قالالىق ىشكى ساياسات باسقارماسى, ەلورداداعى ازاماتتىق سەكتور, قوعامدىق كەڭەس جانە «Amanat» پارتياسى قالالىق فيليالىنىڭ وكىلدەرى پرەزيدەنت جولداۋىنداعى جەمقورلىقپەن كۇرەسكە باعىتتالعان مىندەتتەردى تالقىلاۋعا جينالدى. ولار «جەمقورلىققا قارسى ستراتەگيانى جۇزەگە اسىرۋ – پرەزيدەنت جولداۋىنان شىعاتىن ماڭىزدى مىندەت» تاقىرىبىندا وتكەن دوڭگەلەك ۇستەلدە باس قوستى.
نۇر-سۇلتان قالاسى ىشكى ساياسات باسقارماسىنىڭ باستىعى داۋرەن بابامۇراتوۆ جولداۋدا ايتىلعان 10 باعىتتىڭ ءبىرى – جەرگىلىكتى اتقارۋشى بيلىكتىڭ دەبيۋروكراتيزاتسياسىنا ەرەكشە باسىمدىق بەرىلۋىنىڭ ءوزى جەمقورلىقتىڭ الدىن الۋعا نەگىزدەلىپ وتىرعانىن جەتكىزدى.
– مەملەكەت باسشىسى ايتقانداي, جەرگىلىكتى اتقارۋشى بيلىكتەگى ءبىرىنشى باسشىلار ورىنباسارلارىنىڭ سانىن قىسقارتۋ دا «حالىق ۇنىنە قۇلاق اساتىن مەملەكەتكە» اينالۋدىڭ نىشانى. ءبىرىنشى جانە مەملەكەتتىك ورگاندار باسشىلارىنىڭ حالىقپەن جاپپاي كەزدەسۋلەرى بۇرىن تەك قابىلداۋ كۇندەرىن بەلگىلەۋ ارقىلى ۇيىمداستىرىلعاندا, وعان تۇرعىنداردىڭ كەلۋى دە, كەلمەۋى دە مۇمكىن ەدى, ەندى ولاردىڭ وسى كەزدەسۋلەردى وتكىزۋى جانە ءتىپتى تۇرعىنداردىڭ مەكەنجايلارىنا دەيىن بارىپ, ماسەلەسىن تىڭداۋى مىندەتتەلدى. ماسەلەن, قازىر ەلوردادا 16 تۇرعىن الاپ بولسا, قالا اكىمى سونىڭ بارىندە ءجيى كەزدەسۋ وتكىزەدى. ەندىگى جەردە وسى قادامداردىڭ ءبارى دە جۇيەلى تۇردە بولادى. بۇل جەمقورلىقپەن كۇرەستە وتە ماڭىزدى جانە دەر كەزىندە قولعا الىنعان قادام دەپ سانايمىن, – دەدى د.بابامۇراتوۆ.
«باسەكەلەستىك ساياساتتى قورعاۋ جانە دامىتۋ ورتالىعى» اق ۆيتسە-پرەزيدەنتى, قوعامدىق كەڭەس مۇشەسى مارات مۇستافين قر سىبايلاس جەمقورلىققا قارسى ساياساتىنىڭ 2022-2026 جىلدارعا ارنالعان تۇجىرىمداماسىندا بيۋدجەت قارجىسىن دۇرىس بولمەۋ جانە ولاردى يگەرۋدەگى ايقىندىلىقتىڭ ازدىعى دا مەملەكەت قارجىسىن باسقارۋدا جەمقورلىق تاۋەكەلىن ارتتىراتىن فاكتورلاردىڭ ءبىرى سانالاتىنىن ايتتى.
«Amanat» پارتياسىنىڭ نۇر-سۇلتان قالالىق فيليالى جانىنداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەس توراعاسى ۆلاديمير ساۆكيننىڭ ايتۋىنشا, جەمقورلىق اسىرەسە اۋىل شارۋاشىلىعى سالاسىندا كوپتەگەن جىلدار بويى بەلەڭ الىپ كەلەدى. بۇل تۇرعىدا قىلمىستىق ىستەر وتە كوپ. «اگرارلى رەسپۋبليكا بولساق تا, جەمقورلىق ەلىمىزدىڭ اۋىل شارۋاشىلىعى سالاسىن قارقىندى دامىتۋعا كەدەرگى كەلتىرۋدە. سونىمەن قاتار كەدەن جانە كۆازيسەكتورلىق سالادا دا جەمقورلىق باسىم. مەملەكەتتەن بولىنگەن قارجى ءتيىستى ادامدارعا جەتپەيدى. بۇل حالىقتىڭ ىزاسىن تۋدىرىپ, ولاردىڭ اكىمدىكتەر مەن پارتيا عيماراتتارىنىڭ الدىنا جينالىپ, ادىلەتتىلىك تالاپ ەتۋىنە اكەلەدى» دەپ اتاپ ءوتتى ول. سونىمەن قاتار ول قايتادان جاساقتالعان قوعامدىق كەڭەستەر جۇمىسىنا, قالاداعى مەملەكەتتىك مەكەمەلەرگە سىبايلاس جەمقورلىق بويىنشا مونيتورينگ جۇرگىزۋ ىسىنە توقتالدى. دوڭگەلەك ۇستەل بارىسىندا سونىمەن قاتار كاسىپوداق فەدەراتسياسى زاڭ كلينيكاسىنىڭ باسشىسى نازگۇل ازتاەۆا جانە نۇر-سۇلتان قالاسى كاسىپوداق ورتالىعى جانىنداعى «كەلەشەك» جاستار كەڭەسىنىڭ توراعاسى ازامات مەنسەيىتوۆ تە تاقىرىپ اياسىندا بايانداما جاسادى.
