كوكىرەگىندە ساۋلەسى بار ادام كىتاپحاناعا بارادى, كىتاپ وقيدى. بيىك مادەنيەتتىڭ, بارلىق ءبىلىمنىڭ باستاۋى دا, قولداۋشىسى دا وسى جەر. ەلوردا – تەك ونەر مەن ءوندىرىستىڭ ورتالىعى عانا ەمەس, عۇمىرى ومىرشەڭ كىتاپحانالار مەكەنى. «استانا قالاسىنىڭ ورتالىقتاندىرىلعان كىتاپحانالار جۇيەسى» كوممۋنالدىق مەملەكەتتىك مەكەمەسى – استانا مادەنيەتىنىڭ ءبىر بولىگى.
رۋحاني ورتادا – قىزۋ تىرشىلىك
«استانا قالاسىنىڭ ورتالىقتاندىرىلعان كىتاپحانالار جۇيەسى» كوممۋنالدىق مەملەكەتتىك مەكەمەسىنە قاراستى ەلوردالىق كىتاپحانالار – كوركەم ادەبيەتتىڭ قوماقتى قورى جيناقتالعان, بارۋشىلار ءۇشىن ىزدەگەن كىتاپتارىن جەدەل جانە شىعىنسىز تانىسۋعا مۇمكىندىك بەرەتىن باستى دەرەككوز. ياعني بۇل جەر وقۋ, جۇمىس جانە قارىم-قاتىناس, شىعارماشىلىق دامۋ ءۇشىن اشىق كەڭىستىككە اينالدى. مۇندا كۇن سايىن قىزىقتى ءىس-شارالار, تاڭعاجايىپ جانە ينتەللەكتۋالدى ادامدارمەن كەزدەسۋلەر وتەدى.
– ەلوردالىق ورتالىقتاندىرىلعان كىتاپحانالار جۇيەسىنىڭ قىزمەتكەرلەرى «وقيتىن قازاقستان – وقيتىن ۇلت» جوباسى اياسىنداعى «Astana Eurasian Book Fair-2024» حالىقارالىق كىتاپ كورمەسىن ۇيىمداستىرۋعا جانە وتكىزۋگە بەلسەنە قاتىستى. كىتاپ كورمەسىنىڭ نەگىزگى ماقساتى – كىتاپ وقۋدى ناسيحاتتاۋ, ادەبي مۇرانى قولداۋ جانە دامىتۋ, وقىرمان مادەنيەتىن قالىپتاستىرۋ, سوندىقتان بىزگە قاراستى كىتاپحانالار, ونىڭ بىلىكتى قىزمەتكەرلەرى بۇل ۇدەدەن شىعا ءبىلدى, – دەيدى استانا قالاسى اكىمدىگى ورتالىقتاندىرىلعان كىتاپحانالار جۇيەسى مەكەمەسى كىتاپحانانى دامىتۋ جانە ادىستەمەلىك جۇمىس قىزمەتىنىڭ باسشىسى ساۋلە ۋرازباەۆا.
جاقىندا عانا وتكەن كىتاپ كورمەسى كەزىندە وسى مەكەمەگە قاتىستى كىتاپحانالار جەتەكشى باسپالاردىڭ كىتاپ ونىمدەرىنىڭ ەڭ ۇزدىك زاماناۋي اسسورتيمەنتى بويىنشا الەۋەتتى پايدالانۋشىلارعا ۋاقىتىلى اقپارات بەرۋ, الەم دەڭگەيىندەگى كىتاپتاردى شىعارۋ جانە باسپا يندۋسترياسىنىڭ تاجىريبەسىن زەردەلەۋ, ءارتۇرلى حالىقتىڭ ۇلتتىق ادەبيەتىمەن تانىسۋ, باسپا سالاسىنداعى جەتىستىكتەرمەن بايلانىس ورناتۋ جانە كورسەتۋ, ادەبيەتتىڭ, كىتاپ مادەنيەتىنىڭ قازىرگى دامۋى مەن ونىڭ تارالۋىن تالداۋ ارقىلى دوستىق پەن ءوزارا ىنتىماقتاستىقتى نىعايتۋ سەكىلدى جوعارى تالاپتاردى زور جاۋاپكەرشىلىكپەن, ناعىز كاسىبي بىلىكتىلىكپەن اتقاردى.
