەك ادامدارىن بەيبىت زاماننىڭ قاھارماندارى رەتىندە ۇلگى ەتىپ, ناسيحاتتاۋ بولاتىن. سول ارقىلى جۇرتشىلىققا جۇمىسشى ماماندىقتاردىڭ قىر-سىرىن تانىتۋ كوزدەلگەن-ءدى.
«قازىرگى تاڭدا ەۋرازيالىق توپ – ۇدەمەلى يندۋستريالدى-يننوۆاتسيالىق دامۋ باعدارلاماسى كوشباسشىلارىنىڭ ءبىرى. باعدارلامانىڭ العاشقى 5 جىلىندا جالپى قۇنى 2,5 ميلليارد دوللارلىق 12 ينۆەستيتسيالىق جوبانى جۇزەگە اسىرىپ, 2 جارىم مىڭ جاڭا جۇمىس ورنىن اشتىق. ەلىمىزدىڭ ءار تۇكپىرىندەگى ەۋرازيالىق توپ كاسىپورىنداردا 61 مىڭنان اسا ادام ەڭبەك ەتەدى. ءبىزدىڭ وندىرىستەگى مەتاللۋرگتەر, كەنشىلەر, شاحتەرلەر, ەلەكتر ستانساسى وپەراتورلارى, كوپىرلى كران مەن ەكسكاۆاتور ماشينيستەرى ءبىر ءۇيدىڭ بالاسىنداي تاتۋ. وسى ازاماتتاردىڭ ەسەلى ەڭبەگى ارقاسىندا قازاقستاننىڭ ىشكى جالپى ونىمىندەگى ەۋرازيالىق توپتىڭ ەنشىسى 4 پايىزدى قۇراپ وتىر» دەدى اتالمىش مەكەمەنىڭ اپپارات جەتەكشىسى سەيىتقالي راحيموۆ.
باس رەداكتورلار كلۋبىنىڭ پرەزيدەنتى بيبىگۇل جەكسەنبايدىڭ ايتۋىنشا, شىعارماشىلىق كونكۋرسقا ءباسپاسوز, راديو جانە تەلەۆيزيا سالاسىنىڭ 37 ءجۋرناليسى 133 ماتەريال ۇسىنعان. ونىڭ ىشىندە 22 ءجۋرناليستىڭ 57 جۇمىسىن كوميسسيا مۇشەلەرى تالاپقا ساي دەپ تانىدى. سايىسقا قاتىسۋعا ايماقتىق جۋرناليستەردىڭ ىنتاسى جوعارى بولعانىن ەسكە سالۋ كەرەك.
ءادىل قازىلار القاسىنىڭ قورىتىندى شەشىمى بويىنشا 1-ورىن «ۇزدىك ماقالا» نوميناتسياسىندا وبلىستىق «اقتوبە» گازەتىنىڭ ءتىلشىسى كامشات قوپاەۆاعا, ال «ۇزدىك سيۋجەت» نوميناتسياسىندا «استانا» تەلەارناسىنىڭ ءجۋرناليسى ايگۇل شايحيموۆاعا بۇيىردى. جەڭىمپازداردىڭ ارقايسىسىنا 500 مىڭ تەڭگە كولەمىندەگى قارجىلاي سىياقى بەرىلدى. ال 2-ورىندى «ەگەمەن
قازاقستان» گازەتىنىڭ قوستاناي وبلىسىنداعى ءتىلشىسى ءنازيرا جارىمبەتوۆا مەن «24.KZ» تەلەارناسىنىڭ پاۆلودارداعى مەنشىكتى ءتىلشىسى قارلىعاش قاسيەتوۆا ەنشىلەدى. جۇلدەگەرلەردىڭ ارقايسىسىنا 300 مىڭ تەڭگەنىڭ سەرتيفيكاتى تابىستالدى. «قازاقستان» تەلەراديو كەشەنىنىڭ قاراعاندى وبلىستىق فيليالى ءجۋرناليسى ءاشمۇحان جامپەيىسوۆ پەن پاۆلودار وبلىستىق «حالىق» راديوسىنىڭ ءتىلشىسى راۋشان سىبانجانوۆا 3-ورىندى ولجالاپ, ارقايسىسى 200 مىڭ تەڭگەگە يە بولدى.
بوتاگوز ماراتقىزى
