استانادا ستراتەگيالىق ارىپتەستىك جانە ىنتىماقتاستىق تۋرالى كەلىسىمگە قول قويىلدى
قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ استاناعا رەسمي ساپارمەن كەلگەن ۇلىبريتانيا جانە سولتۇستىك يرلانديا قۇراما كورولدىگىنىڭ سىرتقى ىستەر, دوستاستىق جانە حالىقارالىق دامۋ ءمينيسترى دەۆيد كەمەرونمەن كەلىسسوزدەر وتكىزدى, دەپ حابارلايدى astana-akshamy.kz
كەزدەسۋ بارىسىندا تاراپتار ەكىجاقتى, وڭىرلىك جانە حالىقارالىق ىنتىماقتاستىقتىڭ وزەكتى ماسەلەلەرىن, سونداي-اق قازاقستان مەن ۇلىبريتانيا اراسىنداعى قارىم-قاتىناستارىنىڭ بارلىق اۋقىمىن جانداندىرۋ شارالارىن تالقىلادى.
م.نۇرتىلەۋ سوڭعى جىلدارى ءارتۇرلى سالالارداعى ارىپتەستىكتىڭ ۇدەمەلى تەرەڭدەۋىنە ىقپال ەتكەن ۆەدومستۆوارالىق جانە پارلامەنتارالىق بايلانىستاردىڭ جوعارى سەرپىنىن قۇپتادى جانە ەكى ەلدىڭ سىرتقى ىستەر مينيسترلىكتەرى دەڭگەيىندەگى ديالوگتى ودان ءارى كەڭەيتۋگە دايىن ەكەنىن راستادى.
ساۋدا-ەكونوميكالىق جانە ينۆەستيتسيالىق سالالارداعى ءوزارا ءىس-قيمىلدى ارتتىرۋ ماقساتىندا قر ءسىم باسشىسى ىنتىماقتاستىقتىڭ ينستيتۋتسيونالدىق تەتىكتەرىنىڭ, سونىڭ ىشىندە ستراتەگيالىق ديالوگ پەن ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسياسىنىڭ جۇمىسىن ارتتىرۋدىڭ ماڭىزدىلىعىن اتاپ ءوتتى.
د.كەمەرون ۇلىبريتانيانىڭ ورتالىق ازياداعى نەگىزگى ارىپتەسى – قازاقستانمەن ىنتىماقتاستىقتى دامىتۋ ماسەلەسىنە ەرەكشە كوڭىل بولەتىنىن, سونداي-اق ەلىمىزدە جۇرگىزىلىپ جاتقان رەفورمالاردى قولدايتىنىن ايتتى جانە لوندوننىڭ استانامەن ىنتىماقتاستىقتى تەرەڭدەتۋگە دايىن ەكەنىن راستادى.
سىرتقى ىستەر مينيسترلىگىندەگى كەلىسسوزدەردىڭ ماڭىزدى ناتيجەسى – سىرتقى ساياسات پەن قاۋىپسىزدىك, ساۋدا مەن ينۆەستيتسيانى ىلگەرىلەتۋ, زياتكەرلىك مەنشىكتى قورعاۋ, ەنەرگەتيكالىق جانە شيكىزاتتىق ارىپتەستىك, كولىك, قورشاعان ورتانى قورعاۋ جانە كليماتتىڭ وزگەرۋى, بانكتىك جانە قارجىلىق قىزمەتتەر, جۇمىسپەن قامتاماسىز ەتۋ مەن الەۋمەتتىك ساياسات, عىلىم جانە ءبىلىم سياقتى ماڭىزدى سالالارداعى ىنتىماقتاستىقتى كۇشەيتۋگە باعىتتالعان قازاقستان مەن ۇلىبريتانيا اراسىنداعى ستراتەگيالىق سەرىكتەستىك پەن ىنتىماقتاستىق تۋرالى تاريحي كەلىسىمگە قول قويۋ بولدى.
وسى ورايدا م.نۇرتىلەۋ اتاپ وتكەندەي, «بۇل جان-جاقتى كەلىسىم استانا مەن لوندون اراسىنداعى ساياسي, ساۋدا جانە ينۆەستيتسيالىق قارىم-قاتىناستاردى جاڭا كوكجيەكتەرگە شىعارۋعا ەلەۋلى كومەك بولماق… ءبىز ورنىقتى جانە ءوزارا ءتيىمدى قازاق-بريتان ستراتەگيالىق ارىپتەستىگى جوعارىدا كورسەتىلگەن سالالاردا – ەنەرگەتيكا مەن سيرەك مەتالداردان باستاپ ەكولوگيا مەن ءبىلىم سالاسىنا دەيىن ودان ءارى نىعايادى دەپ سەنەمىز».
ساپار بارىسىندا سونداي-اق دەنساۋلىق ساقتاۋ جانە كولىك سالاسىندا بىرقاتار ەكىجاقتى قۇجاتتار, سونداي-اق الماتىدا بريتاندىق «Queen’s University Belfast» ۋنيۆەرسيتەتىنىڭ فيليالىن اشۋ جانە وكسفوردتا قازاق ءتىلىن وقىتۋ باعدارلاماسىن ىسكە اسىرۋ تۋرالى مەموراندۋمدار قابىلداندى.
انىقتاما: قازاقستان رەسپۋبليكاسى مەن ۇلىبريتانيا اراسىنداعى تاۋار اينالىمى 2023 جىلى 1,2 ملرد اقش دوللارىن قۇرادى (ەكسپورت – 703 ملن, يمپورت – 478,7 ملن).
قازاقستاندا بريتاندىق كاپيتالدىڭ قاتىسۋىمەن 600-گە جۋىق كومپانيا, بىرلەسكەن كاسىپورىن مەن وكىلدىك جۇمىس اتقارۋدا.
ۇلىبريتانيا قازاقستانداعى ەڭ ءىرى شەتەلدىك ينۆەستورلاردىڭ وندىعىنا كىرەدى. 2023 جىلى ۇلىبريتانيادان قازاقستان ەكونوميكاسىنا 795 ملن دوللار كولەمىندە تىكەلەي شەتەلدىك ينۆەستيتسيالار تارتىلدى, جالپى 2005 جىلدان بەرى بۇل كورسەتكىش 17 ملرد دوللاردان استام بولدى.
