جەر استىنا قوقىس جينايمىز
استانا اكىمدىگى جاڭا جەراستى قوقىس كونتەينەرلەرىن ورنالاستىرۋ ءۇشىن كونتەينەر الاڭىن انىقتادى.
استانا قالالىق قورشاعان ورتانى قورعاۋ جانە تابيعاتتى پايدالانۋدى رەتتەۋ باسقارماسىنىڭ مالىمەتىنشە, ءۇش اۋداندا نەبارى جاڭا تيپتەگى 36 كونتەينەر پايدا بولادى. قاتتى تۇرمىستىق قالدىقتاردى جيناۋعا ارنالعان سىيىمدىلىعى تەرەڭدەتىلگەن جاشىكتەر بايقوڭىر (14), سارىارقا (10), الماتى (12) اۋداندارىنا ورناتىلماق.
«تۇرعىن ءۇي قۇرىلىسىنىڭ تىعىزدىعى مەن جۇرەتىن جولداردىڭ تارلىعى, ءىرى گاباريتتى ارنايى تەحنيكانىڭ قوقىستى شىعارار كەزدەگى قيىندىعىنا بايلانىستى قالانىڭ ءۇش اۋدانىندا تەرەڭدەتىلگەن كونتەينەرلەردى ورناتاتىن 12 ورىن انىقتالدى. العاشقى بەس كونتەينەردىڭ مونتاج جۇمىستارى ابىلايحان داڭعىلى, 25 جانە پۋشكين كوشەسى, 15 مەكەنجايلارىندا اياقتالدى. قازىر سول ۋچاسكەنى اباتتاندىرۋ جۇرگىزىلىپ جاتىر» دەلىنگەن رەسمي حابارلامادا.
ايتا كەتەيىك, جەراستى قوقىس كونتەينەرىنىڭ كولەمى – 3,5 تەكشە مەتر. قاتتى تۇرمىستىق قالدىقتاردى ساقتايتىن جانە جەراستى جيناۋ تەحنولوگياسىن فينليانديانىڭ ءوندىرىسى ازىرلەگەن. سىيىمدىلىعى 3 تەكشە مەتردى قۇرايتىن ءبىر كونتەينەر 3 قوقىس جاشىگىن الماستىرادى دەپ جوسپارلانۋدا. بۇل اۋلاداعى الاڭنىڭ كولەمىن كەڭەيتۋگە مۇمكىندىك بەرىپ, باكتەريانىڭ تارالۋى مەن كۇن ىسىعان كەزدە جاعىمسىز ءيىستىڭ شىعۋىن ازايتادى. سەبەبى كونتەينەردىڭ تەڭ جارتىسى جەر استىندا ورنالاسادى.
جەراستى كونتەينەرلەرىندەگى قاتتى تۇرمىستىق قالدىقتاردى قوقىس تاسىمالدايتىن «Clean city» كومپانياسى جۇزەگە اسىرادى. قاتتى تۇرمىستىق قالدىقتاردى تەرەڭنەن جيناۋ ءۇشىن كومپانيا ارنايى مانيپۋلياتور ساتىپ العان. ول كۇن سايىن جاڭا كونتەينەرلەردەگى قوقىستاردى شىعارادى.