ناعىز وقىرماندار – بالالار
17-20 ءساۋىر ارالىعىندا كونگرەسس-ورتالىقتىڭ بالالار ايماعىندا اشىق اقپاراتتىق-تانىمدىق ءىس-شارالار ءوتتى. ونى قالانىڭ قوعامدىق جانە مادەني ورتالىقتارىمەن بىرلەسىپ قالانىڭ ورتالىقتاندىرىلعان كىتاپحانالار جۇيەسى مەكەمەسى كىتاپحانالارىنىڭ قىزمەتكەرلەرى ۇيىمداستىردى. مىسالى, 17 ساۋىردە جانار باتىرعاليەۆا مەن ايسۇلۋ اكۋلوۆانىڭ «ونەر ارقىلى ساياحات» ارت-تەراپياسى «زامانداس» وتباسى اۋلا كلۋبىمەن بىرگە ەرەسەك بالالارعا ارنالدى. بالالار جازۋشىسى زاۋرە تورەحانمەن وتكەن «بالالاردىڭ تالعامىن تاپقان جازۋشى» كەزدەسۋى وتە قىزىقتى, تارتىمدى ءوتتى. بالالار جازۋشىسى بۇلدىرشىندەرگە ارنالعان كىتاپتارىن تانىستىرىپ, كەيىپكەرلەرىن «سويلەتتى». سونداي-اق مەكتەپكە دەيىنگى بالالار ءۇشىن ۇيىمداستىرىلعان «قارا شاڭىراق» ۇيىمىنىڭ جەتەكشىسى تۇرار ساتتارقىزىنىڭ «كىتاپپەن دوس بولامىز» شەبەرلىك سىنىبى ايرىقشا اسەرمەن وتسە, «كوڭىلدى سۋرەتتەر» بالالار ستۋدياسىنىڭ قاتىسۋشىلارى ستۋديا جەتەكشىسى ەلەنا وستاپچۋكپەن بىرگە كورمەگە كەلگەن بارلىق بالاعا ارنالعان «ءوز قيالىڭداعى ەرتەگى» شىعارماشىلىق شەبەرحاناسىن تاماشا ۇيىمداستىردى.
– ءبىزدىڭ كىتاپحانالاردىڭ «Astana Eurasian Book Fair-2024» حالىقارالىق كىتاپ كورمەسىنە قاتىسۋى – رۋحانياتتاعى وتە ماڭىزدى وقيعا. ءويتكەنى وسى كورمەلەر ارقىلى ەلوردا تۇرعىندارى مەن قوناقتارى رەسپۋبليكا وڭىرلەرىنىڭ ولكەتانۋ ادەبيەتىمەن, سونداي-اق قازاقستاندىق جازۋشىلار مەن اقىنداردىڭ كوركەم شىعارمالارىنىڭ تاماشا ۇلگىسىمەن تانىستى, – دەيدى استانا قالاسى اكىمدىگى ورتالىقتاندىرىلعان كىتاپحانالار جۇيەسى مەكەمەسى كىتاپحانانى دامىتۋ جانە ادىستەمەلىك جۇمىس قىزمەتىنىڭ باسشىسى ساۋلە ۋرازباەۆا.
بەرەكە باستاۋى – تاتۋ تىرلىك
ەل ىشىندەگى بەرەكەلى, تاتۋ تىرلىكتى قولداعان حالقىمىز تۇتاستىق قاعيداسىن بەرىك ۇستانىپ كەلەدى. وسىعان قاتىستى قالا كىتاپحانالارىندا ءتۇرلى ءىس-شارا تۇراقتى ءوتىپ تۇرادى.
قالىڭ وقىرمانعا قالا جۇيەلەرىنىڭ كىتاپحانالارىندا «ۇلت بىرلىگى – ۇلى بايلىق», «حالىقتاردى بىرىكتىرگەن ەل», «بىرلىكپەن, دوستىقپەن جانە ەڭبەكپەن مىقتىمىز», «ۇلتتار دوستىعى – تۇراقتىلىق كەپىلى», «ىنتىماعى جاراسقان تۋعان ولكەم – قازاقستان», تاعى باسقا كوپتەگەن كىتاپ كورمەسى, ينستاللياتسيا دايىندالىپ, وتكىزىلدى.
