بۇل قىزمەتكە كەلگەن ازاماتتار ءۇشىن پارىز بەن ادامگەرشىلىك ۇعىمدارى ءوزارا ەگىز. ويتكەنى, ولاردىڭ ميسسياسى قوعامداعى قولايسىز قۇبىلىستاردى رەتتەۋدەن, تىعىرىققا تىرەلگەن كىسىلەرگە كومەكتەسۋدەن تۇرادى. قۇددى ءححى عاسىردىڭ «سۋپەرمەنى» دەرسىز. ءيا, ءبىزدىڭ اڭگىمەمىز قۇتقارۋشىلار حاقىندا.
سەرىلەر سەگىز قىرلى
كەيىپكەرلەرىمىزدى استانا قالاسىنداعى ورتالىق وڭىرلىك اەروموبيلدىك جەدەل قۇتقارۋ جاساعىنان جولىقتىردىق. وسى سالاعا قاتىستى كوكەيدەگى ساۋالداردىڭ بارىنە اتالمىش ۆەدومستۆو باسشىسىنىڭ ورىنباسارى بەيسەنباي جەكسەنوۆ ەگجەي-تەگجەيلى جاۋاپ بەردى:
– قۇتقارۋشى قىزمەتىنە قابىلدانۋدىڭ ءوزى وڭاي شارۋا ەمەس. ەڭ اۋەلى, تالاپكەرلەر «ازاماتتىق قورعانىس تۋرالى» قر زاڭىنا سايكەس ءۇش اي بويى دايارلىقتان وتەدى. ودان سوڭ مەديتسينالىق تەكسەرۋگە جىبەرىلەدى. دەنساۋلىعىنان اقاۋ تابىلماسا, دەنە شىنىقتىرۋ پانىنەن نورماتيۆ جانە پسيحولوگيالىق تەست تاپسىرادى. ياعني, قۇتقارۋشى كەز كەلگەن توتەنشە جاعدايعا تولىقتاي ءازىر بولۋى ءتيىس. قازىرگى تاڭدا ۇجىمىمىزدا 77 قۇتقارۋشى بار. ارقايسىسى ءون بويىنا ءورت ءسوندىرۋشى, الپينيست, پارامەديك, قايىق جۇرگىزۋشى, اۆتوكولىك جۇرگىزۋشى, كينولوگ, سۇڭگۋىر سەكىلدى ماماندىقتاردى توعىستىرعان. ءبىزدىڭ قىزمەت كورسەتۋ اۋماعىمىز استانا قالاسىمەن قوسا اقمولا, قاراعاندى, پاۆلودار جانە سولتۇستىك قازاقستان وبلىستارىن دا قامتيدى, – دەدى ول.
ادەتتە قۇتقارۋشىلار بارلىق قاۋىپتى وقيعالاردىڭ ورتاسىندا جۇرەدى. جاز مەزگىلىندە كوبىنەسە سۋعا باتۋ فاكتىلەرى ءجيى كەزدەسەدى ەكەن. ونىڭ ءبىرازىنا بوس ماقتان سەبەپشى. ماسەلەن, جاقىندا عانا شاھار شەتىندەگى «ءۇش موڭكە» دەمالىس ايماعىندا 42 جاستاعى ەر ادام سۋعا كەتىپ قايتىس بولعان. جانىنداعى كەلىنشەككە «مەن اقتاۋداعى تەڭىز فلوتىندا قىزمەت ەتكەنمىن» دەپ وتىرىك ايتىپ, سونى دالەلدەمەك نيەتپەن سۋ تۇبىنە سۇڭگيدى. الايدا وپ-وڭاي جاعاعا شىعام دەگەن ويى ىسكە اسپاعان. مۇنداي جايتتاردان بولەك, قۇتقارۋشىلار ماس كۇيىندە كوپىردەن سەكىرەتىندەردى دە كورىپتى. قاراوتكەل كوپىرىنەن سەكىرگەن 17 جاستاعى قوس بويجەتكەننىڭ ءبىرى ءتىل تارتپاي قازا تاپقان. سوت-مەديتسينالىق ساراپتاماسى كەزىندە ونىڭ الكوگولدى ىشىمدىك ىشكەنى انىقتالدى.
ارادان دا اراشاشى
سۋعا باتقان كىسىگە قول ۇشىن سوزۋ قانشالىقتى كۇردەلى شارۋا ەكەنىن بىلمەك ماقساتپەن اەروموبيلدى جاساقتىڭ قۇتقارۋشىسى نۇربولات دودايدى سوزگە تارتتىق. بالا كەزىنەن بەرى جۇزۋگە ماشىقتانعان زامانداسىمىز بۇل جۇمىستىڭ وزىندىك قيىندىقتارىن بىلايشا باياندادى:
– سۋعا سۇڭگۋ الدىندا ارنايى كيىم كيەمىز. ول كيىم نەوپرەن ماتەريالىنان تىگىلەتىندىكتەن, سۋ وتكىزبەي, دەنەدەگى جىلۋدى جاقسى ۇستايدى. ودان كەيىن ارقاعا اۋا تولتىرىلعان باللوندى ىلەمىز. وندا 12 ليتردەي اۋا بولادى. باللوننىڭ سالماعى – 16 كەلى. اۋىر دەيسىز بە؟ سۋدىڭ تۇڭعيىعىنا جەتۋ ءۇشىن بۇل سالماق تا جەتكىلىكسىز. سول ءۇشىن بەلىمىزگە تاعى 16 كەلىلىك تاس بايلايمىز, – دەدى نۇربولات الگى سايمانداردى كورسەتىپ جاتىپ.
