استانانىڭ «ابۋ-دابي پلازا» كوپفۋنكتسيونالدى كەشەنى مەن بوتانيكالىق باقتىڭ اراسىندا جەلىلىك ساياباق سالىنادى.
نۇر-سۇلتان قالاسى ساۋلەت, قالا قۇرىلىسى جانە جەر قاتىناستارى باسقارماسى كورسەتكەن جوبانىڭ ەسكيزدەرى نەگىزىندە بۇل اۋماقتا قالا تۇرعىندارى مەن ەلوردا قوناقتارى ءۇشىن الاڭسىز دەمالۋعا ارنالعان ورىندار, كولەڭكەلى شاتىرلار, ويىن الاڭدارى, سپورت ايماعى, زاماناۋي سۋارۋ جۇيەسىمەن قوسىمشا كوگالداندىرۋ, ۆەلوسيپەد جولى سالىنادى.
سىزىقتىق ساياباق – بۇل ەكى ۋچاسكە. بىرەۋى – شارشى ءپىشىندى, اۋدانى 44675 م2, ەكىنشىسى – تىكبۇرىشتى, اۋدانى – 95511 م2. سونىمەن بىرگە باس قالاداعى اقمەشىت جانە تۇركىستان كوشەلەرىمەن قاتار ەكى جاياۋ جۇرگىنشى جولىن سالۋ جوسپارلانىپ وتىر.
مامانداردىڭ مالىمدەۋىنشە, ولاردىڭ بويىندا كرەاتيۆتى ارت-نىساندار, ورىندىقتار, قوقىس جاشىكتەرى قويىلىپ, گۇلزارلار اشىلادى. قىستا مۇز ايدىنى جاسالادى.
تروتۋارلار, سوقپاقتار, كوگالدار, سپورت جانە بالالار الاڭدارى بەينەباقىلاۋ استىندا بولادى. سونداي-اق مۇندا رەزەڭكە جابىنى بار ۆەلوسيپەد جولدارى دا جاسالادى.
قالاداعى «ابۋ-دابي پلازا» كوپفۋنكتسيونالدى كەشەنى مەن بوتانيكالىق باقتىڭ اراسىنداعى اۋماق الداعى ۋاقىتتا مۇگەدەكتەرگە ارنالعان اربالارى بار قوناقتارعا ىڭعايلى بولۋ ءۇشىن ديزاين-كود پەن كەدەرگىسىز ورتا تالاپتارىن ەسكەرە وتىرىپ, اباتتاندىرىلادى.
سەرۋەندەۋ جولدارىنىڭ بويىندا كوپجىلدىق بۇتالاردى وتىرعىزۋ قاراستىرىلعان. كوگالداندىرۋدىڭ جالپى اۋدانى 79920 م2 قۇرايدى.
قالا باسشىسىنىڭ ايتۋىنشا, بيىل نۇر-سۇلتان قالاسىندا بارلىعى 200-دەن استام اۋلا مەن قوعامدىق كەڭىستىك اباتتاندىرىلادى.
گۇلبارشىن وكەشقىزى
