«استانا» ءۇشىن ەرتەڭ وتە تارتىستى ويىن وتكەلى تۇر. ۋەفا اياسىنداعى چەمپيوندار ليگاسىنىڭ ەكىنشى كەزەڭىندە سىنعا ءتۇسىپ جاتقان ەلوردالىقتار ليتۆا چەمپيونى «جالگيريس» كومانداسىن قابىلدايدى.
بۇل كوماندالار اراسىنداعى ءبىرىنشى ويىندا ەسەپ اشىلماعان ەدى. ۆيلنيۋستە تەڭ تۇسكەن قوس كوماندانىڭ تاعدىرى, ياعني قاي كوماندانىڭ كەلەسى اينالىمعا وتەتىنى ەرتەڭ «استانا ارەنا» الاڭىندا شەشىلەتىن بولادى. بۇل ويىندا تەڭ ناتيجە تىركەلمەيدى. ەسەپ تاعى دا اشىلمايتىن بولسا, وندا قوسىمشا 30 مينۋت ويىن وتكىزىلەدى, ەگەر بۇل ۋاقىتتا دا جەڭىمپاز انىقتالماسا, ماتچ سوڭىنداعى پەنالتي سوعىلاتىن بولادى. ال قاي جەڭگەنى كەلەسى راۋندتا شوتلانديانىڭ «سەلتيك» نەمەسە گيبرالتاردىڭ «لينكولن» كومانداسىمەن كەزدەسەتىن بولادى.
سونىمەن, ەرتەڭ, 20 شىلدە كۇنى «استانا» چل تۋرنيرىندەگى قارىمتا ماتچ ويىنىن وتكىزەدى. ماتچ «استانا ارەنا» ستاديونىندا ساعات 20.00-دە باستالادى. بيلەتتەر باعاسى 500-2500 تەڭگە ارالىعىندا. ستاديون كاسساسىندا جانە ونلاين رەجيمىندە ساتىلىپ جاتىر. ال, وتكەن دەمالىس كۇندەرى قازاقستان چەمپيوناتىنىڭ پرەمەر-ليگاسىندا كەزەكتى تۋردىڭ ويىندارى ءوتتى. «استانا» ءوز الاڭىندا «اتىراۋ» كومانداسىن قابىلداپ, 2:1 ەسەبىمەن جەڭىسكە جەتتى.
«استانا ارەنا» ستاديونىندا وتكەن ويىندا ءبىرىنشى بولىپ اتىراۋلىق جانكۇيەرلەر قۋانىشقا بولەندى. ويىننىڭ جەتىنشى مينۋتىندا قوناقتار شابۋىلشىسى ۆلاديمير ارجانوۆ ەسەپ اشتى. بۇل گول «استانالىقتارعا» قامشى بولىپ ءتيدى. جان-جاقتان شابۋىلدى ۇدەتە تۇسكەن الاڭ يەلەرى قوناقتار قاقپاسىنا بىرنەشە رەت ەسەپتى تەڭەستىرۋگە مۇمكىندىك العان. الايدا, «اتىراۋ» قاقپاشىسى شەبەرلىگىن كورسەتە ءبىلدى.
دەگەنمەن, «استانا» ويىنشىلارىنىڭ كەزەكتى ءبىر كومبيناتسياسى ءوز جەمىسىن بەردى. ءتۆۋماسيدىڭ پاسىن ازات نۇرعاليەۆ وتە ءساتتى پايدالانىپ, جيىرماسىنشى مينۋتتا الا دوپتى قارسىلاستار قاقپاسىنىڭ بۇرىشىنا توپ ەتكىزدى. وسىلايشا, ەسەپ تەڭەستى. ال ويىننىڭ 39-شى مينۋتىندا سول نۇرعاليەۆ تاعى دا مەرگەندىگىمەن تانىلدى. جاقىندا عانا «ورداباسى» كومانداسىنان «استانا» قۇرامىنا كەلگەن ازات ەلوردالىق ۇجىمعا وسىلايشا ءساتتى ءسىڭىسىپ كەتتى دەسە بولادى.
ۇزىلىسكە دەيىن تىركەلگەن 2:1 ەسەبى ماتچ سوڭىنا دەيىن وزگەرمەدى. ءسويتىپ, «استانا» بيىلعى ماۋسىمداعى ون جەتىنشى جەڭىسىنە قول جەتكىزدى.
تۋردىڭ باسقا ويىندارىندا مىنانداي ناتيجەلەر تىركەلدى: «اقتوبە» – «شاحتەر» 2:0, «جەتىسۋ» – «اقجايىق» 2:0, «ەرتىس» – «قايرات» 2:3, «توبىل» – «وقجەتپەس» 0:1, «ورداباسى» – «تاراز» 0:3.
الداعى دەمالىس كۇندەرى ۇلتتىق چەمپيوناتتىڭ ءبىرىنشى ەتاپى اياقتالادى. سودان كەيىن العاشقى التى كوماندا جۇلدەلەر ءۇشىن جارىستى جالعاستىراتىن بولسا, قالعان التى كوماندا پرەمەر-ليگادا قالۋ ماقساتىندا وينايتىن بولادى.
ازىرگە تۋرنير كەستەسىن 53 ۇپايمەن «استانا» باستاپ كەلەدى. ەكىنشى ورىندا 43 ۇپايمەن «قايرات» كەلەدى. ۇزدىك ۇشتىكتى «ەرتىس» تۇيىندەپ تۇر.
عالىم قوجابەكوۆ
