ەلوردلانىڭ 20 جىلدىعىنا وراي قالادا 20-عا جۋىق جاڭا ساياباق, اللەيا بوي كوتەرىپ, قالا قوناقتارى مەن تۇرعىندارىنا ەسىگىن ايقارا اشتى. سولاردىڭ ءبىرى – «جەتىسۋ» ساياباعى.
شاھارداعى بۇرىنعى «اراي» ساياباعى تولىقتاي جوندەۋدەن ءوتتى. قازىر جاڭارعان ساياباق «جەتىسۋ» دەپ اتالادى. ءبىر جارىم جىل جۇرگىزىلگەن قۇرىلىس جۇمىستارىنا 40-تان اسا تەحنيكا مەن زاماناۋي تەحنولوگيالار پايدالانىلىپ, 700-گە جۋىق مامان جۇمىلدىرىلىپتى.
الماتى وبلىسىنىڭ ەلوردا مەرەيتويىنا تارتۋى رەتىندە سالىنعان باقتا اتالمىش ءوڭىردىڭ قۇندى جادىگەرلەرى كوپشىلىك نازارىنا ۇسىنىلىپ وتىر. جەتىسۋدىڭ كورىكتى جەرلەرىنىڭ بارلىعى ءبىر ساياباقتىڭ اۋماعىنا سىيىپ كەتكەن. ونداعى سۋبۇرقاق پەن ۇزىندىعى 1,5 كم بولاتىن ۆەلوجول, جۇگىرۋ جولدارى جانە سپورت قۇرىلعىلارى مەن بالالارعا ارنالعان ويىن الاڭدارى – استانالىقتار مەن قالا قوناقتارىنىڭ قۇزىرىندا.
15 گەكتار جەردى الىپ جاتقان ساياباق نەگىزگى بەس بولىككە بولىنگەن. ياعني ساياباق كىرەبەرىس قاقپا, اۆتوتۇراق, سپورتتىق ويىن الاڭى, دەمالاتىن ورىن مەن تانىمدىق تاريحي ورىننان تۇرادى. ونىڭ ءار بولىگى ەرەكشە. مىسالى, تاريحي ورىننان شارىن شاتقالى مەن تاڭبالى تاستى, وڭىردەگى تاۋلاردى, ماعىنالى مۇسىندەردى, الماتى اپورتىن, جەر ءجانناتى جەتىسۋدىڭ وزەندەرىن كورۋگە بولادى. ءتىپتى مۇنداعى جولدىڭ ءوزى ۇلى جىبەك جولىن بەينەلەپ تۇرعانداي.