كورمەلەردە ۇسىنىلعان ماتەريالدار, قۇجاتتار مەملەكەتىمىزدىڭ ۇلتارالىق كەلىسىمدى ساقتاۋ جانە نىعايتۋ مىندەتىن باياندايدى. قالامىزدا, ەلىمىزدە تۇراتىن حالىقتىڭ ۇلتتىق قۇندىلىقتارىن, مادەنيەتىن ساقتاپ, دامىتۋعا ىقپال ەتەتىن ەتنومادەني بىرلەستىكتەردىڭ, ورتالىقتاردىڭ ءرولىن كورسەتەدى.
ورتالىق قالالىق كىتاپحانانىڭ قىزمەت كورسەتۋ بولىمىندە «دوستىعى جاراسقان ەل» دوستىق كەشى, №9 كوپشىلىك كىتاپحانانىڭ «تاتۋلىق – ەل تىرەگى» بالالار مەرەكەسى, №2 كوپشىلىك كىتاپحانانىڭ «ۇلتتار دوستىعى» پاتريوتتىق ساعاتى, «مەنىڭ قازاقستانىم, سەنى انگە قوسقىم كەلەدى!» №8 بالالار كىتاپحاناسىندا دوستىق مەرەكەسى قىزىقتى ءوتتى. وندا كىتاپحانا قىزمەتكەرلەرى ءىس-شاراعا قاتىسۋشىلارعا بەيبىتشىلىكتى ساقتاۋ جولىندا ادامدار اراسىنداعى دوستىق قارىم-قاتىناستىڭ ماڭىزىن ايتىپ, ءوز وتانىنىڭ تاريحىن ءبىلۋ, باسقا حالىقتارمەن ۇيلەسىمدى ءومىر ءسۇرۋ قانشالىقتى ماڭىزدى ەكەنىن ناسيحاتتادى.
حالىقارالىق بالالار كىتابى كۇنى – قالالىق كىتاپحانالارداعى بالالارعا ارنالعان ناعىز سيقىرلى ەرتەگىلەر كۇنى مەرەكەسى. مەرەكە اياسىندا قالالىق جۇيەدەگى كىتاپحانالاردا كىتاپ پەن وقۋدى ناسيحاتتاۋدا «كىتاپپەن الەمدى باعىندىر!» PR-اكتسياسى ءوتتى. ونىڭ ماقساتى – كىتاپقا دەگەن قىزىعۋشىلىق پەن سۇيىسپەنشىلىكتى تاربيەلەۋ, كىتاپ وقۋعا ىنتالاندىرۋ, كىتاپ وقۋدى ناسيحاتتاۋ, كىتاپپەن قارىم-قاتىناس مادەنيەتىن ساقتاۋ, بالالاردى كوركەم ءماتىندى تىڭداۋعا جانە تۇسىنۋگە ۇيرەتۋ.
الەمدى باعىندىر!
ەلوردادا «كىتاپپەن الەمدى باعىندىر!» اكتسياسى اياسىندا قىزىقتى ءىس-شارالار ۇيىمداستىرىلدى. «كىتاپ الەمى دوستاردى جينايدى» كورمە-ينستاللياتسياسىن ورتالىق قالالىق كىتاپحانانىڭ قىزمەت كورسەتۋ ءبولىمى وتكىزدى. «كىتاپپەن الەمدى باعىندىر!» اكتسياسى كەزىندە بالالار جازۋشىسىمەن موتيۆاتسيالىق كەزدەسۋ ورتالىق بالالار-جاسوسپىرىمدەر كىتاپحاناسىنىڭ قابىرعاسىندا ءوتتى. «مەنىڭ العاشقى كىتابىم» ادەبي-تانىمدىق ويىنىن №3 كوپشىلىك كىتاپحانا قىزمەتكەرلەرى №68 مەكتەپ-گيمنازيا وقۋشىلارىنا ارنادى. كىتاپحانا قىزمەتكەرلەرى وسى ءىس-شارالاردا بالالاردى ايگىلى ەرتەگىلەر شىعارماشىلىعىمەن, ادەبي كەيىپكەرلەرىمەن تانىستىردى. كەزدەسۋلەردىڭ ماقساتى – بالالاردىڭ كىتاپ وقۋعا دەگەن قىزىعۋشىلىعىن وياتۋ, جاس جەتكىنشەكتەردىڭ كىتاپقا دەگەن مادەنيەتىن تاربيەلەۋ جانە وقۋ ارقىلى شىعارماشىلىعىن دامىتۋ, كىتاپحاناعا جۇيەلى تۇردە بارۋعا ىنتالاندىرۋ.
