بۇدان بىلاي جەدەل جاردەم كولىكتەرى كۇندەلىكتى ساعات 08.00-23.00 ارالىعىندا شاقىرتۋعا بارا جاتقاندا جانە ناۋقاستاردى تاسىمالداۋ كەزىندە دابىلدى سيرەنانى قوسىپ جۇرەدى. سونىمەن قاتار, ەلىمىزدە قابىلدانعان جاڭا ستاندارتقا سايكەس كولىكتەرى جاپپاي سارى تۇسكە بويالادى.
جەدەل جاردەم كولىكتەرىنىڭ دىبىستىق دابىلى مەن تۇسىنە قاتىستى ەنگىزىلگەن بۇل وزگەرىستەر تۋرالى استانا قالاسىنىڭ جەدەل مەديتسينالىق جاردەم ستانساسىنىڭ باس دارىگەرى تيمۋر مۇراتوۆ ءباسپاسوز ءماسليحاتىندا ءمالىم ەتتى.
– تاجىريبە كورسەتكەندەي, شۇعىل قىزمەت كولىكتەرى جىلدىڭ قاي مەزگىلىندە دە اۋا رايىنا قاراماستان, ۇنەمى قوزعالىستا بولادى. كەيدە جاڭبىر جاۋىپ, تۇمان تۇسەدى. سونىمەن قاتار, جىلدىڭ 7-8 ايىندا قار جاتادى. مۇنداي ۋاقىتتا اق ءتۇستى كولىكتەرىمىز اينالانىڭ ءبارى اق قار بولعاندىقتان, بىردەن بايقالماي قالىپ جاتادى. سوندىقتان ليمون رەڭكتى سارى ءتۇستىڭ لەزدە كوزگە ءتۇسىپ, ەڭ بايقالاتىن ءتۇس ەكەنى دالەلدەندى, – دەگەن تيمۋر مۇراتوۆ سوڭعى ءبىر ايدان بەرى جەدەل جاردەمنىڭ جولىنداعى كەدەرگىلەردىڭ ازايىپ, وزگەرىستىڭ ەداۋىر اسەر ەتە باستاعانىن تىلگە تيەك ەتتى.
سونداي-اق, جاڭا ستاندارتقا سايكەس جەدەل جاردەمنىڭ دىبىستىق دابىلى دا كۇشەيتىلگەن بولاتىن. بۇعان دەيىن جەدەل جاردەم كولىكتەرىنىڭ ءجۇرگىزۋشىلەرى دابىلدى ءوز ەرىكتەرىنە قاراي قوسىپ كەلسە, ەندى ولار كۇن سايىن ساعات 8.00-دەن 23.00-گە دەيىن شاقىرتۋ تۇسكەن كەزدەگى جۇمىستارىن تولىق اياقتامايىنشا دىبىستىق دابىلدى مىندەتتى تۇردە قوساتىن بولادى. ال ودان تىس ۋاقىت پەن تۇنگى مەزگىلدە تەك جارىقتى دابىلمەن جۇرەدى. بۇگىندە استانا قالاسىنىڭ جەدەل مەديتسينالىق جاردەم ستانساسىندا 101 كولىك بار. قازىرگى ۋاقىتتا ونىڭ تەك ونىنىڭ عانا ءتۇسى وزگەرسە, جىل سوڭىنا دەيىن قالاداعى بارلىق كولىك جاپپاي سارى تۇسكە بويالماق.
