جەدەل شارا وتەدى
استانادا 15 ناۋرىز بەن 1 ماۋسىم ارالىعىندا «ۋچاسكە» جەدەل پروفيلاكتيكالىق شاراسى وتەدى. بۇل تۋرالى استانا قالالىق ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆ حابارلادى.
باقىتجان مالىباەۆتىڭ ايتۋىنشا, «ەكسپو-2017» حالىقارالىق كورمەسى قارساڭىندا «ەلورداداعى قاۋىپسىزدىك پەن جايلىلىق» باعدارلاماسى ىسكە اسىرىلادى. اتالعان شاراعا قالالىق ىشكى ىستەر دەپارتامەنتىندەگى بارلىق بولىمشەلەردىڭ جەكە قۇرامى مەن قر ءىىم ۇلتتىق ۇلانىنىڭ جاۋىنگەرلەرى قاتىسادى.
– ۋچاسكەلىك ينسپەكتورلار تۇرعىندار تۋرالى مالىمەت الۋ ءۇشىن پاتەرلەر مەن اۋلالاردى ارالايدى. سونداي-اق, ءوزىنىڭ جانە ىشكى ىستەر باسقارماسىنىڭ كەزەكشى بولىمدەرىنىڭ بايلانىس مالىمەتتەرى بار كارتوچكالار تاراتادى. بۇل شارا ازاماتتاردىڭ قاۋىپسىزدىگىن قامتاماسىز ەتۋگە جانە ەلورداداعى قوعامدىق ءتارتىپتى ساقتاۋعا باعىتتالعاندىقتان, قالا تۇرعىندارى مەن قوناقتارىنان «ۋچاسكە» جەدەل الدىن الۋ ءىس-شاراسىنىڭ وتكىزىلۋىنە تۇسىنىستىكپەن قاراپ, پوليتسيا قىزمەتكەرلەرىنە قولداۋ كورسەتۋلەرىن سۇرايمىز, – دەيدى باقىتجان مالىباەۆ.
ياعني, پوليتسيا قىزمەتكەرلەرى ساياجاي تالاپتارى مەن قۇرىلىس نىساندارىن, بازارلار مەن جالعا بەرىلگەن پاتەرلەردى ارالايدى. جاسالعان تىزىمدەر بويىنشا شارا قولدانۋ ءۇشىن قالالىق مەملەكەتتىك كىرىستەر دەپارتامەنتىنە جىبەرىلەدى.
سونىمەن قاتار, ءتارتىپ ساقشىلارى پوليتسيا ەسەبىندە تۇرعان تۇلعالاردى تەكسەرىپ, ەل اۋماعىندا بولۋ ەرەجەلەرىن بۇزعان شەتەلدىكتەردى انىقتايدى. جەدەل الدىن الۋ شارالارى بارىسىندا ۋچاسكەلىك ينسپەكتورلار ازاماتتاردى ۋاقىتشا تىركەۋ بويىنشا ءتۇسىندىرۋ جۇمىستارىن دا جۇرگىزەدى. شارا كەزىندە ازاماتتىق قارۋى بار جەكە تۇلعالار تەكسەرىلىپ, ولاردىڭ قارۋدى ساقتاۋ جاعدايلارى فوتوسۋرەتكە تۇسىرىلەتىن بولادى.
سەرىك قۇدايبەرگەنۇلى