عارىشتى يگەرەيىك!
جىل سايىن ورتالىقتاندىرىلعان كىتاپحانالار جۇيەسى مەكەمەسىنىڭ قىزمەتكەرلەرى دۇنيەجۇزىلىك عارىشكەرلەر جانە اۆياتسيا كۇنىن اتاپ وتەدى.
– قىزىقتى تاقىرىپ توڭىرەگىندە وتكەن قوعامدىق ءىس-شارالار: «ادام عالامدى اشادى» عارىش ساعاتى, «عارىشقا ساپار», «ەلىمىزدىڭ ماقتانىشتارى – قازاق عارىشكەرلەرى», «جەردەگى تارتىمدىلىققا قارسى تۇرا» تانىمدىق ساعاتى, «بەلگىسىز جۇلدىزدارعا ۇشىپ, عارىشقا ادام شىقتى…» تانىمدىق ساباعى. كىتاپحانا قىزمەتكەرلەرى ءىس-شارالار ارقىلى جۇلدىزدارعا قالاي جاقىنداۋعا بولاتىنى, مۇنداي باتىل ارماننىڭ نەگە اپارارى تۋرالى قىزىقتى اقپارات بەرۋگە تىرىستى. بايقوڭىر عارىش ايلاعى, العاشقى عارىشكەرلەر جانە ادام ارقاشان جۇلدىزدارعا, بيىككە, كۇنگە جاقىنىراق ۇشۋدى ارماندايتىنى تۋرالى, ادامزاتتىڭ عالامعا جەڭىستى شىعۋى قازاقستان جەرىنەن باستالعانى تۋرالى تاماشا اقپاراتتار ايتىلدى. وقۋشىلار عارىش, بەلگىلى عارىشكەرلەر تۋرالى ءبىلىمىن كوبەيتىپ, ارمانىنا قانات بايلاپ, بولاشاققا سەنىممەن قاراۋىنا, ەستە ساقتاۋ قابىلەتىن, لوگيكاسى مەن ويلاۋىن دامىتۋعا, ءوز ەلى ءۇشىن ماقتانىش سەزىمىن تاربيەلەۋگە ىقپال ەتكەنى انىق, – دەيدى ساۋلە قابدەشقىزى.
ەڭبەك ادامى –ەلدىڭ قۇتى
قازىرگى قوعامدا ەڭبەك ادامىن, ءوز ءىسىنىڭ بىلگىرىن ناسيحاتتاۋ وزەكتى. قالا كىتاپحانالارىنىڭ باسىم مىندەتىنىڭ ءبىرى – وقىرماندار اراسىندا ەڭبەك قۇندىلىعى يدەولوگياسىن ىلگەرىلەتۋ بويىنشا جۇمىس ۇيىمداستىرۋ.
– قوعامداعى ەڭبەك قۇندىلىعى يدەولوگياسىن ناسيحاتتاۋ, ءوز كاسىبىنىڭ شەبەرلەرى ءىسىن ىلگەرىلەتۋگە قاتىستى اتقارىلعان جۇمىس قوماقتى. وقۋ زالىندا كىتاپ كورمەلەرى, تاقىرىپتىق بۇرىشتار ۇنەمى جۇمىس ىستەيدى, «ەڭبەك ادامى – ەل ءال-اۋقاتىنىڭ نەگىزى», «شىعارماشىلىق جانە جاسامپاز ەڭبەك», «مەن ءوز جۇمىسىمدى جاقسى كورەمىن» جانە تاعى باسقا كىتاپ كورمەلەرىندەگى قۇندى ماتەريالدار, قىزىقتى قۇجاتتار ەڭبەككە ىنتالاندىرۋدىڭ وڭ مىسالىن كورسەتەدى, ەڭبەك ادامىنا قۇرمەتپەن قاراۋعا باستايدى, – دەيدى ساۋلە قابدەشقىزى.