سۇڭگۋىردىڭ ەڭ باستى قۇرالدارىنىڭ ءبىرى – پىشاق پەن ارقان. كەزدىك سۋعا باتقان كىسىنىڭ اياعى ابايسىزدا بالدىرعا نە جىپكە ورالىپ قالعان ۋاقىتتا كەرەك. ال ارقان ارقىلى قۇتقارۋشىلار ءوزارا «ۇعىنىسادى». ونىڭ ءبىر ۇشى سۇڭگۋىردە بولسا, ءبىر ۇشىن جەر بەتىندەگى ارىپتەستەرى ۇستاپ, باعىت بەرىپ وتىرادى.
نۇربولات سۋمەن عانا ەمەس, ارالارمەن دە «ارپالىسقان» ەكەن. عيمارات ىشىنە كىرىپ الىپ, ءتىرى جاندى جانىنا جولاتپايتىن سارىالا ارالار بۇل جىگىتتەن كادىمگىدەي قايمىعادى. ارينە, الدىمەن تىستەۋىش جاندىكتەردەن قورعايتىن كيىم كيۋدى ۇمىتپاۋ قاجەت.
– مۇنى مايدا-شۇيدە جۇمىس دەپ الدەبىرەۋلەر مەنسىنبەۋى مۇمكىن. بىراق ارالار شىنىندا دا ادامداردىڭ مازاسىن قاشىرىپ, تىنىشىن بۇزادى. سوندىقتان ۇيىنە نە وفيسىنە اڭداۋسىزدا ارا كىرىپ كەتسە, حالىق دەرەۋ ءبىزدى شاقىرا قويادى. ساۋعا سۇراعاندارعا جاردەمدەسۋ – ءبىزدىڭ مىندەتىمىز, – دەپ جىميدى قۇتقارۋشى جىگىت.
يت يەسىنە تارتادى
ايتپاقشى, اەروموبيلدى جاساقتىڭ جەمىستى جۇمىسىنا ءتورت اياقتىلار دا بىردەن-ءبىر سەبەپكەر.
– بىزدە 8 ءيىسشىل يت بار. ولار – ءۇيىندىنىڭ اراسىنان ادام ىزدەگەندە نەمەسە ەلسىز جەردە كىسى جوعالىپ كەتكەندە تاپتىرماس كومەكشى, – دەدى قۇتقارۋشى ءارى كينولوگ نۇربەك كارىباي.
– يتتەردى بۇل «جۇمىسقا» قالاي ۇيرەتەدى؟
– كۇشىك كەزىندە الاڭعا شىعارىپ, ادام ىزدەتەمىز. بىرەۋىمىز كورىنبەيتىن تۇستا تىعىلىپ جاتىپ, جانۋاردىڭ قىراعىلىعى مەن ءيىس سەزگىشتىك قاسيەتىن بايقايمىز.
باقساق, قۇتقارۋشىلار نەبىر توسىن شاقىرۋلارعا اتتانىپتى. بالالارى باستارىنا قۇمىرا كيىپ, قايتا شىعارا الماي قالعان نەمەسە كىلتىن ۇيگە ۇمىتىپ كەتىپ, ەسىگىن اشا الماي اۋرەگە تۇسكەن تۇرعىندار دەرەۋ وسى قىزمەتكە جۇگىنەدى. ول ول ما, ساۋساعىنا ساقينا كەپتەلىپ قالعان ايەلدەر دە قۇتقارۋشىلارعا تەلەفون سوعاتىن كورىنەدى. قىزىعى, ءار كەدەرگىدەن بەلگىلى ءبىر ايلا-تاسىلدەرمەن شىعۋعا بولادى. مىسالى, سوڭعى سيتۋاتسيادا كۇپ بولىپ ىسكەن ساۋساقتى ساقينا تۇستان جىڭىشكە جىپپەن ورايمىز. ءجىپ وراعان سايىن ساۋساق تا قىسىلىپ, ساقينانىڭ شىعۋى جەڭىلدەيدى. ابدەن تارتىلعاندا, ءجىپتىڭ ۇشىن جۇزىكتەن وتكىزىپ, تىرناققا قاراي سىرعىتامىز. ساقيناڭىز دا, ساۋساعىڭىز دا ءدىن امان.
قۇتقارۋشىلار سىناپ توگىلگەن جەردى دە تۇگەلدەي زالالسىزداندىرادى, ىشتەن كىلتتەنىپ قالعان ەسىگىڭىزدى دە اشۋعا كومەكتەسەدى, اعاشقا ورمەلەپ تومەن تۇسە الماي قالعان مىسىعىڭىزدى دا قولىڭىزعا تابىستايدى, قۇدىققا قۇلاپ كەتكەن ءيتىڭىزدى دە وزىڭىزگە قايتارادى. قىسقاسى, نەندەي قاۋىپكە دە تويتارىس بەرىپ, بۇقارانىڭ جايلى تۇرمىسىن كۇزەتەدى. بۇدان كەيىن ولاردى «سۋپەرمەنگە» تەڭەمەي كورىڭىز.
بوتاگوز ماراتقىزى
