قالا كوشەلەرىندە دەمالۋعا ارنالعان ورىندىقتار مەن قوقىس جاشىكتەرى ورناتىلىپ, جاياۋ جۇرگىنشىلەرگە ارنالعان جولدار جوندەلۋدە. بۇل تۋرالى ەسىل اۋدانىنىڭ اكىمى اسىلبەك ەسەنباەۆ ءمالىم ەتتى.
ەلورداداعى دوستىق, قوناەۆ كوشەلەرى, ماڭگىلىك ەل داڭعىلى الاڭىنداعى جاياۋ جۇرگىنشىلەرگە ارنالعان جولداردى اباتتاندىرۋ جۇمىستارى جوسپارعا ساي جۇرگىزىلۋدە.
– قوزعالىس مۇمكىندىگى شەكتەۋلى ادامداردىڭ قاجەتتىلىكتەرىن ەسكەرە وتىرىپ, كەڭەيتىلگەن پاندۋستاردى سالىپ جاتىرمىز. ەسىلدىڭ سول جاعالاۋىنداعى دوستىق, قوناەۆ كوشەلەرى مەن ماڭگىلىك ەل داڭعىلى – استاناداعى ادام ەڭ كوپ جۇرەتىن جەرلەردىڭ ءبىرى. بۇل اۋداندا مىڭداعان تۇرعىن بار, ولاردىڭ بارلىعى دەرلىك جاياۋ جۇرگىنشىلەرگە ارنالعان جولدارمەن كۇنىنە بىرنەشە رەت وتەدى. سوندىقتان وسى ماڭدا جۇرگىزىلىپ جاتقان جۇمىستىڭ كەشىگۋىنە جول بەرمەۋ تۋرالى تاپسىرما بەردىم. كەيبىر جەرلەردى ءالى دە تۇزەتۋ قاجەت. جۇمىستىڭ ساپاسىنا باستى ءمان بەرەمىز. سونداي-اق, بۇل كوشەلەردە تۇرعىنداردىڭ تىنىعىپ, دەمالۋىنا ارنالعان ورىندىقتار, قوقىس جاشىكتەرىن ورناتۋدى دا جوسپارلاپ وتىرمىز, – دەدى اۋدان اكىمى.
قىركۇيەك ايىندا ەسىل اۋدانىندا №96 مەكتەپ اشىلادى. استانا قالاسى كولىك جانە جول-كولىك ينفراقۇرىلىمىن دامىتۋ باسقارماسىنىڭ جوباسى بويىنشا №28/5 كوشە جاعىنان كىرەبەرىس كەڭەيىپ, جارىقتاندىرۋ باعاندارى جىلجىتىلادى.