وسى ورايدا №1 كوپشىلىك كىتاپحانا قىزمەتكەرلەرى استاناداعى №7 سپورت مەكتەبىنىڭ وقۋشىلارىمەن «ەڭبەك ءبارىن جەڭبەك» ەڭبەك ساعاتىن ۇيىمداستىرىپ, وتكىزدى. كەزدەسۋلەردە كىتاپحانا قىزمەتكەرلەرى قاتىسۋشىلاردىڭ ءارتۇرلى كاسىپ تۋرالى وي-ءورىسىن كەڭەيتىپ قانا قويماي, جۇمىسشى كاسىبىنىڭ بەدەلىن كوتەرۋگە تىرىستى. ەڭبەك ادامىنا قۇرمەتپەن قاراۋ, ماماندىق تاڭداۋدا جاستاردىڭ كاسىبي باعدار الۋى, ەڭبەككە الەۋمەتتىك قىزىعۋشىلىقتى تارتۋدى ماقسات ەتتى.
تاريحتى تانۋ –ءوزىڭدى تانۋ
بيىل بەلگىلى اۆتورلاردىڭ, اقىنداردىڭ, تانىمال تۇلعالاردىڭ مەرەيتويى اتالىپ وتەدى. كىتاپحانا قىزمەتكەرلەرى قالىڭ وقىرمان اراسىندا جازۋشىلاردىڭ, اقىنداردىڭ, مادەنيەت, قوعام قايراتكەرلەرىنىڭ شىعارماشىلىق مۇراسىن ناسيحاتتاۋ جولىندا ەڭبەكتەنىپ ءجۇر.
كىتاپحانا قىزمەتكەرلەرى جوشى ۇلىسىنىڭ قۇرىلعانىنا 800 جىل تولۋىن قالىڭ وقىرمان اراسىندا اتاپ ءوتىپ, مەملەكەتىمىزدىڭ عاسىرلار بويى تۇپكى تامىرىن كورسەتۋگە تىرىستى. مىسالى, №2 كوپشىلىك كىتاپحانانىڭ قىزمەتكەرلەرى №49 ورتا مەكتەپتىڭ 9-سىنىپ وقۋشىلارىنا «جوشى حان جانە ونىڭ ۇلىسى» اتتى تاريحي ساباق ۇيىمداستىرسا, «التىن وردا – جوشى ۇلىسى» كىتاپ ەكسپوزيتسياسىنىڭ ادەبيەتتەرىنە ءبىر اي بويى ورتالىق قالالىق كىتاپحانانىڭ قىزمەت كورسەتۋ ءبولىمى وقۋ زالىنىڭ قىزمەتكەرلەرى شولۋ جاسادى.
كىتاپحانا قىزمەتكەرلەرى دەرەكتى ماتەريالدارعا, تاريحي قۇجاتتارعا سۇيەنە وتىرىپ, وقىرماندارعا جوشى ۇرپاقتارىنىڭ التى عاسىر بويىنداعى, 1224-1860 جىلدار ارالىعىنداعى قازاقستان تاريحىن كورسەتتى. كوپتەگەن دجۋچيد كەيىنىرەك ءبىزدىڭ تاريحىمىزدا ماڭىزدى ءرول اتقاردى. ولار: ءاليحان بوكەيحانوۆ, شوقان ءۋاليحانوۆ, ەرمۇحان بەكماحانوۆ, سانجار اسفەندياروۆ جانە تاعى باسقا قازاقتىڭ ءبىرتۋار تانىمال تۇلعالارى.
استانا قالاسى اكىمدىگىنىڭ «ورتالىقتاندىرىلعان كىتاپحانالار جۇيەسى» كوممۋنالدىق مەملەكەتتىك مەكەمەسىنىڭ قۇرامىنا 18 كىتاپحانا كىرەدى. كىتاپحانانىڭ جالپى كىتاپ قورى – 738000. وقىرمان سانى 83200-دەن اسادى.
